ലോകത്ത് ഏറ്റവും കുറഞ്ഞ വിലയില്‍ പെട്രോള്‍ ലഭിക്കുന്ന 10 രാജ്യങ്ങള്‍; ഈ രാജ്യത്ത് ലീറ്ററിന് വെറും 2.21 രൂപ!
Synopsis
ഇന്ത്യയിൽ പെട്രോൾ വില നൂറ് കടക്കുമ്പോൾ, ലോകത്തെ ചില രാജ്യങ്ങളിൽ ഒരു ലിറ്റർ പെട്രോളിന് നാല് രൂപയിൽ താഴെയാണ് വില. എണ്ണ ശേഖരവും സർക്കാർ സബ്‌സിഡിയുമാണ് ലിബിയ, ഇറാൻ തുടങ്ങിയ രാജ്യങ്ങളിൽ ഇന്ധനവില കുറച്ചുനിർത്താൻ സഹായിക്കുന്നത്. സ്വാതന്ത്ര്യാനന്തര ഇന്ത്യയിലെ ഇന്ധനവിലയുടെ ചരിത്രവും ഈ ലേഖനത്തിൽ പരിശോധിക്കുന്നു.
രാജ്യത്ത് ഇന്ധന വില കൂട്ടുമെന്ന അഭ്യൂഹം നിലനില്‍ക്കെ ലോകത്തെ ചില രാജ്യങ്ങളില്‍ നാല് രൂപയില്‍ താഴെയാണ് ഒരു ലീറ്റര്‍ പെട്രോളിന്റെ വിലയെന്ന് നിങ്ങൾക്കറിയാമോ? എണ്ണ ശേഖരം, സര്‍ക്കാര്‍ സബ്‌സിഡി, ഇന്ധനവില നിയന്ത്രണം തുടങ്ങിയ ഘടകങ്ങളാണ് ഈ രാജ്യങ്ങളില്‍ പെട്രോള്‍ വില കുറച്ചുനിര്‍ത്താന്‍ സഹായിക്കുന്നത്. ലോകത്ത് ഏറ്റവും കുറഞ്ഞ വിലയില്‍ പെട്രോള്‍ ലഭിക്കുന്ന 10 രാജ്യങ്ങള്‍ ഏതൊക്കെയാണെന്ന് നോക്കാം.
സ്വാതന്ത്ര്യാനന്തര ഇന്ത്യയില്‍ പെട്രോള്‍ വില 25 പൈസ!
1947ല്‍ ഇന്ത്യയ്ക്ക് സ്വാതന്ത്ര്യം ലഭിച്ച സമയത്ത് ഒരു ലിറ്റര്‍ പെട്രോളിന്റെ വില വെറും 25 പൈസയായിരുന്നു. 1970കള്‍ വരെയും പെട്രോള്‍ വില രണ്ട് രൂപയില്‍ താഴെയായിരുന്നു. 2000ത്തിന്റെ തുടക്കത്തില്‍ ലിറ്ററിന് 26 രൂപയായിരുന്നു വില. 2004ല്‍ ഇത് 34 രൂപ മുതല്‍ 36.81 രൂപ വരെയായി.
2008ല്‍ ആഗോള സാമ്പത്തിക മാന്ദ്യത്തിന്റെ കാലത്ത് പെട്രോള്‍ വില ഏകദേശം ഇരട്ടിയായി ലിറ്ററിന് 51 രൂപയിലെത്തി. അന്ന് രാജ്യാന്തര വിപണിയില്‍ ക്രൂഡ് ഓയില്‍ വില ബാരലിന് 145 ഡോളര്‍ എന്ന ഉയര്‍ന്ന നിലയിലായിരുന്നു. ഇന്ന് ന്യൂഡല്‍ഹിയില്‍ ഒരു ലിറ്റര്‍ പെട്രോളിന് 102.12 രൂപയും മുംബൈയില്‍ 111.21 രൂപ റെയ്ഞ്ചിലുമാണ് വില.
