രാജ്യവിരുദ്ധശക്തികളുമായി ജെഎൻയു വിദ്യാർത്ഥി നേതാക്കൾക്ക് ബന്ധമെന്ന് പ്രതിരോധമന്ത്രി

പാക് സൈനികമേധാവിയെ സിദ്ധു ആലിം​ഗനം ചെയ്ത സംഭവത്തെ വിമർശിച്ച നിർമ്മല സീതാരാമൻ  സൈനികരുടെ മനോവീര്യം കെടുത്തുന്ന ഇത്തരം സംഭവങ്ങൾ ഒഴിവാക്കണമെന്ന് ചൂണ്ടിക്കാട്ടി. 

ദില്ലി: ഇന്ത്യാ വിരുദ്ധ ശക്തികളുമായി  ജെ.എൻ.യു വിദ്യാർത്ഥി യൂണിയൻ നേതാക്കൾക്ക് ബന്ധമുണ്ടെന്ന് കേന്ദ്രപ്രതിരോധമന്ത്രി നിർമലാ സീതാരാമൻ ആരോപിച്ചു. ഇന്ത്യാ  വിരുദ്ധ ശക്തികൾ വിദ്യാർഥികളിലൂടെ ലഘുലേഖ ഉപയോഗിച്ചു രാജ്യത്തിനെതിരെ യുദ്ധം ചെയ്യുകയാണെന്നും അവർ മാധ്യമങ്ങളോടു പറഞ്ഞു. 

കോൺ​ഗ്രസ് നേതാവും പഞ്ചാബ് ടൂറിസം മന്ത്രിയുമായ നവജ്യോത് സിങ് സിന്ധു പാകിസ്താൻ പ്രധാനമന്ത്രി ഇമ്രാൻഖാന്റെ സത്യപ്രതിജ്ഞാ ചടങ്ങിൽ പങ്കെടുത്തതിനെക്കുറിച്ച് അഭിപ്രായം പറയാൻ പ്രതിരോധമന്ത്രി വിസമ്മതിച്ചു. എന്നാൽ പാക് സൈനികമേധാവിയെ സിദ്ധു ആലിം​ഗനം ചെയ്ത സംഭവത്തെ വിമർശിച്ച നിർമ്മല സീതാരാമൻ  സൈനികരുടെ മനോവീര്യം കെടുത്തുന്ന ഇത്തരം സംഭവങ്ങൾ ഒഴിവാക്കണമെന്ന് ചൂണ്ടിക്കാട്ടി.