നിരവധി പദ്ധതികളുമായി കോഴിക്കോട് കോർപ്പറേഷൻ

തൊണ്ടയാട്​ പഞ്ചിങ്​ സ്​റ്റേഷൻ പണിയും, മിഠായിത്തെരുവിൽ സ്​ട്രീറ്റ്​ മാനെജർ നിരവധി പദ്ധതികളുമായി കോഴിക്കോട് കോർപ്പറേഷൻ 

കോഴിക്കോട്​:  തുടർച്ചയായി അപകടമുണ്ടാവുന്ന കോഴിക്കോട്- മെഡിക്കൽ കോളെജ്​ റൂട്ടിൽ പഞ്ചിങ് സ്റ്റേഷൻ സ്ഥാപിക്കാനുമുള്ള ട്രാഫിക്​ റഗുലേറ്ററി കമ്മറ്റിയുടെ തീരുമാനത്തിന്​ കോഴിക്കോട് നഗരസഭ കൗൺസിൽ യോഗത്തിന്‍റെ അംഗീകാരം. തൊണ്ടയാട്​ പഞ്ചിങ്​ സ്​റ്റേഷൻ പണിയാൻ ആർടിഒയെ ചുമതലപ്പെടുത്താനും അവിടെ സിസിടിവി ക്യാമറ സ്ഥാപിക്കാനും യോഗം അനുമതി നൽകി. 

മിഠായിത്തെരുവിൽ കാര്യങ്ങൾ നിയന്ത്രിക്കാൻ സ്​ട്രീറ്റ്​ മാനേജറെ നിയമിക്കും. സ്​ട്രീറ്റ്​ മാനേജർക്കും പൊലീസ്​ ഉദ്യോഗസ്​ഥനും വേണ്ടി മിഠായിത്തെരുവ്​ എസ്​കെ പൊറ്റെക്കാട്ട്​ പ്രതിമക്ക്​ സമീപം ബൂത്ത്​ നിർമ്മിക്കും. ഭിന്നശേഷിക്കാർക്ക്​ തെരുവിൽ മുച്ചക്ര വാഹനം ഏർപ്പെടുത്തും. ഇപ്പോൾ സർവീസ്​ നടത്തുന്ന ബഗീസിൽ ഭിന്ന ശേഷിക്കാർക്ക്​ സൗജന്യ യാത്രയും അനുവദിക്കാനും നഗരസഭ കൗൺസിൽ തീരുമാനിച്ചു. 

നഗരത്തിൽ അനധികൃതമായി പാർക്ക്​ ചെയ്യുന്ന ലോറികൾ ക്ലാമ്പിട്ട്​ പൂട്ടും.  ലോറി പാർക്കിങ്ങ്​ പ്രശ്നം പരിഹരിക്കാൻ കോയ റോഡിലും മീഞ്ചന്ത ബസ്​സ്​റ്റാൻഡ്​നിർമിക്കാനുള്ള സ്​ഥലവും ഉപയോഗിക്കും. മീഞ്ചന്തയിൽ ബസ്​സ്​റ്റാൻഡ്​ നിർമാണം തടസപ്പെടുമെന്നതിനാൽ അവിടത്തെ ലോറി പാർക്കിങ്ങ്​ നീക്കം ഒഴിവാക്കണമെന്ന ബിജെപി നേതാവ്​ നമ്പിടി നാരായണന്‍റെ വിയോജിപ്പോടെയാണ്​ തീരുമാനം കൗൺസിൽ അംഗീകരിച്ചത്​. അനധികൃത പരസ്യ ബോർഡുകൾ നീക്കാനും അനധികൃത കച്ചവടക്കാരെ ഒഴിപ്പിക്കാനും പൊലീസുമായി ചേർന്ന്​ സംയുക്​ത പരിശോധന നടത്തും. 

കോഴിക്കോടിനെ സംസ്ഥാനത്തെ ആദ്യ ഡിജിറ്റൽ നഗരമാക്കി മാറ്റാനായി മൊ​ബൈൽ ഡാറ്റ കുറഞ്ഞ സ്​ഥലങ്ങളിൽ 25 മീറ്റർ വരെ ഉയരമുള്ള ഹൈമാസ്​റ്റ്​പോൾ സ്​ഥാപിക്കാൻ താത്​പര്യ പത്രം പുതിയ നിബന്ധനകളോടെ ക്ഷണിക്കാൻ കൗൺസിൽ യോഗം തീരുമാനിച്ചു.  സിറ്റി സാനിറ്റേഷൻ കരട്​ പ്ലാൻ കൗൺസിലിൽ അവതരിപ്പിച്ചു. മീഞ്ചന്ത മേൽപ്പാലത്തിന്​ താഴെ ഒഴിഞ്ഞ്​ കിടക്കുന്ന സ്​ഥലത്ത്​ പ്രദേശത്തെ വയോജനങ്ങൾക്ക്​ കൂടി ഉപകാരിക്കപ്പെടും വിധം സൗഹൃദ സദനം പണിയാൻ അനുമതി വേണമെന്ന്​ യോഗം സർക്കാറിനോട്​ ആവശ്യപ്പെട്ടു. ഭരണപക്ഷ അംഗം കെ. നജ്​മയുടെ പ്രമേയം ​കൗൺസിൽ ഏകകണ്ഠമായി അംഗീകരിക്കുകയായിരുന്നു. 

കോഴിക്കോട് നഗരസഭയിൽ വിവിധ പ്രവൃത്തികൾ നടത്തിയയിനത്തിൽ 26 കോടിയുടെ 155 ബില്ലുകൾ ട്രഷറിയിൽ നിന്ന്​ മടങ്ങിയതായി പൊറ്റങ്ങാടി കിഷൻചന്ദ്​, കെ.ടി. ബീരാൻകോയ എന്നിവർ ശ്രദ്ധക്ഷണിച്ചു. ഇടത്​ സർക്കാറല്ലായിരുന്നുവെങ്കിൽ ഇക്കാര്യത്തിൽ ഭരണ പക്ഷം വൻ പ്രതിഷേധമുയർത്തിയേനെയെന്ന്​ പ്രതിപക്ഷം ആരോപിച്ചു. നവ്യഹരിദാസ്​, കെ.കെ. റഫീഖ്​, കെ.സി. ശോഭിത, എം. കുഞ്ഞാമുട്ടി എന്നിവരും വിവിധ വിഷയങ്ങളിൽ ശ്രദ്ധ ക്ഷണിച്ചു. വിധവകളുടെ പെൺമക്കളുടെ വിവാഹ ധനസഹായത്തിനുള്ള വരുമാന പരിധി ഒരു ലക്ഷം രൂപയായി ഉയർത്തണമെന്ന പ്രതിപക്ഷ അംഗം സൗഫിയ അനീഷി​ന്‍റെ പ്രമേയവും യോഗം അംഗീകരിച്ചു. മേയർ തോട്ടത്തിൽ രവീന്ദ്രൻ, ഡെപ്യൂട്ടി മേയർ മീരാ ദർശക്​ എന്നിവരാണ് കൗൺ‌സിൽ യോഗം നിയന്ത്രിച്ചത്.