ലോകത്ത് ഏറ്റവും കുറഞ്ഞ വിലയില്‍ പെട്രോള്‍ ലഭിക്കുന്ന 10 രാജ്യങ്ങള്‍
1. ലിബിയ - ലിറ്ററിന് 2.21 രൂപ
ലോകത്ത് ഏറ്റവും കുറഞ്ഞ വിലയില്‍ പെട്രോള്‍ ലഭിക്കുന്ന രാജ്യങ്ങളിലൊന്നാണ് ലിബിയ. രാജ്യത്തെ വന്‍ എണ്ണശേഖരവും സര്‍ക്കാര്‍ നല്‍കുന്ന സബ്‌സിഡിയുമാണ് കുറഞ്ഞ വിലയ്ക്ക് പ്രധാന കാരണം.
2. ഇറാന്‍ - ലിറ്ററിന് 2.71 രൂപ
വന്‍തോതിലുള്ള സര്‍ക്കാര്‍ സബ്‌സിഡിയും രാജ്യത്തിനുള്ളിലെ എണ്ണ ഉല്‍പാദനവുമാണ് ഇറാനില്‍ പെട്രോള്‍ വില കുറച്ചുനിര്‍ത്തുന്നത്. കുറഞ്ഞ വിലയില്‍ ഇന്ധനം ലഭിക്കുന്നതിനാല്‍ ഉപയോഗവും കൂടുതലാണ്. ഇത് സര്‍ക്കാരിന്റെ സാമ്പത്തിക ബാധ്യത വര്‍ധിപ്പിക്കുന്നുണ്ട്.
3. വെനസ്വേല - ലിറ്ററിന് 3.32 രൂപ
വെനസ്വേല എണ്ണസമ്പത്ത് ഉപയോഗിച്ചും സര്‍ക്കാര്‍ സബ്‌സിഡി നല്‍കിയും പെട്രോള്‍ വില വളരെ താഴ്ന്ന നിലയില്‍ നിലനിര്‍ത്തുന്നു. എന്നാല്‍ സാമ്പത്തിക പ്രതിസന്ധി, എണ്ണശുദ്ധീകരണശാലകളിലെ പ്രശ്‌നങ്ങള്‍, ഇന്ധനക്ഷാമം എന്നിവ കാരണം പലപ്പോഴും പെട്രോള്‍ ലഭ്യമാക്കുന്നത് പ്രയാസകരമാകാറുണ്ട്.
4. അംഗോള - ലിറ്ററിന് 31 രൂപ
ആഫ്രിക്കയിലെ പ്രധാന എണ്ണ ഉല്‍പാദക രാജ്യങ്ങളിലൊന്നാണ് അംഗോള. സര്‍ക്കാര്‍ സഹായം ഇന്ധനവില കുറച്ചുനിര്‍ത്താന്‍ സഹായിച്ചിട്ടുണ്ട്. എന്നാല്‍ പൊതുധനകാര്യങ്ങളിലെ സാമ്പത്തിക ചെലവ് കുറയ്ക്കുന്നതിനായി സര്‍ക്കാര്‍ ഇന്ധന സബ്‌സിഡികള്‍ ഘട്ടംഘട്ടമായി കുറച്ചുവരികയാണ്.
5. കുവൈത്ത് - ലിറ്ററിന് 32 രൂപ
വന്‍ എണ്ണശേഖരവും കുറഞ്ഞ ഉല്‍പാദനച്ചെലവും കുവൈത്തില്‍ പെട്രോള്‍ വില കുറയ്ക്കാന്‍ സഹായിക്കുന്നു. സര്‍ക്കാര്‍ നിയന്ത്രിക്കുന്ന വിലനിര്‍ണയ സംവിധാനവും ആഗോള ക്രൂഡ് ഓയില്‍ വിലയിലെ ഏറ്റക്കുറച്ചിലുകളില്‍നിന്ന് ഉപഭോക്താക്കള്‍ക്ക് ഒരു പരിധിവരെ സംരക്ഷണം നല്‍കുന്നു.
