അപ്പോ ഈ പണം സമ്പാദിച്ചു വയ്ക്കലിൽ ഒന്നും കാര്യമില്ലേ? എലോൺ മസ്‌കിന്റെ പ്രവചനം; 'ലോകത്ത് സമൃദ്ധിയുടെ പുതുയുഗം എഐ സൃഷ്‍ടിക്കും'

ആർട്ടിഫിഷ്യൽ ഇന്റലിജൻസും റോബോട്ടുകളും ഭാവിയിൽ സമാനതകളില്ലാത്ത സമൃദ്ധി സൃഷ്ടിക്കുമെന്നും ഉപജീവനത്തിനായി ജോലി ചെയ്യേണ്ട സാഹചര്യം ഇല്ലാതാകുമെന്നും എലോൺ മസ്ക് പ്രവചിക്കുന്നു. ഇതിനാൽ വിദൂര ഭാവിയിലേക്ക് പണം സമ്പാദിച്ചു വെക്കുന്നതിൽ വലിയ അർത്ഥമില്ലെന്നാണ് അദ്ദേഹത്തിന്റെ അഭിപ്രായം.

ഭാവിയിലേക്ക് പണം സമ്പാദിച്ചു വെക്കുന്നതിന് വലിയ അർത്ഥമില്ലെന്ന് ടെസ്‌ല, സ്‌പേസ് എക്‌സ് മേധാവി എലോൺ മസ്‌ക്. ആർട്ടിഫിഷ്യൽ ഇന്റലിജൻസും മനുഷ്യസമാന റോബോട്ടുകളും ലോകത്ത് സമാനതകളില്ലാത്ത സമൃദ്ധി സൃഷ്ടിക്കുമെന്നും ഭാവിയിൽ മനുഷ്യർക്ക് ഉപജീവനത്തിനായി ജോലി ചെയ്യേണ്ട സാഹചര്യം ഇല്ലാതാകുമെന്നും മസ്‌ക് പ്രവചിക്കുന്നു.

സമ്പാദ്യത്തിന് പ്രസക്തിയില്ലാത്ത കാലം വരുമോ?

സൂപ്പർ ഇന്റലിജന്റ് ആർട്ടിഫിഷ്യൽ ഇന്റലിജൻസിന്റെ വരവോടെ വിദൂര ഭാവിയിലേക്കായി പണം സമ്പാദിച്ചുവെക്കുന്നതിൽ അർത്ഥമില്ലെന്നാണ് മസ്‌കിന്റെ പ്രതികരണം. സോഷ്യൽ മീഡിയ പ്ലാറ്റ്ഫോമായ എക്‌സിലൂടെയായിരുന്നു അദ്ദേഹത്തിന്റെ പ്രതികരണം. ഭാവിയിൽ സമൃദ്ധിയുണ്ടാകുമെന്ന പ്രതീക്ഷയിൽ ഇന്നത്തെ ചില സാമ്പത്തിക തീരുമാനങ്ങളെ ന്യായീകരിച്ചുകൊണ്ടുള്ള ഒരു ഉപയോക്താവിന്റെ പോസ്റ്റിന് മറുപടിയായാണ് മസ്‌ക് ഇക്കാര്യം കുറിച്ചത്. പണത്തിന്റെ കാര്യത്തിൽ പൂർണമായും അശ്രദ്ധ കാണിക്കരുതെങ്കിലും ഇന്നത്തെ പല സാമ്പത്തിക തീരുമാനങ്ങളും ഏതാനും വർഷങ്ങൾക്കുള്ളിൽ അപ്രസക്തമായേക്കാമെന്നായിരുന്നു ഉപയോക്താവിന്റെ നിരീക്ഷണം. ഇതിന് മറുപടിയായാണ് വിദൂര ഭാവിയിലേക്കുള്ള സമ്പാദ്യത്തിന് പ്രസക്തിയില്ലെന്ന് മസ്‌ക് അഭിപ്രായപ്പെട്ടത്.

