കടലില്‍ കുളിക്കാനിറങ്ങി തിരയിൽ പെട്ട് ഒരാൾ മരിച്ചു; മൂന്നുപേരെ കാണാതായി

ബീമാപള്ളി സ്വദേശികളായ ഏഴംഗ സംഘം ഉച്ചയോടെയാണ് പൊഴിക്കരയില്‍ എത്തിയത് . ഇതില്‍ അഞ്ചുപേര്‍ കടലില്‍ കുളിക്കാനിറങ്ങവേയാണ് അപകടമുണ്ടായത് .

തിരുവനന്തപുരം: അമ്പലത്തറ ഇടയാര്‍ പൊഴിക്കരയിൽ കടലില്‍ കുളിക്കാനിറങ്ങി തിരയിൽ പെട്ട് ഒരാൾ  മരിച്ചു . മൂന്നുപേരെ കാണാതായി . കാണാതായവര്‍ക്കുവേണ്ടി തിരച്ചിൽ തുടരുകയാണ്. ബീമാപള്ളി സ്വദേശികളായ ഏഴംഗ സംഘം ഉച്ചയോടെയാണ് പൊഴിക്കരയില്‍ എത്തിയത്. ഇതില്‍ അഞ്ചുപേര്‍ കടലില്‍ കുളിക്കാനിറങ്ങവേയാണ് അപകടമുണ്ടായത്. നവാസ് ഖാൻ , ബിസ്മില്ല ഖാൻ , റമീസ് ഖാൻ , ഇബ്രാഹിം , ജസീര്‍ഖാന്‍ എന്നിവരാണ് അപകടത്തില്‍പ്പെട്ടത്.

ഇതില്‍ ഇബ്രാഹിമിനേയും ജസീര്‍ഖാനേയും മല്‍സ്യത്തൊഴിലാളികള്‍ കരയിലെത്തിച്ച് ആശുപത്രിയിലെത്തിച്ചെങ്കിലും ഇബ്രാഹിം മരിച്ചു . ജസീര്‍ഖാനെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കുളിക്കാനിറങ്ങിയവര്‍ പൊഴിയുടെ ഭാഗത്തെ മണൽ നീക്കിയതാണ് അപകടകാരണമെന്ന് മല്‍സ്യത്തൊഴിലാളികള്‍ പറയുന്നു. കാണാതായവർക്കു വേണ്ടി പൊലീസും കോസ്റ്റൽ പൊലീസും തിരച്ചിൽ നടത്തുന്നുണ്ട് . വേലിയേറ്റ സമയമായതിനാല്‍ തിരച്ചില്‍ ദുഷ്കരമാണെന്ന് പൊലീസ് അറിയിച്ചു .