അഞ്ചുവർഷം ബിജെപി അനീതി നടത്തി; അടുത്ത അഞ്ചു വർഷം ഞങ്ങൾ നീതി നടപ്പാക്കാൻ ആ​ഗ്രഹിക്കുന്നു; രാഹുൽ ​ഗാന്ധി

കോൺ​ഗ്രസ് അധികാരത്തിൽ വന്നാൽ ദാരിദ്ര്യത്തിനെതിരെ സർജിക്കൽ സ്ട്രൈക്ക് നടത്തുമെന്നും ഒരു വർഷം ഇരുപത്തി രണ്ട് ലക്ഷം പേർക്ക് സർക്കാർ ജോലി നൽകുമെന്നും രാഹുൽ ​ഗാന്ധി വാ​ഗ്ദാനം ചെയ്തു.

ജയ്പൂർ: കഴിഞ്ഞ അഞ്ചു വർഷം കൊണ്ട് ബിജെപി സർക്കാർ രാജ്യത്ത് അനീതിയാണ് നടപ്പാക്കിയതെന്നും അടുത്ത അഞ്ചു വർഷം കൊണ്ട് ആ പ്രവണത മറികടന്ന് രാജ്യത്ത് നീതി നടപ്പാക്കാൻ ആ​ഗ്രഹിക്കുന്നുവെന്നും കോൺ​ഗ്രസ് അധ്യക്ഷൻ രാഹുൽ ​ഗാന്ധി. രാജസ്ഥാനിലെ ആദിവാസി ഭൂരിപക്ഷ മണ്ഡലമായ ബെനേശ്വർ ധാമിൽ സംഘടിപ്പിച്ച തെരഞ്ഞെടുപ്പ് പ്രചാരണ റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

'കഴിഞ്ഞ അഞ്ച് വർഷം കൊണ്ട് ഗോത്ര വിഭാ​ഗം, ദരിദ്രർ, ദുർബല വിഭാഗങ്ങൾ എന്നിവരോട് മോദി അനീതിയാണ് പ്രവർത്തിച്ചത്. അധികാരത്തിൽ ഏറുന്നതിന് മുമ്പ് നൽകിയ വാ​ഗ്ദാനങ്ങൾ ഒന്നും തന്നെ നടപ്പാക്കിയില്ല. മോദിയുടെ കീഴിലുള്ള സർക്കാർ സമ്പന്നരായ പതിനഞ്ച് പേർക്ക് വേണ്ടി മാത്രമാണ് ഭരിച്ചത്'- രാഹുൽ പറഞ്ഞു. മോദി സർക്കാർ കഴിഞ്ഞ അ‍ഞ്ചു വർഷത്തിനിടയിൽ നിങ്ങളിൽ നിന്നും തട്ടിയെടുത്ത, ജനങ്ങൾക്ക് അവകാശപ്പെട്ട കാര്യങ്ങൾ അവയിൽ നിന്നും ഉപരിയായി ‍തങ്ങൾ തിരിച്ചു നൽകുമെന്നും രാഹുൽ കൂട്ടിച്ചേർത്തു.

കോൺ​ഗ്രസ് അധികാരത്തിൽ വന്നാൽ ദാരിദ്ര്യത്തിനെതിരെ സർജിക്കൽ സ്ട്രൈക്ക് നടത്തുമെന്നും ഒരു വർഷം ഇരുപത്തി രണ്ട് ലക്ഷം പേർക്ക് സർക്കാർ ജോലി നൽകുമെന്നും രാഹുൽ ​ഗാന്ധി വാ​ഗ്ദാനം ചെയ്തു.