2036 ആകുമ്പോഴേക്കും പണത്തിന്റെ പ്രാധാന്യം കുറയും

അതേസമയം ഇതാദ്യമായല്ല മസ്‌ക് ഇത്തരമൊരു പ്രവചനം നടത്തുന്നത്. ആർട്ടിഫിഷ്യൽ ഇന്റലിജൻസും റോബോട്ടുകളും ആഗോള സമ്പദ്‌വ്യവസ്ഥയിൽ വിപ്ലവകരമായ മാറ്റങ്ങൾ ഉണ്ടാക്കുമെന്നാണ് അദ്ദേഹത്തിന്റെ വിലയിരുത്തൽ. 2026 ജൂലൈയിൽ 'ദി ഇക്കണോമിസ്റ്റി'ന് നൽകിയ അഭിമുഖത്തിൽ 2036 ആകുമ്പോഴേക്കും പണത്തിന്റെ പ്രാധാന്യം ഇല്ലാതായേക്കാമെന്നും അദ്ദേഹം പറഞ്ഞിരുന്നു. അടുത്ത അഞ്ച് വർഷത്തിനുള്ളിൽ ആർട്ടിഫിഷ്യൽ ഇന്റലിജൻസ് മനുഷ്യരാശിയുടെ ആകെ ബുദ്ധിശക്തിയെ മറികടന്നേക്കാമെന്നും മസ്‌ക് പ്രവചിക്കുന്നു. സാങ്കേതികവിദ്യയുടെ വളർച്ചയോടെ മനുഷ്യർക്ക് ആവശ്യമായ സാധനങ്ങളും സേവനങ്ങളും ആവശ്യത്തിലധികം ഉൽപ്പാദിപ്പിക്കാൻ കഴിയുമെന്നാണ് അദ്ദേഹത്തിന്റെ പ്രതീക്ഷ.

ജോലി ചെയ്യുന്നത് നിർബന്ധമല്ലാതാകും

ഭക്ഷണം, പാർപ്പിടം, ഗതാഗതം, വിനോദം തുടങ്ങിയ അടിസ്ഥാന ആവശ്യങ്ങൾ റോബോട്ടുകളുടെയും ആർട്ടിഫിഷ്യൽ ഇന്റലിജൻസിന്റെയും സഹായത്തോടെ എളുപ്പത്തിൽ ലഭ്യമാകുന്ന സാഹചര്യമുണ്ടാകുമെന്നാണ് മസ്‌കിന്റെ കണക്കുകൂട്ടൽ. ഇതോടെ ലോകം 'അത്ഭുതകരമായ സമൃദ്ധിയുടെ യുഗത്തിലേക്ക്' കടക്കുമെന്നും അദ്ദേഹം പറയുന്നു.

ഇത്തരം സാഹചര്യത്തിൽ ഉപജീവനത്തിനായി നിർബന്ധമായും ജോലി ചെയ്യേണ്ടിവരില്ല. മറിച്ച്, താൽപ്പര്യമുള്ളവർക്ക് മാത്രം ജോലി ചെയ്യാനുള്ള സാഹചര്യമുണ്ടാകും. ഓട്ടോമേഷൻ വ്യാപകമാകുന്നതോടെ ജനങ്ങൾക്ക് വരുമാനം ഉറപ്പാക്കാൻ സർക്കാരുകൾ പുതിയ സംവിധാനങ്ങൾ ഏർപ്പെടുത്തേണ്ടിവരുമെന്നും മസ്‌ക് നേരത്തെ സൂചിപ്പിച്ചിട്ടുണ്ട്.

പ്രവചനം യാഥാർഥ്യമാകുമോ?

അതേസമയം, മസ്‌ക് പ്രതീക്ഷിക്കുന്ന ഈ മാറ്റങ്ങൾ യാഥാർഥ്യമാകുമോ എന്ന കാര്യത്തിൽ വ്യക്തതയില്ല. ആഗോള രാഷ്ട്രീയ, സാമ്പത്തിക സാഹചര്യങ്ങൾ ഇത്തരം മാറ്റങ്ങൾക്ക് തടസ്സമാകാമെന്നും അദ്ദേഹം അംഗീകരിക്കുന്നുണ്ട്. ആർട്ടിഫിഷ്യൽ ഇന്റലിജൻസിന്റെ വളർച്ച മനുഷ്യജീവിതത്തെയും സമ്പദ്‌വ്യവസ്ഥയെയും എത്രത്തോളം മാറ്റിമറിക്കുമെന്നത് വരും വർഷങ്ങളിൽ മാത്രമേ വ്യക്തമാകൂ.