ദളിതനായതിനാൽ മൂന്നു തവണ മുഖ്യന്ത്രി പദം നിഷേധിച്ചു: കർണാടക ഉപമുഖ്യമന്ത്രി ജി പരമേശ്വര

കോൺ​ഗ്രസിലെ തന്നെ ദളിത് നേതാക്കളായ ബസവലിം​ഗപ്പ, കെ. എച്ച്. രം​ഗനാഥ്, മല്ലികാർജ്ജുന ഖാർ​ഗെ എന്നിവരെല്ലാം ജാതിയുടെ പേരിൽ പിന്തളളപ്പെട്ടവരാണ്. ഇവർക്കെല്ലാം വേണമെങ്കിൽ മുഖ്യമന്ത്രി ആകാമായിരുന്നു. 

കർണാടക: ദളിത് സമുദായത്തിൽ നിന്നുള്ള ആളായതിനാൽ മൂന്നു തവണ മുഖ്യമന്ത്രി പദം നിഷേധിച്ചതായി കോൺ​ഗ്രസ് നേതാവും കർണാടക ഉപമുഖ്യമന്ത്രിയുമായ ജി. പരമേശ്വര. പൂർണ്ണ മനസ്സോടെയല്ല ഉപമുഖ്യമന്ത്രി സ്ഥാനം ഏറ്റെടുത്തതെന്നും അദ്ദേഹം പറഞ്ഞു. ദാവൺ​ഗരയിൽ‌ ദളിത് റാലിയിൽ പങ്കെടുത്ത് സംസാരിക്കുകയായിരുന്നു പരമേശ്വര. ദളിത് നേതാക്കളുടെ ഉയർച്ചയ്ക്ക് തടയിടുന്ന ചില കോൺ​ഗ്രസ് നേതാക്കളുണ്ടെന്നും അദ്ദേഹം പറഞ്ഞു. 

കോൺ​ഗ്രസിലെ തന്നെ ദളിത് നേതാക്കളായ ബസവലിം​ഗപ്പ, കെ. എച്ച്. രം​ഗനാഥ്, മല്ലികാർജ്ജുന ഖാർ​ഗെ എന്നിവരെല്ലാം ജാതിയുടെ പേരിൽ പിന്തളളപ്പെട്ടവരാണ്. ഇവർക്കെല്ലാം വേണമെങ്കിൽ മുഖ്യമന്ത്രി ആകാമായിരുന്നു. എന്നാൽ ദളിത് സമൂഹം നേരിട്ടുകൊണ്ടിരിക്കുന്ന അടിച്ചമർത്തലിന്റെ ഭാ​ഗമായി ഇവർക്കൊന്നും മുഖ്യമന്ത്രി പദത്തിൽ എത്താനായില്ലെന്നും പരമേശ്വര ദേശീയമാധ്യമമായ പിടിഐയോട് പറഞ്ഞതായി റിപ്പോർട്ട്.

എന്നാൽ മുതിർന്ന കോൺ​ഗ്രസ് നേതാവും കർണാടക മുൻമുഖ്യമന്ത്രിയുമായ സി​ദ്ധരാമയ്യ നിഷേധിച്ചു കൊണ്ട് രം​ഗത്തെത്തി. ''ദളിത് സമുദായത്തിന്റെ ഉന്നമനത്തിന് വേണ്ടിയാണ് കോൺ​ഗ്രസ് ഏറ്റവുമധികം പ്രവർത്തിച്ചിട്ടുള്ളതെന്ന് അദ്ദേഹം വ്യക്തമാക്കി, സമൂഹത്തിലെ ദളിത് പിന്നാക്കവിഭാ​ഗങ്ങൾക്ക് വേണ്ടി നിലകൊള്ളുന്ന പാർട്ടിയാണ് കോൺ​ഗ്രസ്. ഏത് അർത്ഥത്തിലാണ് അദ്ദേഹം അങ്ങനെ പറഞ്ഞതെന്ന് എനിക്കറിയില്ല. അദ്ദേഹത്തോട് തന്നെ ചോദിക്കുകയായിരിക്കും നല്ലത്.'' സിദ്ധരാമയ്യ അഭിപ്രായപ്പെട്ടു.