ആരോഗ്യനില കൂടുതല്‍ വഷളായി: കരുണാനിധിയെ ആശുപത്രിയിലേക്ക് മാറ്റി

അടിയന്തരസാഹചര്യം മുന്നില്‍ കണ്ട് ഗോപാലപുരത്തെ കരുണാനിധിയുടെ വീട്ടിലേക്കുള്ള വഴിയില്‍ പൊലീസ് ബാരിക്കേഡുകള്‍ സ്ഥാപിച്ചിരിക്കുകയാണ്.  

ചെന്നൈ: ഗുരുതരാവസ്ഥയില്‍ തുടരുന്ന ഡിഎംകെ അധ്യക്ഷന്‍ എം.കരുണാനിധിയുടെ ആരോഗ്യനില വെള്ളിയാഴ്ച്ച രാത്രി വഷളായത് ആശങ്ക പടർത്തി. ചെന്നൈ ​ഗോപാലപുരത്തെ വസതിയിൽ മെഡിക്കൽ ടീമിന്റെ നിരീക്ഷണത്തിൽ കഴിയുന്ന കരുണാനിധിയുടെ ആരോ​ഗ്യനില ഇന്നലെ രാത്രിയോടെയാണ് മോശമായത്. 

അർധരാത്രിയോടെ കാവേരി ആശുപത്രിയിൽ നിന്നും ഡോക്ടറുമാരുടെ സംഘം കരുണാനിധിയെ പരിശോധിക്കാനെത്തി. തമിഴ്നാട് പ്രതിപക്ഷ നേതാവും ഡിഎംകെ വർക്കിം​ഗ് പ്രസിഡന്റുമായ മകൻ എം.കെ.സ്റ്റാലിൻ, സഹോദരനും മുൻകേന്ദ്രമന്ത്രിയുമായ എം.കെ.അഴ​ഗിരി, രാജ്യസഭാ എംപിയും ഇവരുടെ സഹോദരിയുമായ കനിമൊഴി ഡിഎംകെയുടെ മറ്റു ഉന്നതനേതാക്കളും കരുണാനിധിയുടെ വസതിയിലെത്തിയതോടെ അദ്ദേഹത്തിന്റെ ആരോ​ഗ്യനിലയെക്കുറിച്ച് പലതരം അഭ്യൂഹങ്ങളും പരക്കാൻ ആരംഭിച്ചു.

മാധ്യമപ്രവർത്തകരുടെ വൻനിരയ്ക്ക് പുറമേ നൂറുകണക്കിന് ഡിഎംകെ പ്രവർത്തകരും ​ഗോപാലപുരത്തെ വീട്ടിലേക്ക് ഒഴുകിയെത്തി. ഇതോടെ കൂടുതൽ പൊലീസിനെ ഇവിടെ വിന്യസിക്കുകയും വഴികളിൽ ബാരിക്കേഡുകൾ സ്ഥാപിക്കുകയും ചെയ്തു. രാത്രി പന്ത്രണ്ടരയോടെ കാവേരി ആശുപത്രിയിൽ നിന്നുള്ള ആംബുലൻസ് ​ഗോപാലപുരത്തെ വീട്ടിലെത്തി. സ്ട്രക്ച്ചറിൽ കിടത്തി ആംബുലൻസിലെത്തിച്ച കരുണാനിധിയെ ആശുപത്രിയിലേക്ക് കൊണ്ടുപോയി. 

രക്തസമ്മർദ്ദം കൂടിയതിനെ തുടർന്നാണ് കരുണാനിധിയെ ആശുപത്രിയിൽ പ്രവേശിപ്പിച്ചതെന്നും ഐസിയുവിൽ പ്രവേശിപ്പിച്ച അദ്ദേഹത്തിന്റെ ആരോ​ഗ്യനില ഇപ്പോൾ മെച്ചപ്പെട്ടിട്ടുണ്ടെന്നും ഡിഎംകെ നേതാവ് എ.രാജ പിന്നീട് മാധ്യമപ്രവർത്തകരെ അറിയിച്ചു. അഭ്യൂഹങ്ങളെ വിശ്വസിക്കരുതെന്ന് പ്രവർത്തകരോടും അദ്ദേഹം ആവശ്യപ്പെട്ടു. അർധരാത്രി രണ്ടരയോടെ പുറത്തു വന്ന മെഡിക്കൽ ബുള്ളറ്റിനിൽ രക്തസമ്മർദ്ദം സാധാരണനിലയിലായെന്നും കരുണാനിധി ഐസിയുവിൽ വിദ​ഗ്ദ്ധഡോക്ടർമാരുടെ നിരീക്ഷണത്തിൽ തുടരുകയാണെന്നുമാണ് പറയുന്നത്.