പ്രളയത്തെ കേരളം നേരിട്ടത് മാതൃകാപരമായെന്ന് കേന്ദ്രസംഘം

മഹാപ്രളയത്തിൽപ്പെട്ട ജനങ്ങളെ രക്ഷപെടുത്താനും പുനരധിവസിപ്പിക്കാനും സംസ്ഥാന സർക്കാർ നടത്തിയ ദ്രുതഗതിയിലുള്ളതും കുറ്റമറ്റതുമായ പ്രവർത്തനങ്ങൾ അഭിനന്ദനീയമായിരുന്നുവെന്ന് ബി.ആർ ശർമ പറഞ്ഞു

തിരുവനന്തപുരം: കേരളത്തിലെ പ്രളയത്തിലെ ദുരിതാശ്വാസ ക്യാമ്പുകൾ സംബന്ധിച്ചും രക്ഷാപ്രവർത്തനം സംബന്ധിച്ചും ജനങ്ങളിൽനിന്നും യാതൊരു പരാതികളും ലഭിച്ചില്ലെന്നും ഇത്  അത്ഭുതപ്പെടുത്തിയതായും കേരളത്തിലെ പ്രളയത്തെക്കുറിച്ച് പഠിക്കാന്‍ എത്തിയ കേന്ദ്രസംഘം. സംസ്ഥാനത്തുണ്ടായ നാശനഷ്ടങ്ങൾ വിലയിരുത്താനെത്തിയ കേന്ദ്ര സംഘത്തിന്റെ റിപ്പോർട്ട് ഒരാഴ്ചയ്ക്കുള്ളിൽ കേന്ദ്രത്തിനു സമർപ്പിക്കുമെന്ന് സംഘത്തലവനും കേന്ദ്ര അഭ്യന്ത്രമന്ത്രാലയത്തിലെ സ്‌പെഷ്യൽ സെക്രട്ടറിയുമായ ബി.ആർ ശർമ മുഖ്യമന്ത്രി പിണറായി വിജയനെ അറിയിച്ചു. 

ദുരിതം ബാധിച്ച പന്ത്രണ്ടു ജില്ലകളിൽ സംഘം നടത്തിയ സന്ദർശനത്തിനുശേഷം മുഖ്യമന്ത്രിയുമായി കൂടിക്കാഴ്ച നടത്തുകയായിരുന്നു സംഘം.
പ്രതീക്ഷിക്കാതെ വന്ന മഹാപ്രളയത്തിൽപ്പെട്ട ജനങ്ങളെ രക്ഷപെടുത്താനും പുനരധിവസിപ്പിക്കാനും സംസ്ഥാന സർക്കാർ നടത്തിയ ദ്രുതഗതിയിലുള്ളതും കുറ്റമറ്റതുമായ പ്രവർത്തനങ്ങൾ അഭിനന്ദനീയമായിരുന്നുവെന്ന് ബി.ആർ ശർമ പറഞ്ഞു. പ്രളയം ബാധിച്ച വീടുകളും സ്ഥാപനങ്ങളും ജനകീയ പങ്കാളിത്തത്തോടെ ശുചീകരിക്കാനും ജനജീവിതം സാധാരണഗതിയിലേക്ക് തിരികെക്കൊണ്ടുവരാനും മാതൃകാപരമായ നടപടി സ്വീകരിക്കാൻ സർക്കാരിനു സാധിച്ചിട്ടുണ്ട്. 

സംസ്ഥാനത്ത് സംഭവിച്ച പ്രളയക്കെടുതികളുടെ രൂക്ഷത വിലയിരുത്താൻ നാലു ടീമുകളായാണ് സംഘം വിവിധ ജില്ലകൾ സന്ദർശിച്ചത്. പ്രളയത്തിൽ തകർന്ന സ്ഥലങ്ങൾ നേരിൽക്കണ്ടും ജനങ്ങളിൽ നിന്നു നേരിട്ടു വിവരങ്ങൾ ശേഖരിച്ചുമാണ് സംഘം സംസ്ഥാനം നേരിട്ട പ്രളയത്തിന്റെ രൂക്ഷത വിലയിരുത്തിയത്.ട

പ്രളയത്തിൽ തകർന്ന കേരളത്തെ പൂർണമായും പുതുക്കിപ്പണിയുന്നതിനുള്ള നടപടികളാണ് മുഖ്യമന്ത്രിയുടെ നേതൃത്വത്തിൽ നടക്കുന്നതെന്നും കേന്ദ്രത്തിൽ നിന്ന് സ്‌പെഷ്യൽ പാക്കേജ് അഭ്യർത്ഥിച്ചുകൊണ്ടുള്ള മെമോറാണ്ടം തയ്യാറാക്കിക്കൊണ്ടിരിക്കുകയാണെന്നും ചീഫ് സെക്രട്ടറി ടോം ജോസ് സംഘത്തെ അറിയിച്ചു.