അഭിമന്യുവിന്റെ കൊലപാതകം: ഒരു പ്രതി പിടിയിൽ

ക്യാമ്പസ് ഫ്രണ്ട് ജില്ലാ കമ്മിറ്റി അംഗമാണ് പിടിയിലായത് കൃത്യത്തില്‍ പങ്കെടുത്തയാളാണ് പിടിയിലായതെന്ന് പൊലീസ്

കൊച്ചി: മഹാരാജാസ് വിദ്യാര്‍ത്ഥി അഭിമന്യുവിന്‍റെ കൊലപാതക്കേസിൽ കൊലയാളി സംഘത്തിലെ ഒരാൾ പിടിയിൽ. ആലുവ സ്വദേശിയായ കാമ്പസ് ഫ്രണ്ട് ജില്ലാ കമ്മിറ്റി അംഗമായ ആദിലാണ് അറസ്റ്റിലായത്. കൃത്യത്തിൽ നേരിട്ട് പങ്കെടുത്ത ഒരാളെ പൊലീസ് പിടികൂടുന്നത് ഇതാദ്യമായിട്ടാണ്.

അഭിമന്യുവിന്‍റെ കൊലപാതകം നടന്ന് രണ്ടാഴ്ചക്കുശേഷമാണ് കൃത്യത്തിൽ നേരിട്ട് പങ്കെടുത്തയാൾ പൊലീസ് പിടിയിലാകുന്നത്. സംഭവത്തിൽ ഉൾപ്പെട്ട മൂന്നുപേരെ നേരത്തെ അറസ്റ്റുചെയ്തെങ്കിലും എസ് എഫ്ഐ വിദ്യാർഥികളാണ് അവരെ പിടിച്ചു പൊലീസിന് നൽകിയത്. കൊലപാതകത്തിന്‍റെ ഗൂഡാലോചനയിലടക്കം പങ്കുളളയാളാണ് ഇപ്പോൾ അറസ്റ്റിലായ കാമ്പസ് ഫ്രണ്ട് നേതാവെന്ന് പൊലീസ് അറിയിച്ചു. ഇതോടെ  കേസിൽ അറസ്റ്റിലായവരുടെ എണ്ണം പത്തായി. സംഭവത്തിനുപിന്നാലെ ഒളിവിൽ പോയ പ്രതിയെ ജില്ലയ്ക്ക് വെളിയിൽനിന്നാണ് അന്വേഷണ സംഘം അറസ്റ്റുചെയ്തത്. 

എന്നാൽ കൊലയാളിയേയോ മുഖ്യ ആസൂത്രകനായ മഹാജാരാജാസ് കോളജ് വിദ്യാ‍ർഥി മുഹമ്മദിനെയോ പിടികൂടാൻ പൊലീസിനെ ഇതുവരെ കഴിഞ്ഞിട്ടില്ല. കൃത്യത്തിൽ നേരിട്ട് പങ്കെടുത്ത 11 പേർ കൂടി ഇനി അറസ്റ്റിലാകാനുണ്ട്. ഇതിനിടെ പൊലീസിനെ ന്യായീകരിച്ച് സിപിഎം നേതാക്കൾ രംഗത്തെത്തി. അന്വേഷണത്തിൽ തങ്ങൾക്ക്  പരാതിയില്ലെന്നും പ്രധാന പ്രതികളെ പിടിക്കാത്തതിൽ സിപിഎമ്മിൽ അംസംതൃപ്തിയില്ലെന്നുമാണ് നിലപാട്. 

ഇപ്പോഴത്തെ നിലയിൽ അന്വേഷണത്തെ വിമർ‍ശിക്കരുതെന്നാണ് പാർട്ടി മേൽ ഘടകത്തിൽ നിന്ന് ജില്ലയിലെ നേതാക്കൾക്ക് ലഭിച്ചിരിക്കുന്ന നിർദേശം. തളളിപ്പറഞ്ഞാൽ അത് മുഖ്യമന്ത്രിക്കും ആഭ്യന്തര വകുപ്പിനും പൊതുവിൽ പാർട്ടിക്കുതന്നെയും നാണക്കേടാകും. പ്രതികളെ പൊലീസ് പിടിക്കട്ടേയെന്നും തങ്ങൾ അഭിമന്യുവിന്‍റെ സ്വപ്നങ്ങൾ യാഥാർഥ്യമാക്കാനുളള യാത്രയിലെന്നുമാണ് നേതാക്കളുടെ നിലപാട്.