ഭവന വായ്പ എടുക്കാന്‍ ഒരുങ്ങുകയാണോ? ഏപ്രില്‍ മാസത്തെ പലിശ നിരക്കുകള്‍ അറിയാം

2026 ഏപ്രില്‍ മാസത്തില്‍ പ്രമുഖ പൊതുമേഖലാ ബാങ്കുകള്‍ കുറഞ്ഞ പലിശ നിരക്കില്‍ ഭവന വായ്പകള്‍ വാഗ്ദാനം ചെയ്യുന്നു. വായ്പ എടുക്കുന്നതിന് മുന്‍പ് പലിശ നിരക്കുകള്‍ താരതമ്യം ചെയ്യുന്നതിനൊപ്പം ക്രെഡിറ്റ് സ്കോർ, പ്രോസസ്സിംഗ് ഫീസ്, വായ്പാ കാലാവധി തുടങ്ങിയ പ്രധാന കാര്യങ്ങളും ശ്രദ്ധിക്കേണ്ടതുണ്ട്.

സ്വന്തമായി ഒരു വീട് എന്ന സ്വപ്നം യാഥാര്‍ത്ഥ്യമാക്കാന്‍ ആഗ്രഹിക്കുന്നവര്‍ക്ക് 2026 ഏപ്രില്‍ മാസം മികച്ച അവസരമാണ് ഒരുക്കുന്നത്. പ്രമുഖ പൊതുമേഖലാ ബാങ്കുകള്‍ 7.10 ശതമാനം മുതല്‍ കുറഞ്ഞ പലിശ നിരക്കില്‍ ഭവന വായ്പകള്‍ വാഗ്ദാനം ചെയ്യുന്നുണ്ട്. എന്നാല്‍ വായ്പ എടുക്കുന്നതിന് മുന്‍പ് പലിശ നിരക്ക് മാത്രം നോക്കിയാല്‍ പോരാ, മറ്റ് പല കാര്യങ്ങളും ശ്രദ്ധിക്കേണ്ടതുണ്ട്. ഏപ്രില്‍ മാസത്തെ പ്രമുഖ ബാങ്കുകളുടെ പലിശ നിരക്കുകളും വായ്പ എടുക്കുമ്പോള്‍ ശ്രദ്ധിക്കേണ്ട കാര്യങ്ങളും താഴെ നല്‍കുന്നു.

സ്റ്റേറ്റ് ബാങ്ക് ഓഫ് ഇന്ത്യ : 30 ലക്ഷം വരെയുള്ള വായ്പകള്‍ക്കും, 30 ലക്ഷം മുതല്‍ 75 ലക്ഷം വരെയുള്ള വായ്പകള്‍ക്കും, 75 ലക്ഷത്തിന് മുകളിലുള്ള വായ്പകള്‍ക്കും ഒരേപോലെ 7.25 മുതല്‍ 8.95 ശതമാനം വരെയാണ് പലിശ ഈടാക്കുന്നത്.

ബാങ്ക് ഓഫ് ബറോഡ: 30 ലക്ഷം രൂപ വരെയും 75 ലക്ഷം രൂപ വരെയും 7.20 മുതല്‍ 9.00 ശതമാനം വരെ പലിശ ഈടാക്കുമ്പോള്‍, 75 ലക്ഷത്തിന് മുകളിലുള്ള വായ്പകള്‍ക്ക് 7.20 മുതല്‍ 9.25 ശതമാനം വരെയാണ് നിരക്ക്.

യൂണിയന്‍ ബാങ്ക് ഓഫ് ഇന്ത്യ: എല്ലാ വിഭാഗം വായ്പകള്‍ക്കും (30 ലക്ഷം മുതല്‍ 75 ലക്ഷത്തിന് മുകളില്‍ വരെ) 7.15 മുതല്‍ 9.50 ശതമാനം വരെയാണ് ബാങ്ക് പലിശ നിശ്ചയിച്ചിരിക്കുന്നത്.

പഞ്ചാബ് നാഷണല്‍ ബാങ്ക് : 30 ലക്ഷം രൂപ വരെയുള്ള വായ്പകള്‍ക്ക് 7.30 മുതല്‍ 9.30 ശതമാനം വരെ പലിശ ഈടാക്കുമ്പോള്‍, 30 ലക്ഷത്തിന് മുകളിലുള്ള എല്ലാ വായ്പകള്‍ക്കും 7.25 മുതല്‍ 9.20 ശതമാനം വരെയാണ് നിരക്ക്.

