'രാജ്യം ആരുടെ മുന്നിലും തല കുനിക്കരുത്; ജോലികൾ മുടങ്ങരുത്'; പുതിയ മുദ്രാവാക്യവുമായി ബിജെപി

'പണികൾ മുടങ്ങാതിരിക്കട്ടെ, നമ്മുടെ രാജ്യം ആരുടെ മുന്നിലും താഴാതിരിക്കട്ടെ' (കാം രുകേ ന, ദേശ് ചുകേ നാ ) എന്നാണ് പുതിയ മുദ്രാവാക്യം. അധികാര തുടർച്ച ഉണ്ടായാൽ എന്തൊക്കെ ചെയ്യും എന്ന അജണ്ടയുടെ അടിസ്ഥാനത്തിലാണ് പുതിയ മുദ്രാവാക്യവുമായി ബിജെപി എത്തിയിരിക്കുന്നത്. 

ദില്ലി: ലോക്സഭ തെരഞ്ഞെടുപ്പ് വോട്ടെടുപ്പ് രാജ്യത്ത് ആരംഭിച്ചു കഴിഞ്ഞു. ഈ സമയം പുതിയ മുദ്രാവാക്യവുമായി ബിജെപി രംഗത്ത്. 'പണികൾ മുടങ്ങാതിരിക്കട്ടെ, നമ്മുടെ രാജ്യം ആരുടെ മുന്നിലും താഴാതിരിക്കട്ടെ' (കാം രുകേ ന, ദേശ് ചുകേ നാ ) എന്നാണ് പുതിയ മുദ്രാവാക്യം. അധികാര തുടർച്ച ഉണ്ടായാൽ എന്തൊക്കെ ചെയ്യും എന്ന അജണ്ടയുടെ അടിസ്ഥാനത്തിലാണ് പുതിയ മുദ്രാവാക്യവുമായി ബിജെപി എത്തിയിരിക്കുന്നത്. രാജ്യത്തിന്റെ വികസനത്തെ ലക്ഷ്യമാക്കിയാണ് ഓരോ നീക്കവും എന്ന് ബിജെപി വ്യക്തമാക്കുന്നു. 

''ഇനിയും ധാരാളം ജോലികൾ പൂർത്തിയാക്കാനുണ്ട്. ഒന്നും പൂർണ്ണതയിലെത്തിയിട്ടില്ല എന്നാണ് പുതിയ മുദ്രാവാക്യം അടിവരയിട്ട് പറയുന്നത്. അതുപോലെ ഭരണതുടർച്ച ഉണ്ടാകേണ്ടതാവശ്യമാണെന്നും.'' ബിജെപി പ്രവര്‍ത്തകരിലൊരാള്‍ പറയുന്നു. ബിജെപിയുടെ തെര‍ഞ്ഞെടുപ്പ് വാ​ഗ്ദാനങ്ങളിൽ ചിലതിന്റെ പൂർത്തീകരണമാണ് ഈ മുദ്രാവാക്യത്തിലൂടെ ലക്ഷ്യമാക്കുന്നത്. 2022 ഓടെ എല്ലാവർക്കും വീട്, സമ്പൂർണ്ണ വൈദ്യുതീകരണം, സുരക്ഷിതമായ കുടിവെള്ളം, കിസാൻ ക്രെഡിറ്റ് കാർഡിലൂടെ ഒരു ലക്ഷം രൂപയ്ക്ക് മുകളില്‍ പലിശ രഹിത വായ്പ എന്നിവയാണ് ‌നടപ്പിലാക്കാൻ ഉദ്ദേശിക്കുന്ന പദ്ധതികൾ. ഇവ പൂർത്തിയാക്കണമെങ്കിൽ‌ സർക്കാരിന് സുസ്ഥിരതയും ഭരണ തുടര്‍ച്ചയും ആവശ്യമാണെന്നും ബിജെപി അഭിപ്രായപ്പെടുന്നു. . 

'ഒരിക്കൽ കൂടി മോദി സർക്കാർ' എന്നതാണ് ബിജെപി സർക്കാരിന്റെ ഏറ്റവും പ്രധാനപ്പെട്ട മുദ്രാവാക്യം. 'മോദിയുണ്ടെങ്കിൽ എല്ലാം സാധ്യമാകും' എന്നതാണ് മറ്റൊരെണ്ണം. ഇലക്ഷന്റെ തുടക്ക സമയത്ത് ഇതായിരുന്നു ബിജെപി തങ്ങളുടെ പ്രധാന മുദ്രാവാക്യമായി സ്വീകരിച്ചത്. 'നമ്മുടെ രാജ്യം ആരുടെ മുന്നിലും തല കുനിക്കാതിരിക്കട്ടെ' എന്ന വാചകം കൊണ്ട് ഉദ്ദേശിക്കുന്നത് മോദി അധികാരത്തിലേക്ക് തിരിച്ചു വരേണ്ടതിന്റെ പ്രാധാന്യത്തെയാണെന്ന് ബിജെപി പ്രവർത്തകർ പറയുന്നു. ബിജെപി എന്ത് ചെയ്തിട്ടുണ്ട് എന്നല്ല, എന്താണ് ചെയ്യാൻ പോകുന്നതെന്നാണ് പുതിയ മുദ്രാവാക്യത്തിന്‍റെ ഉള്ളടക്കം. ദാരിദ്ര്യം എന്ന ദുരന്തം രാജ്യത്ത് നിന്ന് ഇല്ലാതാക്കുക എന്നതാണ് ബിജെപിയുടെ ലക്ഷ്യമെന്നും ഇവർ  കൂട്ടിച്ചേർക്കുന്നു.