സ്വർണം വാങ്ങണോ, എസ്ഐപി ആരംഭിക്കണോ? ഏത് നിക്ഷേപമാണ് ​ഗുണം ചെയ്യുക

സ്വർണ്ണം പൊതുവെ ഒരു സുരക്ഷിത നിക്ഷേപമാണ്. അതിന്റെ വില പൂർണ്ണമായി ഇടിഞ്ഞുപോകുന്നത് വളരെ വിരളമാണ്. എന്നാൽ എസ്ഐപി മാർക്കറ്റിലെ കയറ്റിറക്കങ്ങൾക്ക് വിധേയമാണ്.

സ്ത്രീകൾ സാമ്പത്തിക സ്വാതന്ത്ര്യം തേടുന്ന ഈ കാലത്ത് പണം വെറുതെ സൂക്ഷിച്ചുവെച്ചാൽ പോരാ. സാമ്പത്തികമായി സ്വന്തം കാലിൽ നിൽക്കണം എന്നുണ്ടെങ്കിൽ തെരഞ്ഞെടുക്കേണ്ട രണ്ട് വഴികളാണ് സ്വർണ്ണവും എസ്ഐപിയും. രണ്ടും എല്ലാവർക്കും ഇഷ്ടപ്പെട്ട നിക്ഷേപ മാർഗ്ഗങ്ങളാണ്. പക്ഷെ ഇതിൽ ഏതാണ് നിങ്ങൾക്ക് ചേർന്നതെന്ന് മനസ്സിലാക്കി തീരുമാനിക്കുന്നതാണ് ബുദ്ധി.

വർഷങ്ങളായി സ്ത്രീകളുടെ ഏറ്റവും വലിയ വിശ്വാസമാണ് സ്വർണ്ണം. അതൊരു നിക്ഷേപം മാത്രമല്ല, ഒരു വൈകാരിക ബന്ധം കൂടിയാണ്. സുരക്ഷിതത്വത്തിന്റെ പ്രതീകം, അത്യാവശ്യ സമയത്ത് ഒരു കൈത്താങ്ങ്. സ്വർണ്ണവില പതുക്കെയാണെങ്കിലും കാലക്രമേണ കൂടുന്നതുകൊണ്ട് ഇതിനെ ഒരു സുരക്ഷിത നിക്ഷേപമായിട്ടാണ് കാണുന്നത്. പക്ഷെ വളർച്ചയുടെ വേഗത കുറവായിരിക്കുമെന്ന് ഓർക്കണം.

എല്ലാ മാസവും ഒരു ചെറിയ തുക നിക്ഷേപിച്ച് കാലക്രമേണ ഒരു വലിയ സമ്പാദ്യം ഉണ്ടാക്കാൻ സഹായിക്കുന്ന രീതിയാണ് എസ്ഐപി. മാർക്കറ്റിലെ കയറ്റിറക്കങ്ങൾക്കൊടുവിൽ, ദീർഘകാല നിക്ഷേപം വലിയ ലാഭം തരും. അച്ചടക്കം, ക്ഷമ, സമയം - ഈ മൂന്ന് കാര്യങ്ങളുണ്ടെങ്കിൽ എസ്ഐപിയിലൂടെ വലിയ സമ്പത്തുണ്ടാക്കാൻ സാധിക്കും.

സ്വർണ്ണം പൊതുവെ ഒരു സുരക്ഷിത നിക്ഷേപമാണ്. അതിന്റെ വില പൂർണ്ണമായി ഇടിഞ്ഞുപോകുന്നത് വളരെ വിരളമാണ്. എന്നാൽ എസ്ഐപി മാർക്കറ്റിലെ കയറ്റിറക്കങ്ങൾക്ക് വിധേയമാണ്. പക്ഷെ, ദീർഘകാലത്തേക്ക് നിക്ഷേപിക്കാൻ തയ്യാറാണെങ്കിൽ സ്വർണ്ണത്തേക്കാൾ പലമടങ്ങ് വളർച്ച എസ്ഐപി നൽകിയേക്കാം. ചുരുക്കത്തിൽ, ചെറിയ കാലത്തേക്കുള്ള സുരക്ഷയ്ക്ക് സ്വർണ്ണവും ദീർഘകാല വളർച്ചയ്ക്ക് എസ്ഐപിയുമാണ് നല്ലത്.

സ്വർണ്ണത്തിൽ നിന്നുള്ള ശരാശരി വാർഷിക നേട്ടം 8 മുതൽ 10 ശതമാനം വരെയാണ്. ചിലപ്പോൾ ഇതിലും കൂടാം. എന്നാൽ എസ്ഐപിയിലെ ഇക്വിറ്റി ഫണ്ടുകൾ 12-15 ശതമാനമോ അതിൽ കൂടുതലോ വളർച്ച നൽകാൻ സാധ്യതയുണ്ട്. ഡെറ്റ് ഫണ്ടുകളാണെങ്കിൽ 6-8 ശതമാനം വരെയും നേട്ടം പ്രതീക്ഷിക്കാം.

ആഭരണങ്ങളായുള്ള സ്വർണ്ണം വിൽക്കാൻ ചിലപ്പോൾ അല്പം ബുദ്ധിമുട്ടുണ്ടാവാം. എന്നാൽ ഡിജിറ്റൽ ഗോൾഡോ ഗോൾഡ് ഇടിഎഫോ ആണെങ്കിൽ പെട്ടെന്ന് വിറ്റ് പണമാക്കാം. എസ്ഐപിയിലെ പണം എപ്പോൾ വേണമെങ്കിലും പിൻവലിക്കാമെങ്കിലും, 5-7 വർഷമെങ്കിലും നിക്ഷേപം തുടരുന്നതാണ് കൂടുതൽ ലാഭം നൽകുക. പെട്ടെന്നൊരു ആവശ്യം വന്നാൽ രണ്ട് നിക്ഷേപങ്ങളും ഉപകാരപ്പെടും, രീതികൾ വ്യത്യസ്തമാണെന്ന് മാത്രം.

മൂന്ന് വർഷത്തിൽ കൂടുതൽ കൈവശം വെച്ച സ്വർണ്ണം വിൽക്കുമ്പോൾ 20% നികുതി നൽകേണ്ടി വരും (ഇൻഡെക്സേഷൻ ആനുകൂല്യം ലഭിക്കും). എസ്ഐപിയിൽ ഒരു വർഷത്തിനുള്ളിൽ പണം പിൻവലിച്ചാൽ 15% നികുതിയും, ഒരു വർഷത്തിന് ശേഷം ലാഭത്തിന് 10% നികുതിയുമാണ്. ഡെറ്റ് ഫണ്ടുകൾക്ക് നികുതി നിരക്കിൽ വ്യത്യാസമുണ്ടാകും. അതുകൊണ്ട്, ഒരു സാമ്പത്തിക ഉപദേഷ്ടാവിൻ്റെ സഹായത്തോടെ നിങ്ങളുടെ ആവശ്യങ്ങൾക്കനുസരിച്ചുള്ള നിക്ഷേപം തിരഞ്ഞെടുക്കുന്നതാണ് ഏറ്റവും നല്ലത്.