ഭൂപേഷ് ബാ​ഗലിന്റെ സത്യപ്രതിജ്ഞ നാളെ; കാർഷിക വായ്പകൾ എഴുതിത്തള്ളുമെന്ന വാ​ഗ്ദാനം ആവർത്തിച്ച് നിയുക്ത മുഖ്യമന്ത്രി

സമത്വവും സുതാര്യതയും ഐക്യവുമുള്ള മികച്ച ഭരണം ജനങ്ങൾക്ക് വേണ്ടി നൽകാനാണ് കോൺ​ഗ്രസ് ആ​ഗ്രഹിക്കുന്നത്. കർഷകരുടെ വായ്പകൾ എഴുതിത്തള്ളിക്കൊണ്ടാണ് ഞങ്ങളിതിന് തുടക്കം കുറിക്കുന്നത്. - കോണ്‍ഗ്രസിന്‍റെ ട്വീറ്റിൽ പറയുന്നു.

ദില്ലി: അധികാരത്തിലേറി പത്ത് ദിവസത്തിനുള്ളിൽ കർഷക വായ്പകൾ എഴുതിത്തള്ളുമെന്ന കോൺ​ഗ്രസ് വാ​ഗ്ദാനം ആവർത്തിച്ച് ഛത്തീസ്​ഗഡ് നിയുക്ത മുഖ്യമന്ത്രി ഭൂപേഷ് ബാ​ഗൽ. നാളെയാണ് ഭൂപേഷ് ബാ​ഗലിന്റെ സത്യപ്രതിജ്ഞാ ദിനം. അദ്ദേഹത്തോടൊപ്പം വിജയിച്ച കമൽനാഥും അശോക് ​ഗെഹ്ലോട്ടും യഥാക്രമം മധ്യപ്രദേശ്, രാജസ്ഥാൻ എന്നിവിടങ്ങളിൽ മുഖ്യമന്ത്രിയായി അധികാരത്തിലേറിക്കഴിഞ്ഞു. മുഖ്യമന്ത്രി പദ പ്രഖ്യാപനത്തിന് ശേഷം  ഒരു പുതിയ ഛത്തീസ്​ഗഡ് നിർമ്മിക്കുക എന്ന ഉത്തരവാദിത്വമാണ് രാഹുൽ ​ഗാന്ധി തനിക്ക് നൽകിയിട്ടുള്ളതെന്ന് അദ്ദേഹം വെളിപ്പെടുത്തിയിരുന്നു. 

കാർഷിക വായ്പകൾ എഴുതിത്തള്ളുമെന്ന കോൺ​ഗ്രസിന്റെ തെരഞ്ഞെടുപ്പ് വാ​ഗ്ദാനം തന്നെയാണ് ഭൂപേഷ് ബാ​ഗലും ആവർത്തിച്ചിരിക്കുന്നത്. ജനങ്ങളും ആ​ഗ്രഹത്തിനും പ്രതീക്ഷകൾക്കും ഒപ്പം നിന്ന് പ്രവർത്തിക്കുന്ന ഒരു സർക്കാരായിരിക്കും ഛത്തീസ്​ഗഡിലേതെന്നും അദ്ദേഹം പറയുന്നു. ''സമത്വവും സുതാര്യതയും ഐക്യവുമുള്ള മികച്ച ഭരണം ജനങ്ങൾക്ക് വേണ്ടി നൽകാനാണ് കോൺ​ഗ്രസ് ആ​ഗ്രഹിക്കുന്നത്. കർഷകരുടെ വായ്പകൾ എഴുതിത്തള്ളിക്കൊണ്ടാണ് ഞങ്ങളിതിന് തുടക്കം കുറിക്കുന്നത്.'' - കോണ്‍ഗ്രസിന്‍റെ ട്വീറ്റിൽ പറയുന്നു.

നിലവിൽ ഛത്തീസ്​ഗഡ് പിസിസി അധ്യക്ഷനാണ് ഭൂപേഷ് ബാ​ഗൽ. അമ്പികർപൂർ എംഎൽഎ ടി എസ് സിംഗ് ദിയോ എന്നിവരുടെ പേരുകള്‍ സജീവ പരിഗണനയിലുണ്ടായിരുന്നു. 90 അംഗ നിയമസഭയിൽ 68 സീറ്റും വിജയിച്ചാണ് കോൺഗ്രസ് ഛത്തീസ്ഗഡിൽ അധികാരമുറപ്പിച്ചത്.