പുതിയ കാർ വാങ്ങാനൊരുങ്ങുകയാണോ? അടിമുടി അറിയണം ഇൻഷുറൻസ് പോളിസികളെപ്പറ്റി!

പുതിയ കാർ വാങ്ങുമ്പോൾ ഇൻഷുറൻസ് പ്രീമിയം, ഐ.ഡി.വി, ആവശ്യമായ ആഡ്-ഓണുകൾ എന്നിവയെക്കുറിച്ച് കൃത്യമായി മനസിലാക്കേണ്ടതുണ്ട്. ഡീലർമാർ നൽകുന്ന പാക്കേജുകൾക്ക് പകരം വിവിധ പോളിസികൾ താരതമ്യം ചെയ്യുന്നത് പണം ലാഭിക്കാൻ സഹായിക്കും. കൂടാതെ, അപകടമുണ്ടായാൽ ക്ലെയിം ലഭിക്കുന്നതിനുള്ള നടപടിക്രമങ്ങളും പോളിസി ഉടമകൾ അറിഞ്ഞിരിക്കണം.

ഉത്സവകാലം എത്തിയതോടെ പുതിയ കാറുകൾ വാങ്ങുന്നവരുടെ എണ്ണത്തിൽ വൻ വർധനവാണ് ഉണ്ടാകുന്നത്. കാർ സ്വന്തമാക്കുമ്പോൾ അതിനുള്ള ഫിനാൻസിങ് ഓപ്ഷനുകൾ തെരഞ്ഞെടുക്കുന്നതിനൊപ്പം തന്നെ പ്രധാനമാണ് ഇൻഷുറൻസ് വിവരങ്ങളും കൃത്യമായി മനസിലാക്കുക എന്നത്. ഇന്ത്യയിൽ കാർ ഇൻഷുറൻസ് എന്നത് നിയമപരമായ ബാധ്യത എന്നതിലുപരി, വാഹനത്തിനുണ്ടാകുന്ന അപ്രതീക്ഷിത സാമ്പത്തിക നഷ്ടങ്ങളിൽ നിന്ന് സംരക്ഷണം നൽകുന്ന പ്രധാന കവറേജ് കൂടിയാണ്.

വാഹനത്തിന്റെ മോഡലും തരവും അനുസരിച്ച് ഇൻഷുറൻസ് പ്രീമിയത്തിൽ മാറ്റങ്ങൾ വരാറുണ്ട്. പ്രത്യേകിച്ച് എസ്‌.യു.വി വിഭാഗത്തിലുള്ള ഡീസൽ വാഹനങ്ങൾക്ക് ഒരു വർഷത്തെ സ്വന്തം വാഹനത്തിനുള്ള പരിരക്ഷ, മൂന്ന് വർഷത്തെ തേർഡ് പാർട്ടി കവറേജ്, അധിക ആഡ്-ഓണുകൾ എന്നിവയടക്കം ഇൻഷുറൻസ് തുക 40,000 രൂപയ്ക്ക് മുകളിൽ വരാൻ സാധ്യതയുണ്ട്. അതിനാൽ പുതിയ കാർ വാങ്ങുമ്പോൾ ഇൻഷുറൻസ് രേഖകളിൽ ഒപ്പുവെക്കുന്നതിന് മുൻപ് പ്രീമിയത്തിന്റെ ഘടന വ്യക്തമായി മനസിലാക്കേണ്ടതുണ്ട്.

ഒരു പുതിയ കാർ ഇൻഷുറൻസ് പ്രീമിയത്തിൽ സ്വന്തം വാഹനത്തിനുണ്ടാകുന്ന കേടുപാടുകൾക്കുള്ള തുകയും തേർഡ് പാർട്ടി കവറേജും ഓപ്ഷണൽ ആഡ്-ഓണുകളും ഉൾപ്പെടുന്നു. ഇൻഷുറൻസ് കമ്പനി നിർണ്ണയിക്കുന്ന വാഹനത്തിന്റെ പരമാവധി മൂല്യമായ ഐ.ഡി.വി (Insured Declared Value - IDV) കാറിന്റെ എക്സ്-ഷോറൂം വിലയുടെ 95 ശതമാനം വരെ ലഭിക്കും. വാഹനം പൂർണമായി നഷ്ടപ്പെടുകയോ മോഷ്ടിക്കപ്പെടുകയോ ചെയ്യുമ്പോൾ ലഭിക്കുന്ന പരമാവധി തുകയാണിത്.