ബാങ്ക് ഓഫ് ഇന്ത്യ: 30 ലക്ഷം രൂപ മുതല്‍ 75 ലക്ഷം രൂപ വരെയുള്ള വായ്പകള്‍ക്ക് 7.10 മുതല്‍ 10.00 ശതമാനം വരെയും, 75 ലക്ഷത്തിന് മുകളിലുള്ള വായ്പകള്‍ക്ക് 7.10 മുതല്‍ 10.25 ശതമാനം വരെയുമാണ് പലിശ ഈടാക്കുന്നത്.

കാനറ ബാങ്ക്: 30 ലക്ഷം വരെ 7.25 - 10.00 ശതമാനവും, 30 മുതല്‍ 75 ലക്ഷം വരെ 7.20 - 10.00 ശതമാനവും, 75 ലക്ഷത്തിന് മുകളിലുള്ള തുകയ്ക്ക് 7.15 - 9.90 ശതമാനവുമാണ് കാനറ ബാങ്കിലെ പലിശ നിരക്കുകള്‍.

യൂക്കോ ബാങ്ക്: ഈ ബാങ്ക് എല്ലാ വായ്പാ സ്ലാബുകള്‍ക്കും 7.15 മുതല്‍ 9.25 ശതമാനം വരെ എന്ന ഒരേ പലിശ നിരക്കാണ് വാഗ്ദാനം ചെയ്യുന്നത്.

വായ്പ എടുക്കും മുന്‍പ് ഈ 5 കാര്യങ്ങള്‍ ശ്രദ്ധിക്കൂ

പരസ്യങ്ങളില്‍ കാണുന്ന കുറഞ്ഞ പലിശ നിരക്ക് മാത്രം കണ്ട് വായ്പ എടുക്കരുത്. ലക്ഷക്കണക്കിന് രൂപ ലാഭിക്കാന്‍ താഴെ പറയുന്ന കാര്യങ്ങള്‍ കൂടി പരിശോധിക്കുക:

1. ക്രെഡിറ്റ് സ്‌കോര്‍ പ്രധാനം: നിങ്ങളുടെ ക്രെഡിറ്റ് സ്‌കോര്‍ 750-ന് മുകളിലാണെങ്കില്‍ ബാങ്കുകളില്‍ നിന്ന് കുറഞ്ഞ പലിശ നിരക്കില്‍ വായ്പ ലഭിക്കാന്‍ എളുപ്പമാണ്. തിരിച്ചടവ് കൃത്യമാണെന്ന് ഉറപ്പുവരുത്തുക. 

2. മറഞ്ഞിരിക്കുന്ന ചാര്‍ജുകള്‍: പലിശ നിരക്ക് കൂടാതെ പ്രോസസിങ് ഫീസും ഇന്‍ഷുറന്‍സ് തുകയും മറ്റ് ചാര്‍ജുകളും എത്രയാണെന്ന് കൃത്യമായി ചോദിച്ചു മനസ്സിലാക്കുക. 'എഫക്റ്റീവ് ഇന്‍ട്രസ്റ്റ് റേറ്റ്' ആണ് യഥാര്‍ത്ഥത്തില്‍ നിങ്ങള്‍ നല്‍കേണ്ടി വരുന്നത്. 

3. കാലാവധിയും ഇ.എം.ഐയും : വായ്പാ കാലാവധി കൂടുന്തോറും ഇഎംഐ കുറയുമെങ്കിലും, ബാങ്കിലേക്ക് നിങ്ങള്‍ നല്‍കുന്ന ആകെ പലിശ തുക വര്‍ദ്ധിക്കും. അതിനാല്‍ നിങ്ങളുടെ വരുമാനത്തിനനുസരിച്ച് അനുയോജ്യമായ കാലാവധി തിരഞ്ഞെടുക്കുക. 

4. യോഗ്യത പരിശോധിക്കുക: പ്രായം, മാസ വരുമാനം, ജോലി എന്നിവ ബാങ്കുകള്‍ കര്‍ശനമായി പരിശോധിക്കാറുണ്ട്. അപേക്ഷിക്കുന്നതിന് മുന്‍പ് നിങ്ങള്‍ ഈ മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കുക. 

5. കൂടുതല്‍ സൗകര്യങ്ങള്‍: വായ്പ എടുക്കുന്ന ബാങ്ക് ടോപ്പ്-അപ്പ് സൗകര്യം നല്‍കുന്നുണ്ടോ എന്ന് പരിശോധിക്കുന്നത് ഭാവിയില്‍ ഗുണകരമാകും