ദേശീയ ഗാനം ആംഗ്യ ഭാഷയിലും ആസ്വദിക്കാം; ബിഗ്​ബി സ്​ക്രീനിൽ

ദേശീയ ഗാനം കേന്ദ്ര സർക്കാർ ആംഗ്യ ഭാഷയില്‍ പുറത്തിറക്കി. കേന്ദ്ര മന്ത്രി മഹേന്ദ്ര നാഥ് പാണ്ഡെയാണ് ഇന്ന് വീഡിയോ പുറത്തിറക്കിയത്​. ഭിന്നശേഷിയുള്ളവരെ സംബോധന ചെയ്യാൻവേണ്ടിയാണിത്​. ആംഗ്യഭാഷയെ ആശ്രയിക്കുന്നവർക്കായി  ഇങ്ങനെയൊരു വീഡിയോ പുറത്തിറക്കാൻ സാധിച്ചത്​ അഭിമാന നിമിഷമാണെന്ന് ​മന്ത്രി പറഞ്ഞു.  

ഭിന്നശേഷിക്കാരുടെ അതിജീവനം കൂടുതൽ സാധ്യമാക്കുന്നതാണ്​ ഇൗ ശ്രമമെന്ന് മന്ത്രി പറഞ്ഞു. ഡൽഹിയിൽ ചെ​ങ്കോട്ടയുടെ  പശ്ചാത്തലത്തിൽ ചിത്രീകരിച്ച 3.35 മിനിറ്റുളള വീഡിയോയിൽ  ഭിന്നശേഷിയുള്ള കുട്ടികൾക്കൊപ്പം ബോളിവുഡ് സൂപ്പർ സ്​റ്റാർ അമിതാഭ് ബച്ചനും അഭിനയിച്ചിട്ടുണ്ട്. ഗോവിന്ദ് നിഹലാനിയാണ്​ വീഡിയോ സംവിധാനം ചെയ്​തത്​. ഡൽഹിക്ക്​ പുറമെ ഗോവ, ഭോപ്പാൽ, ചാണ്ഡിഗഢ്​, കോലാപ്പൂർ എന്നിവിടങ്ങളിലും ആംഗ്യഭാഷയിലുള്ള ദേശീയഗാനം പുറത്തിറക്കി.