മോദിയാണ് രാമൻ, രാഹുൽ​ ഗാന്ധി ​രാവണനും പ്രിയങ്ക ശൂർപ്പണഖയും: ബിജെപി നേതാവ് സുരേന്ദ്രസിം​ഗ്

രാവണനും ശൂർപ്പണഖയ്ക്കുമെതിരെ  ജനാധിപത്യ വിശ്വാസികളായ ജനങ്ങൾ പോരാടണമെന്നും സുരേന്ദ്രസിം​ഗ് കൂട്ടിച്ചേർത്തു. കഴിഞ്ഞ ദിവസം പാറ്റ്നയിൽ രാഹുൽ ​ഗാന്ധിയെ രാമനായി ചിത്രീകരിച്ച് പോസ്റ്ററുകൾ പ്രത്യക്ഷപ്പെട്ടിരുന്നു. 

ഉത്തർപ്രദേശ്: കോൺ​ഗ്രസ് അദ്ധ്യക്ഷൻ രാഹുൽ ​ഗാന്ധിയെ രാവണനെന്നും പ്രിയങ്ക ​ഗാന്ധിയെ ശൂർപ്പണഖയെന്നും വിളിച്ച് ഉത്തർപ്രദേശിൽ നിന്നുള്ള ബിജെപി എംഎൽഎ സുരേന്ദ്ര സിം​ഗ്. മോദിയെ രാമനെന്നാണ് സുരേന്ദ്രസിം​ഗ് വിശേഷിപ്പിച്ചിരിക്കുന്നത്. രാവണനും ശൂർപ്പണഖയ്ക്കുമെതിരെ  ജനാധിപത്യ വിശ്വാസികളായ ജനങ്ങൾ പോരാടണമെന്നും സുരേന്ദ്രസിം​ഗ് കൂട്ടിച്ചേർത്തു. കഴിഞ്ഞ ദിവസം പാറ്റ്നയിൽ രാഹുൽ ​ഗാന്ധിയെ രാമനായി ചിത്രീകരിച്ച് പോസ്റ്ററുകൾ പ്രത്യക്ഷപ്പെട്ടിരുന്നു. ഇതിനെതിരെയാണ് സുരേന്ദ്രസിം​ഗിന്റെ പുതിയ പ്രസ്താവന.

തെരഞ്ഞെടുപ്പിനോട് അനുബന്ധിച്ച് കിഴക്കൻ ഉത്തർപ്രദേശിൽ പാർട്ടി ജനറൽ സെക്രട്ടറിയായി പ്രിയങ്ക ​ഗാന്ധിയെ നിയോ​ഗിച്ചിരുന്നു. രാവണൻ ശൂർപ്പണഖയെ രാമനടുത്തേയ്ക്ക് അയച്ചത് പോലെയാണ് രാഹുൽ പ്രിയങ്കയെ യുപിയിലേക്ക് അയച്ചതെന്നും സുരേന്ദ്ര സിം​ഗ് പറയുന്നു. വരാനിരിക്കുന്ന ലോക്സഭാ തെരഞ്ഞെടുപ്പിൽ യുപിയിലെ സീറ്റുകൾക്ക് നിർണായക സ്ഥാനമാണുള്ളത്. പ്രിയങ്കയുടെ നിയമനം യുപിയിൽ സ്വാധീനമുണ്ടാക്കുമെന്ന പ്രതീക്ഷ നിലനിൽക്കെയാണ് സുരേന്ദ്രസിം​ഗ് പ്രിയങ്കയെയും രാഹുലിനെയും അപമാനിക്കുന്ന പ്രസ്താവനയുമായി രം​ഗത്തെത്തിയിരിക്കുന്നത്.