6. അള്‍ജീരിയ - ലിറ്ററിന് 33 രൂപ
എണ്ണയുടെയും പ്രകൃതിവാതകത്തിന്റെയും വലിയ ശേഖരമാണ് അള്‍ജീരിയയുടെ നേട്ടം. ഇതുവഴി താരതമ്യേന കുറഞ്ഞ വിലയില്‍ പെട്രോള്‍ ലഭ്യമാക്കാന്‍ രാജ്യത്തിന് കഴിയുന്നു.
7. തുര്‍ക്ക്‌മെനിസ്ഥാന്‍ - ലിറ്ററിന് 40 രൂപ
രാജ്യത്തെ വാഹന ഇന്ധന വിപണിയുടെ ആവശ്യകത നിറവേറ്റാന്‍ ആവശ്യമായ ഇന്ധനം തുര്‍ക്ക്‌മെനിസ്ഥാനിലെ എണ്ണശുദ്ധീകരണശാലകള്‍ പൂര്‍ണമായി ഉല്‍പാദിപ്പിക്കുന്നുണ്ട്. രാജ്യത്തിന്റെ ഊര്‍ജസമ്പത്തും സര്‍ക്കാര്‍ നിയന്ത്രിത സമ്പദ്വ്യവസ്ഥയും ആഭ്യന്തര പെട്രോള്‍ വില കുറച്ചുനിര്‍ത്താന്‍ സഹായിക്കുന്നു.
8. ഈജിപ്ത് - ലീറ്ററിന് 43 രൂപ
ഉപഭോക്താക്കള്‍ക്ക് താങ്ങാനാകുന്ന വിലയില്‍ പെട്രോള്‍ ലഭ്യമാക്കാന്‍ ഈജിപ്ത് സബ്‌സിഡികള്‍ നല്‍കുന്നു. എന്നാല്‍ സമീപ വര്‍ഷങ്ങളില്‍ സമ്പദ്വ്യവസ്ഥയില്‍ പരിഷ്‌കാരങ്ങള്‍ നടപ്പാക്കുന്നതിന്റെ ഭാഗമായി സര്‍ക്കാര്‍ ഇന്ധനവില വര്‍ധിപ്പിച്ചുവരികയാണ്.
9. ഖത്തര്‍ - ലീറ്ററിന് 54 രൂപ
വന്‍തോതിലുള്ള ഊര്‍ജസമ്പത്തും താരതമ്യേന ചെറിയ ജനസംഖ്യയുമാണ് അയല്‍രാജ്യങ്ങളെ അപേക്ഷിച്ച് ഖത്തറില്‍ പെട്രോള്‍ വില കുറവായിരിക്കാന്‍ സഹായിക്കുന്ന ഘടകങ്ങള്‍. ആധുനിക ഊര്‍ജ അടിസ്ഥാനസൗകര്യങ്ങളും സര്‍ക്കാര്‍ നിയന്ത്രിത വിലനിര്‍ണയ സംവിധാനവും ഇന്ധനച്ചെലവ് കുറച്ചുനിര്‍ത്താന്‍ സഹായിക്കുന്നു.
10. ബൊളീവിയ - ലീറ്ററിന് 56 രൂപ
തെക്കേ അമേരിക്കന്‍ രാജ്യമായ ബൊളീവിയയിലും സര്‍ക്കാര്‍ സബ്‌സിഡികളിലൂടെയാണ് പെട്രോള്‍ വില കുറച്ചുനിര്‍ത്തുന്നത്. വിലക്കയറ്റത്തില്‍നിന്ന് കുടുംബങ്ങള്‍ക്ക് സംരക്ഷണം നല്‍കുക എന്ന ലക്ഷ്യത്തോടെയാണ് ഈ സബ്‌സിഡികള്‍ നടപ്പാക്കുന്നത്.