ഇൻഷുറൻസ് എടുക്കുമ്പോൾ ആവശ്യമായ ആഡ്- ഓണുകൾ മാത്രം തെരഞ്ഞെടുക്കാൻ ഉടമകൾ ശ്രദ്ധിക്കണം. വാഹന ഭാഗങ്ങൾ മാറ്റിവെക്കുമ്പോൾ ഉണ്ടാകുന്ന തേയ്മാന ചെലവുകൾ ഒഴിവാക്കാൻ സീറോ ഡിപ്രിസിയേഷൻ കവർ സഹായിക്കും. വാഹനം നഷ്ടപ്പെട്ടാൽ വാങ്ങിയ വില തന്നെ തിരികെ ലഭിക്കാൻ റിട്ടേൺ ടു ഇൻവോയ്സ് ഉപകരിക്കുമ്പോൾ, വെള്ളക്കെട്ടുള്ള പ്രദേശങ്ങളിലുള്ളവർക്ക് എഞ്ചിൻ പ്രൊട്ടക്ഷനും യാത്രകൾ കൂടുതൽ ചെയ്യുന്നവർക്ക് റോഡ്‌സൈഡ് അസിസ്റ്റൻസും സഹായകരമാണ്. എന്നാൽ ടയർ പ്രൊട്ടക്ഷൻ, കീ റീപ്ലേസ്‌മെന്റ് തുടങ്ങിയവ ആവശ്യമെങ്കിൽ മാത്രം ഉൾപ്പെടുത്തിയാൽ മതിയാകും. കാർ ഡീലർമാർ നൽകുന്ന പാക്കേജ് അതുപോലെ സ്വീകരിക്കുന്നതിന് പകരം വിവിധ കമ്പനികളുടെ പോളിസികൾ തമ്മിൽ താരതമ്യം ചെയ്യുന്നത് പ്രീമിയം തുക ലാഭിക്കാൻ സഹായിക്കും.

കുറഞ്ഞ പ്രീമിയം വാഗ്ദാനം ചെയ്യുന്ന പോളിസികളിൽ പലപ്പോഴും കുറഞ്ഞ ഐ.ഡി.വിയോ അല്ലെങ്കിൽ ക്ലെയിം സമയത്ത് ഉയർന്ന കൈയ്യിൽ നിന്നുള്ള ചെലവുകളോ ഉണ്ടാകാൻ സാധ്യതയുണ്ട്. അതുപോലെ അപകടങ്ങൾ സംഭവിച്ചാൽ എതിർകക്ഷിയുമായി തർക്കത്തിൽ ഏർപ്പെടാതെ സുരക്ഷിത സ്ഥാനത്തേക്ക് മാറുകയും, വാഹനം, ഡ്രൈവർ, ഇൻഷുറൻസ് വിവരങ്ങൾ പരസ്പരം കൈമാറുകയും വേണം. ഡ്രൈവിംഗ് ലൈസൻസ്, ആർ.സി, എഫ്.ഐ.ആർ, ക്ലെയിം ഫോം, അപകടസ്ഥലത്തെ ചിത്രങ്ങൾ എന്നിവ സഹിതം പോലീസിലും ഇൻഷുറൻസ് കമ്പനിയിലും വിവരമറിയിച്ച് സർവേയർ പരിശോധനയ്ക്ക് ശേഷമേ റിപ്പയറിംഗ് ജോലികൾ ആരംഭിക്കാവൂ.