കഞ്ചാവ് മാഫിയകൾ തമ്മിലുള്ള വെടിവെപ്പ്: മുഖ്യപ്രതി പൊലീസ് പിടിയിൽ

കഞ്ചാവ് കടത്തുമായി ബന്ധപ്പെട്ട് ഇരു സംഘങ്ങൾ തമ്മിൽ വാക്ക് തർക്കം ഉണ്ടാകുകയും വെടിവെപ്പിൽ കലാശിക്കുകയുമായിരുന്നു. പാലക്കുന്ന് സ്വദേശി ഫയാസിനാണ് വെടിയേറ്റത്. വെടിയേൽക്കുന്നത് കെട്ടിടത്തിലെ സിസിടിവി ക്യാമറയിൽ പതിഞ്ഞിരുന്നു. ഫയാസിനെ മംഗാലാപുരത്തെ സ്വകാര്യ ആശുപത്രിയിലെത്തിച്ചതിന് ശേഷം മുഖ്യ പ്രതി കോലാച്ചി നാസർ മുങ്ങുകയായിരുന്നു. 

കാസർ​ഗോഡ്: കഞ്ചാവ് മാഫിയകൾ തമ്മിലുള്ള തർക്കത്തിനിടെ എതിർസംഘാംഗത്തെ വെടി വെച്ച് വീഴ്ത്തിയ കേസിലെ മുഖ്യപ്രതി നാലുമാസത്തിന് ശേഷം പൊലീസ് പിടിയിൽ. കാസർഗോഡ് ബേക്കൽ സ്വദേശി കോലാച്ചി നാസറിനെയാണ് അറസ്റ്റ് ചെയ്തത്. ജൂൺ 25 ന് ബേക്കലിലെ സ്വകാര്യ കെട്ടിടത്തിനകത്ത് വച്ചായിരുന്നു വെടിവെപ്പ്. 

കഞ്ചാവ് കടത്തുമായി ബന്ധപ്പെട്ട് ഇരു സംഘങ്ങൾ തമ്മിൽ വാക്ക് തർക്കം ഉണ്ടാകുകയും വെടിവെപ്പിൽ കലാശിക്കുകയുമായിരുന്നു. പാലക്കുന്ന് സ്വദേശി ഫയാസിനാണ് വെടിയേറ്റത്. വെടിയേൽക്കുന്നത് കെട്ടിടത്തിലെ സിസിടിവി ക്യാമറയിൽ പതിഞ്ഞിരുന്നു. ഫയാസിനെ മംഗാലാപുരത്തെ സ്വകാര്യ ആശുപത്രിയിലെത്തിച്ചതിന് ശേഷം മുഖ്യ പ്രതി കോലാച്ചി നാസർ മുങ്ങുകയായിരുന്നു. 

പ്രതിക്കായി ലുക്ക് ഔട്ട് നോട്ടീസ് പുറത്തിരക്കിയിരുന്നെങ്കിലും പിടികൂടാനായിരുന്നില്ല. ഇയാൾ തിരിച്ചെത്തിയിട്ടുണ്ടെന്നറിഞ്ഞ പൊലീസ് കുറച്ച് ദിവസങ്ങളായി കോട്ടിക്കുളത്തെ വീട് കേന്ദ്രീകരിച്ച് നിരീക്ഷണം ശക്തമാക്കി. ഇതിനിടയിലാണ് പ്രതിയെ പിടികൂടിയത്. സംഭവ ദിവസം തന്നെ ബാഗ്ലൂരിലേക്ക് കടന്ന പ്രതി പിന്നീട് വിദേശത്തേക്ക് രക്ഷപ്പെടുകയായിരുന്നു. നേപ്പാൾ വഴിയാണ് കേരളത്തിലെത്തിയത്. 

കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കോലാച്ചി നാസറിന്റെ സംഘത്തിൽ പെട്ട മറ്റു പ്രതികളെയും പിടികൂടാനുണ്ട്. ഇവരിൽ നിന്നും കഞ്ചാവ് കടത്തുമായി ബന്ധപ്പെട്ട് കൂടുതൽ വിവരങ്ങൾ ലഭിക്കുമെന്ന പ്രതീക്ഷയിലാണ് പൊലീസ്.