കാൻസർ സ്ഥിരീകരിക്കാന്‍ പരിശോധന ; കിട്ടിയത്​ 40 വർഷം മുമ്പ്​ വിഴുങ്ങിയ കളിപ്പാട്ടം

ലണ്ടന്‍: കാൻസറെന്ന്​ ഡോക്​ടർമാർ സംശയിച്ച ലക്ഷണങ്ങൾ ഒടുവിൽ 40 വര്‍ഷം മുമ്പ് അറിയാതെ ഉള്ളില്‍ പോയ കളിപ്പാട്ടം കൊണ്ടുണ്ടായതാണെന്ന് കണ്ടെത്തി. 47കാര​ന്‍റെ ശ്വാസകോശത്തിൽ കണ്ടെത്തിയ മുഴയാണ് ആദ്യം കാൻസറെന്ന സംശയം വളർത്തിയത്​. ഏതാനും വർഷങ്ങളായി ചുമയ്​ക്കുമ്പോൾ മഞ്ഞ നിറത്തിലുള്ള കഫവും അസ്വസ്​ഥതയും  അനുഭവപ്പെട്ടതിന് പിന്നാലെയാണ് ബ്രിട്ടീഷുകാരനായ രോഗി ഡോക്​ടറെ സമീപിച്ചത്​.

സ്​കാനിങ്ങിൽ ശ്വാസകോശത്തിൽ മുഴ പോലുള്ള വസ്​തു കണ്ടെത്തി. മൂന്ന്​ പതിറ്റാണ്ടായി പുകവലിക്കുന്ന ഇദ്ദേഹത്തിൽ കാൻസറിന്‍റെ സൂചനയായി ഡോക്​ടർ കരുതി. ഉടൻ തന്നെ മറ്റൊരു ഹോസ്​പിറ്റലിലേക്ക്​ രോഗിയെ റഫർ ചെയ്​തു. പുകവലിക്കാരനായ രോഗിയുടെ ശ്വാസകോശത്തില്‍ ക്യാന്‍സര്‍ തന്നെയായിരിക്കുമെന്ന ഉറപ്പിച്ച ഡോക്ടര്‍ പക്ഷേ പരിശോധനാ ഫലം വന്നപ്പോള്‍ ഞെട്ടി. ശ്വാസക്കോഴത്തില്‍ കളിപ്പാട്ടത്തി​ന്‍റെ അടപ്പാണ് കണ്ടെത്തിയത്. അതും 40 വർഷം മുമ്പ്​ ​ശ്വാസകോശത്തിൽ അബദ്ധവശാൽ കയറിപ്പോയത്. ഇത്രയും കാലം ഇങ്ങനെ ഒരു വസ്​തു മറ്റ്​ ലക്ഷണങ്ങൾ ഒന്നും കൂടാതെ ശരീരത്തിനകത്ത്​ നിന്നുവെന്നത്​ ഡോക്​ടർമാരെ പോലും അത്​ഭുതപ്പെടുത്തിയിട്ടുണ്ട്​. 40 വർഷത്തോളം ഇത്തരം വസ്​തു ശ്വാസനാളത്തിൽ മറ്റ് പ്രശ്നമൊന്നും കാണിക്കാതെ സ്ഥിതിചെയ്തുവെന്ന്​ റിപ്പോർട്ട്​ ചെയ്യപ്പെടുന്നത് ലോകത്ത് തന്നെ​ ആദ്യമാണെന്ന്​ ഡോക്​ടർമാർ പറയുന്നു. രോഗിക്ക് തന്‍റെ ഏഴാം വയ്സ്സിലെ പിറന്നാളിന് കിട്ടിയ സമ്മാനമായിരുന്നു കളിപ്പാട്ടം.

റോയൽ പ്രെസ്​റ്റൺ ഹോസ്​പിറ്റലിൽ ആണ്​ ബ്രോ​ങ്കോസ്​കോപി പരിശോധന നടത്തിയത്​. ശ്വാസ കോശ കാൻസർ എന്ന സംശയത്തിൽ ആയിരുന്നു പരിശോധന. ഇതിന്​ ശേഷമാണ്​ രോഗി സ്​ഥിരമായി ഉപയോഗിച്ചിരുന്ന കളിപ്പാട്ടത്തെ കുറിച്ച്​ പറഞ്ഞതും അതിന്‍റെ ഭാഗം അറിയാതെ അകത്ത്​ പോയിരിക്കാമെന്നും ഒാർത്തെടുത്ത്​ പറഞ്ഞത്​.