ഹാദിയയെ വിമാനത്തിൽ ദില്ലിയിലെത്തിക്കും

കോട്ടയം: ഹാദിയയെ വിമാനത്തിൽ ദില്ലിയിലെത്തിക്കുമെന്ന് വൈക്കം ഡിവൈഎസ്പി കെ സുഭാഷ് . എപ്പോൾ കൊണ്ടുപോകുമെന്ന കാര്യം വ്യക്തമാക്കാനാകില്ല . ഹാദിയ കേസ് വരുന്ന 27ന് സുപ്രീംകോടതി പരിഗണിക്കാനിരിക്കെയാണ് പൊലീസിന്‍റെ തീരുമാനം.

27ന് ഉച്ചക്ക് ശേഷം 3 മണിക്കാണ് ഹാദിയ കോടതിയിൽ നേരിട്ട് ഹാജരാകുന്നത്. ഹാദിയുടെ ഭാഗം കേൾക്കുന്നത് അടച്ചിട്ട കോടതിയിലാകണമെന്ന അച്ഛൻ അശോകന്‍റെ ആവശ്യം കോടതി നിരാകരിച്ചിരുന്നു.

ഇതിനിടെ കേസില്‍ ദേശീയ അന്വേഷണ ഏജൻസി സുപ്രീംകോടതിയിൽ പ്രാഥമിക പരിശോധന റിപ്പോര്‍ട്ട് സമര്‍പ്പിച്ചു. സീൽവെച്ച കവറിലാണ് റിപ്പോര്‍ട്ട് സമര്‍പ്പിച്ചത്. കേസിൽ ഗൗരവമായ അന്വേഷണം ആവശ്യമാണെന്നാണ് എൻ.ഐ.എയുടെ അഭിപ്രായം. കേസിൽ എൻ.ഐ.എ നടത്തുന്ന അന്വേഷണം കോടതി അലക്ഷ്യമാണെന്ന് ചൂണ്ടിക്കാട്ടി ഷെഫിൻ ജഹാൻ ഹര്‍ജി നൽകിയിരുന്നു. കോടതി അലക്ഷ്യ ഹര്‍ജി ചൊവ്വാഴ്ച കോടതി പരിഗണിച്ചേക്കും.