ട്രെയിന്‍ യാത്രക്കാര്‍ക്ക് ആശ്വാസം; ഇനി സുരക്ഷിത ഭക്ഷണം കഴിക്കാം, പുതിയ നീക്കവുമായി ഐ ആര്‍ സി ടി സി
Synopsis
ട്രെയിനുകളിലും സ്റ്റേഷനുകളിലും വിതരണം ചെയ്യുന്ന ഭക്ഷണത്തിന്റെ ഗുണനിലവാരവും ശുചിത്വവും ഉറപ്പാക്കാൻ ഐ.ആർ.സി.ടി.സി പുതിയ കരാർ ഒപ്പുവെച്ചു. ക്വാളിറ്റി കൗൺസിൽ ഓഫ് ഇന്ത്യയുമായി ചേർന്നാണ് ആധുനിക സാങ്കേതികവിദ്യ ഉപയോഗിച്ചുള്ള പരിശോധനാ സംവിധാനം ഒരുക്കുന്നത്. എന്നാൽ പദ്ധതി എന്ന് മുതൽ പൂർണ്ണമായി നടപ്പിലാകുമെന്ന് ഔദ്യോഗികമായി വ്യക്തമാക്കിയിട്ടില്ല.
ട്രെയിനുകളിലും റെയില്‍വേ സ്റ്റേഷനുകളിലും വിതരണം ചെയ്യുന്ന ഭക്ഷണത്തിന്റെ ഗുണനിലവാരവും ശുചിത്വവും കൂടുതല്‍ സുതാര്യമാക്കാന്‍ പുതിയ നീക്കവുമായി ഇന്ത്യന്‍ റെയില്‍വേ കാറ്ററിങ് ആന്‍ഡ് ടൂറിസം കോര്‍പ്പറേഷന്‍ (ഐ.ആര്‍.സി.ടി.സി). ഇതിനായി ക്വാളിറ്റി കൗണ്‍സില്‍ ഓഫ് ഇന്ത്യയുമായി ഐ.ആര്‍.സി.ടി.സി കരാര്‍ ഒപ്പുവെച്ചു. കോടിക്കണക്കിന് വരുന്ന റെയില്‍വേ യാത്രക്കാരുടെ ഭക്ഷണം സുരക്ഷിതവും ആരോഗ്യകരവുമാക്കുകയാണ് പദ്ധതിയുടെ ലക്ഷ്യം. ട്രെയിനുകളിലെയും റെയില്‍വേ സ്റ്റേഷനുകളിലെയും കാറ്ററിങ് യൂണിറ്റുകള്‍ ഭക്ഷ്യസുരക്ഷാ നിയമങ്ങളും ശുചിത്വ മാനദണ്ഡങ്ങളും കര്‍ശനമായി പാലിക്കുന്നുണ്ടെന്ന് ഉറപ്പാക്കാന്‍ ആധുനിക സാങ്കേതികവിദ്യ ഉപയോഗിച്ചുള്ള പരിശോധനാ സംവിധാനമാണ് ഒരുക്കുന്നത്.
പരിശോധന എങ്ങനെയൊക്കെ?
ട്രെയിനുകളിലെ മൊബൈല്‍ കാറ്ററിങ് യൂണിറ്റുകളും റെയില്‍വേ സ്റ്റേഷനുകളിലെ സ്റ്റാറ്റിക് കാറ്ററിങ് യൂണിറ്റുകളും പരിശോധനയുടെ പരിധിയില്‍ വരും.
യാത്രക്കാര്‍ക്ക് ലഭിക്കുന്ന പ്രയോജനം: യാത്രയ്ക്കിടയിലോ സ്റ്റേഷനുകളില്‍ നിന്നോ ഭക്ഷണം വാങ്ങുന്ന യാത്രക്കാര്‍ക്ക് ഉയര്‍ന്ന സുരക്ഷ ഉറപ്പാക്കാന്‍ ഈ പരിശോധനകള്‍ സഹായിക്കും. കാറ്ററിങ് രംഗത്തെ ശുചിത്വക്കുറവുകളും പോരായ്മകളും കണ്ടെത്താനും പരിഹരിക്കാനും ഇത് വഴിയൊരുക്കും.
ഗുണനിലവാരവും വിലയും: എന്നാല്‍, ഈ കരാര്‍ വന്നതുകൊണ്ട് മാത്രം ഭക്ഷണത്തിന്റെ നിലവാരത്തിലോ വിലയിലോ പെട്ടെന്ന് മാറ്റമുണ്ടാകുമെന്ന് ഉറപ്പില്ല. പരിശോധനകള്‍ എങ്ങനെ നടപ്പിലാക്കുന്നു എന്നതിനെയും കണ്ടെത്തുന്ന വീഴ്ചകള്‍ക്ക്‌മേല്‍ എന്ത് നടപടി സ്വീകരിക്കുന്നു എന്നതിനെയും ആശ്രയിച്ചായിരിക്കും ഇതിന്റെ യഥാര്‍ത്ഥ ഫലം.
നടപ്പിലാക്കുന്ന രീതികള്‍
ഭക്ഷ്യസുരക്ഷാ പരിശോധനയ്ക്കുള്ള നിയമപരമായ ചട്ടക്കൂട് രൂപീകരിച്ചിട്ടുണ്ടെങ്കിലും, പദ്ധതി എപ്പോള്‍ മുതല്‍ പൂര്‍ണ്ണമായി നിലവില്‍ വരും, എത്ര തവണ പരിശോധനകള്‍ നടക്കും, ചട്ടങ്ങള്‍ ലംഘിക്കുന്ന കാറ്ററിങ് യൂണിറ്റുകള്‍ക്കെതിരെ സ്വീകരിക്കുന്ന നടപടികള്‍ എന്തൊക്കെയാണ് തുടങ്ങിയ കാര്യങ്ങള്‍ ഇതുവരെ ഔദ്യോഗികമായി വ്യക്തമാക്കിയിട്ടില്ല.