'അങ്ങനെ തോന്നിയതുപോലെ കൂട്ടണ്ട; വിമാന ടിക്കറ്റ് നിരക്കിൽ നടപടി വേണം'; കേന്ദ്രത്തിന് സുപ്രീം കോടതിയുടെ നിർദേശം

സ്വകാര്യ വിമാനക്കമ്പനികളുടെ അമിത ടിക്കറ്റ് നിരക്ക് നിയന്ത്രിക്കാനുള്ള അന്തിമ മാനദണ്ഡങ്ങൾ നവംബർ 16-നകം സമർപ്പിക്കാൻ കേന്ദ്ര സർക്കാരിന് നിർദ്ദേശം നൽകി സുപ്രീം കോടതി. പുതിയ നിയമങ്ങൾ പ്രാബല്യത്തിൽ വരുന്നതോടെ ഉത്സവ സീസണുകളിലെ അമിത നിരക്ക് ഈടാക്കലിന് ശാശ്വത പരിഹാരമാകുമെന്നാണ് പ്രതീക്ഷിക്കുന്നത്.

ദില്ലി: സ്വകാര്യ വിമാനക്കമ്പനികൾ ഈടാക്കുന്ന അമിത ടിക്കറ്റ് നിരക്കുകൾ നിയന്ത്രിക്കുന്നതിനുള്ള അന്തിമ മാനദണ്ഡങ്ങൾ നവംബർ 16-നകം സമർപ്പിക്കാൻ കേന്ദ്ര സർക്കാരിന് നിർദ്ദേശം നൽകി സുപ്രീം കോടതി. ടിക്കറ്റ് നിരക്കുകളിലെ വലിയ വ്യതിയാനങ്ങളും വിമാനക്കമ്പനികളുടെ അനിയന്ത്രിതമായ നിരക്ക് വർദ്ധനവും ചോദ്യം ചെയ്തുള്ള പൊതുതാൽപ്പര്യ ഹർജി പരിഗണിക്കവേയാണ് സുപ്രീം കോടതിയുടെ ഈ നിർണായക ഉത്തരവ്.

മാനദണ്ഡങ്ങൾക്ക് കേന്ദ്ര സർക്കാരിന്റെ അംഗീകാരം ലഭിച്ചിട്ടുണ്ടെന്നും രണ്ടാഴ്ചയ്ക്കുള്ളിൽ ഇവ ഔദ്യോഗികമായി പ്രസിദ്ധീകരിക്കുമെന്നും സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. അടുത്ത വാദം കേൾക്കുന്ന നവംബർ 16-ന് മുമ്പായി അന്തിമ ചട്ടങ്ങൾ കോടതിക്ക് മുന്നിൽ ഹാജരാക്കണം.

കർശന നിലപാടുമായി സുപ്രീം കോടതി

നേരത്തെ ഓഗസ്റ്റിൽ നടന്ന വാദത്തിനിടെ, സർക്കാർ നിർദ്ദേശിക്കുന്ന നിരക്ക് മാനദണ്ഡങ്ങൾ പാലിക്കാത്ത വിമാനക്കമ്പനികളുടെ സർവീസുകൾ തടയുന്ന കാര്യം പരിശോധിക്കാൻ സുപ്രീം കോടതി നിർദ്ദേശിച്ചിരുന്നു. വ്യോമയാന മന്ത്രാലയം വിമാനക്കമ്പനികൾക്ക് പലപ്പോഴും നിരക്ക് നിയന്ത്രണം സംബന്ധിച്ച് മാർഗ്ഗനിർദ്ദേശങ്ങൾ (Office Memorandums) നൽകിയിരുന്നുവെങ്കിലും കമ്പനികൾ ഇവയൊന്നും പാലിച്ചിരുന്നില്ലെന്ന് സർക്കാർ കോടതിയെ അറിയിച്ചിരുന്നു. സർക്കാരിന്റെ കരട് നിയമങ്ങൾ അടങ്ങിയ സീൽ ചെയ്ത കവർ കോടതി ഇതിനകം പരിശോധിച്ചിട്ടുണ്ട്.

പുതിയ അന്തിമ നിയമങ്ങൾ പ്രാബല്യത്തിൽ വരുന്നതോടെ ഉത്സവ സീസണുകളിലും അത്യാവശ്യ ഘട്ടങ്ങളിലും വിമാനക്കമ്പനികൾ നടത്തുന്ന അമിത നിരക്ക് ഈടാക്കലിന് ശാശ്വതമായ പരിഹാരമാകുമെന്നാണ് പ്രതീക്ഷിക്കുന്നത്.