ശ്വാസം മുട്ടിച്ച് ഫാക്ടറി മാലിന്യം; നിഷേധ വോട്ടിനൊരുങ്ങി ക‌ഞ്ചിക്കോട് കോളനി

അന്തരീക്ഷ മലിനീകരണം മൂലം ശ്വാസകോശ രോഗങ്ങൾ മുതൽ അ‍ർബുദം വരെ ഈ മേഖലയിൽ വ്യാപിക്കുന്നെന്നാണ് നാട്ടുകാരുടെ പരാതി. 

കഞ്ചിക്കോട്: ഫാക്ടറി മലിനീകരണ പ്രശ്നത്തിൽ ശാശ്വത പരിഹാരം കാണാത്തതിൽ പ്രതിഷേധിച്ച് ലോക്സഭ തെരഞ്ഞെടുപ്പിൽ നിഷേധവോട്ട് ചെയ്യാനൊരുങ്ങി പാലക്കാട് കഞ്ചിക്കോട്ടെ കോളനി നിവാസികൾ. പുതുശ്ശേരിയിലെ പ്രീകോട്ട് മിൽ കോളനിയിലെ ഏഴ് റസിഡൻഷ്യൽ കോളനി നിവാസികളാണ് നിഷേധ വോട്ടിലൂടെ പ്രതിഷേധം കടുപ്പിക്കാനൊരുങ്ങുന്നത്

വ്യവസായ മേഖലയായ കഞ്ചിക്കോട്ടെ ഇരുമ്പുരുക്ക് ഫാക്ടറികൾക്കെതിരെ പരിസരവാസികൾ പ്രതിഷേധം തുടങ്ങിയിട്ട് നാളേറെയായി. അന്തരീക്ഷ മലിനീകരണം മൂലം ശ്വാസകോശ രോഗങ്ങൾ മുതൽ അ‍ർബുദം വരെ ഈ മേഖലയിൽ വ്യാപിക്കുന്നെന്നാണ് നാട്ടുകാരുടെ പരാതി. മലിനീകരണ നിയന്ത്രണ ചട്ടങ്ങളലെല്ലാം ലംഘിച്ചാണ് ഫാക്ടറികളുടെ പ്രവർത്തനമെന്നും പ്രദേശവാസികൾ പറഞ്ഞു. അധികൃതരോടും ജനപ്രതിനിധികളോടും പരാതി പറഞ്ഞിട്ടും കാര്യമില്ലാത്തതിനാലാണ് നിഷേധവോട്ടിനൊരുങ്ങുന്നതെന്നും കോളനി നിവാസികൾ പറഞ്ഞു.

മൂന്നു വാർഡുകളിലായി പതിനായിരത്തോളം പേർ തിങ്ങിപ്പാർക്കുന്ന പ്രദേശത്തിന് നടുക്കാണ് ഇരുമ്പുരുക്ക്ഫാക്ടറികൾ. വോട്ടുചോദിച്ച് സ്ഥാനാർത്ഥികളെത്തുമ്പോൾ പ്രതിഷേധം കടുപ്പിക്കാനാണ് നാട്ടുകാരുടെ തീരുമാനം.