അരിയും പരിപ്പും പഞ്ചസാരയും തൊട്ടാൽ കൈ പൊള്ളും! സംസ്ഥാനത്ത് നിത്യോപയോഗ സാധനങ്ങൾക്ക് വൻ വിലക്കയറ്റം

സംസ്ഥാനത്ത് അരി, പലവ്യഞ്ജനം തുടങ്ങിയ നിത്യോപയോഗ സാധനങ്ങളുടെ വില കുതിച്ചുയരുന്നു. കാലാവസ്ഥാ വ്യതിയാനങ്ങളും പശ്ചിമേഷ്യൻ സംഘർഷവുമാണ് വിലക്കയറ്റത്തിന് പ്രധാന കാരണം. സർക്കാർ ഇടപെടൽ ഉണ്ടായില്ലെങ്കിൽ സാധാരണക്കാരുടെ ജീവിതം കൂടുതൽ ദുഷ്കരമാകും.

സാധാരണക്കാരന് തിരിച്ചടിയായി സംസ്ഥാനത്ത് അരി, പലവ്യഞ്ജനം പോലുള്ള നിത്യോപയോഗ സാധനങ്ങളുടെ വില കൂടുന്നു. മൊത്ത വിപണിയിൽ പൊന്നി അരിക്ക് ഒരു മാസത്തിനിടെ 14 രൂപയാണ് കൂടിയത്. തുവരപ്പരിപ്പിന് ഒരു മാസത്തിനിടെ 20 രൂപ കൂടി. കടല, ഉഴുന്ന്, വൻപയർ, പഞ്ചസാര തുടങ്ങിയവയ്ക്കും വില കൂടുകയാണ്. പശ്ചിമേഷ്യന്‍ സംഘർഷം വിവിധ മേഖലകളില്‍ സൃഷ്ടിക്കുന്ന ആഘാതങ്ങള്‍ക്ക് പുറമേയാണ് മലയാളിയുടെ നിത്യജീവിതത്തിന് തിരിച്ചടിയായി അരി, പലവ്യഞ്ജനം പോലുള്ള അത്യാവശ്യ സാധനങ്ങള്‍ക്കുള്ള വില വര്‍ധന.

മഹാരാഷ്ട്ര, ആന്ധ്ര, കര്‍ണ്ണാടക പോലുള്ള ഉല്‍പാദക സംസ്ഥാനങ്ങളിലെ കാര്‍ഷിക മേഖലയില്‍ എൽനിനോയും മറ്റ് കാലാവസ്ഥാ മാറ്റങ്ങളും സൃഷ്ടിച്ച പ്രതിസന്ധിയാണ് വിലക്കയറ്റത്തിന്റെ പ്രധാന കാരണം.വടക്കൻ കേരളത്തിലെ തന്നെ ഏറ്റവും പ്രധാനപ്പെട്ട മൊത്തവിതരണ കേന്ദ്രമായ വലിയങ്ങാടിയിലെ വില നിലവാരം ഒന്ന് പരിശോധിക്കാം.

മൊത്തവിപണിയില്‍ ഒരു കിലോ പൊന്നി അരിയുടെ വില 73 ആയി. ഓണക്കാലത്ത് 58 ആയിരുന്നു വില. കുറുവ അരിയിലെ വിവിധ ഇനങ്ങൾക്ക് ഓണത്തിന് ശേഷം മൂന്ന് രൂപ കൂടി. കഴിഞ്ഞ ജൂലായ് മുതല്‍ പിടിവിട്ട് കുതിക്കുകയാണ് ബിരിയാണിക്കുള്ള കൈമ അരിയുടെ വില. ഇടക്കാലത്ത് ഒന്ന് കുറഞ്ഞെങ്കിലും ഇപ്പോള്‍ 180 ആയി ഉയരുന്നു. കോല അരിക്കും വില കൂടിയിട്ടുണ്ട്.

പലവ്യഞ്ജനങ്ങള്‍ക്കും വില കൂടുകയാണ്. മൊത്തവിപണിയില്‍ തുവരപ്പരിപ്പിന് ഒരുമാസത്തിനിടെ കിലോയ്ക്ക് 20 രൂപ കൂടി. കടലയ്ക്ക് പത്ത് രൂപയാണ് വര്‍ധന. ഉഴുന്നിന് എട്ട് രൂപയും വൻപയറിന് 14 രൂപയും കൂടി. ചെറുപയറിനും വര്‍ധനയുണ്ട്. അടുത്ത മാസങ്ങളിലും വില കുറഞ്ഞേക്കില്ല എന്നാണ് ഇതര സംസ്ഥാനങ്ങളിലെ വിപണികൾ നൽകുന്ന സൂചന. സര്‍ക്കാര്‍ നടത്തിയ ചില ഇടപെടലുകള്‍ ഓണക്കാലത്ത് വിലക്കയറ്റം രൂക്ഷമാകാതിരിക്കാന്‍ സഹായിച്ചിരുന്നു. അത്തരത്തിലുള്ള ശ്രമങ്ങള്‍ വരും ദിവസങ്ങളിൽ നടത്തിയില്ലെങ്കില്‍ സാധാരണക്കാരന്റെ അടുക്കള ബജറ്റ് കൂടുതല്‍ താളം തെറ്റാനാണ് സാധ്യത.