എല്ലാം പൂർത്തിയായി; മൂന്ന് സംസ്ഥാനങ്ങളിലെ കാർഷിക കടങ്ങൾ എഴുതിത്തള്ളി രാഹുൽ ​ഗാന്ധിയുടെ ട്വീറ്റ്

''അത് പൂർത്തിയായി. രാജസ്ഥാനും മധ്യപ്രദേശും ഛത്തീസ്​ഗഡും കാർഷിക വായ്പകളിൽ നിന്ന് മുക്തമായിരിക്കുകയാണ്. പത്ത് ദിവസമാണ് ഞങ്ങൾ ചോദിച്ചത്. എന്നാൽ രണ്ട് ദിവസം കൊണ്ട് അത് പൂർത്തിയാക്കാൻ ഞങ്ങൾക്ക് സാധിച്ചു.'' രാഹുൽ ​ഗാന്ധിയുടെ ട്വീറ്റിൽ പറയുന്നു. 

ദില്ലി‌: രാജസ്ഥാനിലും മധ്യപ്രദേശിലും ഛത്തീസ്​ഗഡിലും കാർ‌ഷിക വായ്പകൾ എഴുതിത്തള്ളിയ‌തായി കോൺ​ഗ്രസ് അധ്യക്ഷൻ രാഹുൽ ​ഗാന്ധി. ട്വിറ്ററിലാണ് ഈ സന്തോഷം രാഹുൽ ​ഗാന്ധി പങ്ക് വച്ചത്. അഞ്ച് സംസ്ഥാനങ്ങളിൽ നടന്ന നിയമസഭാ തെരഞ്ഞെടുപ്പിൽ മൂന്നിടത്തും കോൺ​ഗ്രസ് നേടിയത് ഉജ്ജ്വല വിജയമാണ്. കോൺ​ഗ്രസിന് അധികാരം ലഭിച്ചാൽ പത്ത് ​ദിവസത്തിനുള്ളിൽ കർഷകരുടെ വായ്പകൾ എഴുതിത്തള്ളുമെന്നായിരുന്നു തെര‍ഞ്ഞെടുപ്പ് വാ​ഗ്ദാനം. 

''അത് പൂർത്തിയായി. രാജസ്ഥാനും മധ്യപ്രദേശും ഛത്തീസ്​ഗഡും കാർഷിക വായ്പകളിൽ നിന്ന് മുക്തമായിരിക്കുകയാണ്. പത്ത് ദിവസമാണ് ഞങ്ങൾ ചോദിച്ചത്. എന്നാൽ രണ്ട് ദിവസം കൊണ്ട് അത് പൂർത്തിയാക്കാൻ ഞങ്ങൾക്ക് സാധിച്ചു.'' രാഹുൽ ​ഗാന്ധിയുടെ ട്വീറ്റിൽ പറയുന്നു. രാജസ്ഥാനിൽ അശോക് ​ഗെഹ്ലോട്ട് മുഖ്യമന്ത്രിയായി സ്ഥാനമേറ്റ് രണ്ട് മണിക്കൂറിനുള്ളിൽ തന്നെ രണ്ട് ലക്ഷം രൂപ താഴെയുളള കാർഷിക വായ്പകൾ എഴുതിത്തള്ളിയതായി പ്രഖ്യാപിച്ചിരുന്നു. മധ്യപ്രദേശിൽ മുഖ്യമന്ത്രി കമൽനാഥും ഛത്തീസ്​ഗഡിൽ ഭൂപേഷ് ബാ​ഗലും സത്യപ്രതിജ്ഞ ചെയ്ത് മണിക്കൂറിനുള്ളിൽ കാർഷിക വായ്പകൾ എഴുതിത്തള്ളിയിരുന്നു.

കാർഷിക വായ്പകൾ എഴുതിത്തള്ളാതെ മോദിയെ ഉറങ്ങാൻ അനുവദിക്കില്ലെന്ന് കഴിഞ്ഞ ദിവസം രാഹുൽ ​ഗാന്ധി പ്രഖ്യാപിച്ചിരുന്നു. കോൺ​ഗ്രസിന്റെ ചരിത്രപരമായ തീരുമാനത്തിലൂടെ കേന്ദ്ര സർക്കാരിനെ പ്രതിരോധത്തിലാക്കുകയാണ് കോൺ​ഗ്രസ് പാർട്ടി. പ്രധാനമന്ത്രി ഉറക്കത്തിലാണെന്നും കോൺ​ഗ്രസ് ഉണർത്തുമെന്നുമാണ് ​രാഹുൽ ​ഗാന്ധിയുടെ വാക്കുകൾ.