മോദി സര്‍ക്കാര്‍ ഒപ്പമുണ്ട്; കേരളത്തിന് ഓണാശംസകള്‍ നേര്‍ന്ന് അമിത് ഷാ

മോദി സര്‍ക്കാരും ബിജെപിയും ജനങ്ങളുടെ സാധാരണമായ ജീവിതം എത്രയും വേഗം ലഭ്യമാക്കുന്നതിന് കഴിയുന്നതെല്ലാം ചെയ്യുമെന്നും അമിത് ഷാ ട്വീറ്റ് ചെയ്തു.

ദില്ലി: തിരുവോണ നാളില്‍ കേരളത്തിന് ഓണാശംസകളുമായി ബിജെപി ദേശീയ അധ്യക്ഷന്‍ അമിത് ഷാ. ഓണത്തിന്‍റെ ഈ നാളുകളില്‍ കേരളത്തിന് എത്രയും വേഗം ഈ ദുരിതത്തില്‍ നിന്ന് കരകയറാന്‍ സാധിക്കട്ടെയെന്ന് പ്രാര്‍ഥിക്കുന്നതായി മലയാളത്തിലുള്ള ആശംസയാണ് അമിത് ഷാ നേര്‍ന്നത്. ഒപ്പം ഈ നാളുകളില്‍ രാജ്യവും മുഴുവന്‍ കേരളത്തിന് ഒപ്പമുണ്ടെന്നും അമിത് ഷാ അറിയിച്ചു.

മോദി സര്‍ക്കാരും ബിജെപിയും ജനങ്ങളുടെ സാധാരണമായ ജീവിതം എത്രയും വേഗം ലഭ്യമാക്കുന്നതിന് കഴിയുന്നതെല്ലാം ചെയ്യുമെന്നും അമിത് ഷാ ട്വീറ്റ് ചെയ്തു. അതേസമയം അതിജീവനത്തിന്‍റെ പോരാട്ടം നടത്തുന്ന കേരളജനത ആഘോഷങ്ങള്‍ ചുരുക്കിയാണ് ഇത്തവണത്തെ ഓണത്തെ വരവേറ്റിരിക്കുന്നത്.

അമിത് ഷായുടെ ആശംസകള്‍ വന്നെങ്കിലും കേരളത്തോടുള്ള കേന്ദ്ര സര്‍ക്കാരിന്‍റെ നയത്തെ ചൊല്ലി കേരളത്തില്‍ വലിയ പ്രതിഷേധങ്ങളാണ് ഉയര്‍ന്നിട്ടുള്ളത്. ആവശ്യങ്ങള്‍ അറിയിച്ചിട്ടും സംസ്ഥാനത്തിന്‍റെ പുനരധിവാസത്തിന് കേന്ദ്രം നല്‍കിയ സഹായം പരിമിതമാണെന്നാണ് ആക്ഷേപം.