വനിതാ മതില് വര്ഗീയ ശക്തികള്ക്കുള്ള താക്കീത്, സ്ത്രീകള് പുരോഗമന ചിന്തയ്ക്കൊപ്പം, ചരിത്ര വിജയമെന്ന് മുഖ്യമന്ത്രി
Synopsis
വനിതാ മതില് ചരിത്രവിജയമെന്ന് മുഖ്യമന്ത്രി പിണറായി വിജയന്. നവോത്ഥാന മൂല്യങ്ങള് സംരക്ഷിക്കാന് സംഘടിപ്പിച്ച വനിതാ മതിലില് പങ്കെടുത്ത കേരളത്തിലെ സ്ത്രീസമൂഹത്തെ മുഖ്യമന്ത്രി പിണറായി വിജയന് അഭിവാദ്യം ചെയ്തു.
തിരുവനന്തപുരം: വനിതാ മതില് ചരിത്രവിജയമെന്ന് മുഖ്യമന്ത്രി പിണറായി വിജയന്. നവോത്ഥാന മൂല്യങ്ങള് സംരക്ഷിക്കാന് സംഘടിപ്പിച്ച വനിതാ മതിലില് പങ്കെടുത്ത കേരളത്തിലെ സ്ത്രീസമൂഹത്തെ മുഖ്യമന്ത്രി പിണറായി വിജയന് അഭിവാദ്യം ചെയ്തു. യാഥാസ്ഥിതിക, വര്ഗീയ ശക്തികള്ക്ക് മതില് താക്കീതെന്നും പിണറായി വിജയന് പറഞ്ഞു. കേരളത്തിലെ സ്ത്രീസമൂഹം പുരോഗമന ചിന്തയ്ക്ക് ഒപ്പമെന്നും അദ്ദേഹം പറഞ്ഞു.
കൃത്യം ഒരു മാസം കൊണ്ടാണ് 620 കിലോ മീറ്റര് ദൂരം സ്ത്രീകളുടെ വന്മതില് തീര്ക്കുന്നതിനുളള പ്രവര്ത്തനം നടത്തിയത്. വനിതാ മതില് സമാനതകളില്ലാത്ത സ്ത്രീമുന്നേറ്റമാക്കുന്നതിന് പിന്തുണ നല്കിയ സാമൂഹിക-രാഷ്ട്രീയ പ്രസ്ഥാനങ്ങളെയും മുഖ്യമന്ത്രി അഭിനന്ദിച്ചു. സത്രീകള്ക്ക് ഭരണഘടന ഉറപ്പുനല്കുന്ന അവകാശങ്ങള് സംരക്ഷിക്കാനും ലിംഗനീതി നിഷേധിക്കാനുളള കടന്നാക്രമണങ്ങളെ പ്രതിരോധിക്കാനും സ്ത്രീകള് നടത്തിയ ഇന്ത്യയിലെ ഏറ്റവും വലിയ മുന്നേറ്റമായി വനിതാ മതില് മാറി.
നവോത്ഥാന മൂല്യങ്ങളും സ്ത്രീകള്ക്ക് ഭരണഘടന ഉറപ്പുനല്കുന്ന അവകാശങ്ങളും നിഷേധിക്കാന് സംഘടിതമായി ശ്രമിക്കുന്ന യാഥാസ്ഥിതിക-വര്ഗീയ ശക്തികള്ക്ക് വലിയൊരു താക്കീതാണ് വനിതാമതില്. കേരളത്തിലെ സ്ത്രീസമൂഹം പുരോഗമന ചിന്തയ്ക്കൊപ്പമാണെന്നതിന്റെ മഹാവിളംബരമായി വനിതാ മതില് മാറി. എല്ലാ കണക്കുകൂട്ടലുകളെയും തെറ്റിച്ച് ജാതി-മത-രാഷ്ട്രീയ വ്യത്യാസമില്ലാതെ കേരളത്തിലെ സ്ത്രീസമൂഹം ഒന്നാകെ വനിതാ മതിലിനൊപ്പം നിന്നു. എതിര്പ്പുകളെയും അപവാദ പ്രചാരണങ്ങളെയും അവഗണിച്ച് വനിതാ മതിലില് അണിചേര്ന്ന സ്ത്രീസമൂഹം കേരളത്തിന്റെ അന്തസ്സും അഭിമാനവും ഉയര്ത്തിയിരിക്കയാണെന്നും മുഖ്യമന്ത്രി പറഞ്ഞു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam