യുവതിയെ അയല്‍വാസി വീട്ടില്‍ കയറി ബലാത്സംഗം ചെയ്യാന്‍ ശ്രമിച്ചു; തെരുവ് നായ രക്ഷകനായെത്തി

യുവതി നല്‍കിയ ഭക്ഷണം കഴിച്ച് വീടിന് സമീപത്ത് കിടന്നിരുന്ന തെരുവ് നായ ശബ്ദം കേട്ട് ഓടിയെത്തി, യുവിവിന് നേരെ കുരച്ച് ചാടി. ഇതോടെ ഇയാള്‍ ഭയന്ന് യുവതിയെ വിട്ട് പുറത്ത് ചാടി. 

ഭോപ്പാല്‍: ഭോപ്പാലില്‍ യുവതിയെ ബലാത്സംഗ ശ്രമത്തില്‍ നിന്നും രക്ഷപ്പെടുത്തി തെരുവ് നായ. 29 കാരിയായ യുവതിയെ അയല്‍വാസിയുടെ ആക്രമണത്തില്‍ നിന്നാണ് തെരുവ് നായ രക്ഷിച്ചത്. തന്‍റെ വീടിനടുത്ത് കഴിഞ്ഞിരുന്ന നായയ്ക്ക് യുവതി എല്ലാ ദിവസവും ഭക്ഷണം നല്‍കിയിരുന്നു. ഒടുവില്‍ അപകട ഘട്ടത്തില്‍ തുണയായി ഈ തെരുവുനായ എത്തുകയായിരുന്നു. ദേശീയ മാധ്യമമാണ് സംഭവം റിപ്പോര്‍ട്ട് ചെയ്തിരിക്കുന്നത്.

കഴിഞ്ഞ ഞായറാഴ്ചയാണ് പീഡന ശ്രമം നടന്നത്. യുവതി വീട്ടില്‍ തനിച്ചുള്ള സമയത്ത് വീട്ടിലെത്തിയ അയല്‍വാസിയായ യുവാവ് വാതിലില്‍ മുട്ടി വിളിച്ചു. യുവതി എത്തി വാതില്‍ തുറക്കവേ വാതില്‍ അകത്തേക്ക് തള്ളി   കടന്ന് പിടിച്ച് ബലാത്സംഗത്തിന് മുതിരുകയായിരുന്നു. മദ്യലഹരിയിലായിരുന്ന യുവാവ് യുവതിയെ കീഴ്‍പ്പെടുത്താന്‍ ശ്രമിക്കുന്നതിനിടെയാണ് തെരുവ് നായ രക്ഷകനായെത്തിയത്.

യുവതി നല്‍കിയ ഭക്ഷണം കഴിച്ച് വീടിന് സമീപത്ത് കിടന്നിരുന്ന തെരുവ് നായ ശബ്ദം കേട്ട് ഓടിയെത്തി, യുവാവിന് നേരെ കുരച്ച് ചാടി. ഇതോടെ ഇയാള്‍ ഭയന്ന് യുവതിയെ വിട്ട് ഓടി. പുറത്തിറങ്ങിയ യുവാവ് നായയെ കുത്തിപ്പരുക്കേല്‍പ്പിച്ച് രക്ഷപ്പെടുകയായിരുന്നു. തുടര്‍ന്ന് യുവതി അടുത്തുള്ള പൊലീസ് സ്റ്റേഷനിലെത്തി പരാതി നല്‍കി. സംഭവത്തില്‍ പൊലീസ് സുനില്‍ എന്ന യുവാവിനെതിരെ കേസെടുത്ത് അന്വേഷണം ആരംഭിച്ചു.