'സ്വന്തം താടി താങ്ങാനാവാത്തവർ അങ്ങാടി താങ്ങുന്നതെങ്ങനെ?' കേരള കോണ്‍ഗ്രസിനെ പരിഹസിച്ച് വിഎന്‍ വാസവന്‍

പി ജെ ജോസഫ് യുഡിഎഫ് വിട്ട് വന്നാൽ എന്ത് ചെയ്യണമെന്ന് മുന്നണിയാണ് തീരുമാനിക്കുകയെന്നും വാസവന്‍ പറഞ്ഞു. 

കോട്ടയം: കേരള കോൺഗ്രസിലെ തർക്കങ്ങൾ ഇടത് മുന്നണിക്ക് ഗുണമാകുമെന്ന് കോട്ടയത്തെ ഇടതുമുന്നണി സ്ഥാനാർത്ഥി വി എൻ വാസവൻ. സ്വന്തം പാർട്ടിക്കകത്ത് കെട്ടുറുപ്പില്ലാത്തവർ നാടിന്റെ പ്രശ്നം എങ്ങനെ പരിഹരിക്കുമെന്നും സ്വന്തം താടി താങ്ങാൻ കഴിയാത്തവർ അങ്ങാടി താങ്ങുന്നതെങ്ങനെയെന്നും അദ്ദേഹം ചോദിച്ചു. പി ജെ ജോസഫ് യുഡിഎഫ് വിട്ട് വന്നാൽ എന്ത് ചെയ്യണമെന്ന് മുന്നണിയാണ് തീരുമാനിക്കുകയെന്നും വാസവന്‍ പറഞ്ഞു. 

അതേസമയം കോട്ടയം മണ്ഡലത്തില്‍ കേരള കോണ്‍ഗ്രസ് പ്രചാരണം ആരംഭിച്ചതായി സ്ഥാനാര്‍ത്ഥി തോമസ് ചാഴിക്കാടന്‍ പറഞ്ഞു. പ്രധാനപ്പെട്ട വ്യക്തികളെയും നേതാക്കളെയും നേരിലും ഫോണിലും ബന്ധപ്പെട്ടുകൊണ്ടിരിക്കുകയാണെന്ന് ചാഴിക്കാടന്‍ ഏഷ്യാനെറ്റ് ന്യൂസിനോട് പറഞ്ഞു

ഇന്നലെ രാത്രിയോടെയാണ് പി ജെ ജോസഫിനെ വെട്ടി കോട്ടയത്ത് തോമസ് ചാഴിക്കാടനെ സ്ഥാനാര്‍ത്ഥിയായി മാണി പ്രഖ്യാപിച്ചത്. ഇതിന് പിന്നാലെ കടുത്ത അമര്‍ഷം രേഖപ്പെടുത്തി പി ജെ ജോസഫ് രംഗത്തെത്തുകയും ചെയ്തിരുന്നു. തനിക്ക് കോട്ടയത്ത് മത്സരിക്കാന്‍ താത്പര്യമുണ്ടെന്ന് ജോസഫ് വ്യക്തമാക്കിയിട്ടും മണ്ഡലത്തില്‍ മറ്റൊരാളെ പ്രഖ്യാപിക്കുകയായിരുന്നു മാണി.