ഡിസിസി അധ്യക്ഷ സ്ഥാനം കിട്ടാതെ പ്രചാരണത്തിന് ഇറങ്ങില്ലെന്ന് കോഴിക്കോട്ടെ ഐ ഗ്രൂപ്പ് നേതാക്കള്
Synopsis
രമേശ് ചെന്നിത്തലയ്ക്ക് നട്ടെല്ലിലാത്തത് കൊണ്ടാണ് ഐ ഗ്രൂപ്പിന്റെ കൈയിലുള്ള സീറ്റ് നഷ്ടമായതെന്ന് മുന് ഡിസിസി പ്രസിഡന്റ് വി.ബീരാന്കുട്ടി തുറന്നടിച്ചു.
കോഴിക്കോട്: വയനാട് സീറ്റ് എ ഗ്രൂപ്പിന് നല്കിയതില് പ്രതിഷേധവുമായി ഐ ഗ്രൂപ്പ് . കോഴിക്കോട് ജില്ലാ കോണ്ഗ്രസ് അധ്യക്ഷ സ്ഥാനം ഐ ഗ്രൂപ്പിന് നല്കിയില്ലെങ്കില് തെരഞ്ഞെടുപ്പ് പ്രചാരണത്തില് നിന്ന് വിട്ടു നില്ക്കാനാണ് കോഴിക്കോട് ചേര്ന്ന ഐ ഗ്രൂപ്പ് നേതാക്കളുടെ രഹസ്യയോഗത്തിലുണ്ടായ തീരുമാനം.
കാലങ്ങളായി കൈയിലിരുന്ന വയനാട് എ ഗ്രൂപ്പ് കൊണ്ടുപോയതില് ഐ ഗ്രൂപ്പിലെ രണ്ടാംനിര നേതാക്കളില് അമര്ഷം പുകയുകയാണ്. സ്ഥാനാര്ത്ഥിയായ ടി സിദ്ദിഖിനോടുള്ള എതിര്പ്പും കോഴിക്കോട്ടെ ഐ ഗ്രൂപ്പില് ശക്തമാണ്. നേതൃത്വത്തെ അതൃപ്തി അറിയിക്കുന്നതിന്റെ ഭാഗമായാണ് ഐ ഗ്രൂപ്പ് നേതാവും കെപിസിസി ജനറല് സെക്രട്ടറിയുമായ എന് സുബ്രഹ്മ്യണ്യന്റെ നേതൃത്വത്തില് യോഗം ചേര്ന്നത്. യോഗത്തിലറിയിച്ച നിലപാട് മാധ്യമങ്ങള്ക്ക് മുന്നിലും നേതാക്കള് മറച്ച് വച്ചില്ല.
കോഴിക്കോട് ഡിസിസി അധ്യക്ഷ പദവിക്കും ഐ ഗ്രൂപ്പ് അവകാശമുന്നയിച്ചു. പതിനൊന്ന് വര്ഷമായി ഡിസിസി അധ്യക്ഷ പദവി എ ഗ്രൂപ്പിന്റെ കൈയിലാണ് . വയനാട്ടില് മത്സരിക്കുന്ന സിദ്ദിഖ് പദവി രാജി വയ്ക്കണമെന്ന് ഐ ഗ്രൂപ്പ് ആവശ്യപ്പെട്ടു. നേതൃത്വത്തിന്റെ പ്രതികരണം അനുകൂലമല്ലെങ്കില് വയനാട്, കോഴിക്കോട്, വടകര മണ്ഡലങ്ങളിലെ പ്രചാരണത്തില് നിന്ന് വിട്ട് നില്ക്കാനാണ് ഐ ഗ്രൂപ്പിന്റെ തീരുമാനം. സ്ഥാനാര്ത്ഥികളായ കെ മുരളീധരനും, ടി സിദ്ദിഖും ഇന്ന് ജില്ല ആസ്ഥാനത്തെത്തിയിട്ടും ഐ ഗ്രൂപ്പ് നേതാക്കള് കാണാന് പോലും കൂട്ടാക്കിയില്ല.