പെൺകടുവയെ ട്രാക്റ്റർ കൊണ്ട് കൊന്ന സംഭവം; നഖങ്ങളും മുൻപല്ലും ഊരിയെടുക്കാൻ ശ്രമിച്ചു

കൊന്നു കഴിഞ്ഞതിന് ശേഷം കടുവയുടെ മുൻപല്ലും നഖങ്ങളും ഊരിയെടുക്കാൻ ​ഗ്രാമീണർ ശ്രമിച്ചതായും റിപ്പോർ‌ട്ടിൽ പറയുന്നു. ​​കിഷൻപൂർ വന്യമൃ​ഗസം​രക്ഷണ കേന്ദ്രത്തിന്  സമീപമുള്ള ചൽത്തുവാ ​ഗ്രാമത്തിൽ നിന്നുള്ളവരാണ് സംഭവത്തിലെ പ്രതികളെന്ന് പൊലീസ് വ്യക്തമാക്കി. 

ലഖ്നൗ: ഉത്തർ പ്രദേശിലെ ദുധ്വാ ‍‍ടൈ​ഗർ റിസ്സർവ്വിൽ പെൺകടുവയെ ട്രാക്റ്റർ ഉപയോ​ഗിച്ച് ഇടിച്ചു കൊന്നതിന്റെ എഫ്ഐആർ റിപ്പോർട്ട് പുറത്ത്. കൊല്ലുന്നതിന് മുമ്പും കൊന്ന് കഴിഞ്ഞതിന് ശേഷം കടുവയെ ​ഗ്രാമീണർ അതിക്രൂരമായി ഉപദ്രവിച്ചിരുന്നെന്ന് എഫ്ഐആർ റിപ്പോർട്ടിൽ പറയുന്നു. ​ഗ്രാമീണർ കൂട്ടം ചേർന്ന് ട്രാക്റ്റർ ഉപയോ​ഗിച്ച് ഇടിച്ചും ചതച്ചുമാണ് കടുവയെ കൊന്നതെന്ന് ടൈ​ഗർ റിസർവ്വ് ഫീൽഡ് ഡയറക്ടർ രമേഷ് കുമാർ പാണ്ഡെ വ്യക്തമാക്കി. സംഭവത്തിൽ പേരുൾപ്പെടെ ആറ് പേരെയും കണ്ടാൽ തിരിച്ചറിയാവുന്നവരെയും ഉൾപ്പെടുത്തി  വന്യജീവി സം​രക്ഷണ നിയമപ്രകാരം കേസെടുത്തിട്ടുള്ളതായി അദ്ദേഹം അറിയിച്ചു. 

കൊന്നു കഴിഞ്ഞതിന് ശേഷം കടുവയുടെ മുൻപല്ലും നഖങ്ങളും ഊരിയെടുക്കാൻ ​ഗ്രാമീണർ ശ്രമിച്ചതായും റിപ്പോർ‌ട്ടിൽ പറയുന്നു. ​​കിഷൻപൂർ വന്യമൃ​ഗസം​രക്ഷണ കേന്ദ്രത്തിന്  സമീപമുള്ള ചൽത്തുവാ ​ഗ്രാമത്തിൽ നിന്നുള്ളവരാണ് സംഭവത്തിലെ പ്രതികളെന്ന് പൊലീസ് വ്യക്തമാക്കി. കൊല്ലപ്പെട്ട പെൺകടുവയ്ക്ക് ഏകദേശം അഞ്ച് വയസ്സ് പ്രായമുണ്ട്. 

തങ്ങളിലൊരാളെ ആക്രമിച്ചതിന് പ്രതികാരമെന്ന പോലെയാണ് ​ഗ്രാമവാസികൾ എല്ലാവരും ചേർന്ന് കടുവയെ അതിക്രൂരമായി കൊന്നുകളഞ്ഞതെന്ന് ടൈ​ഗർ റിസർവ്വ് ഡെപ്യൂട്ടി ‍ഡയറക്ടർ മഹാവീർ കൗജില​ഗ് വെളിപ്പെടുത്തിയിരുന്നു. അമ്പത് വയസ്സുള്ള ആളെയാണ് കടുവ ആക്രമിച്ചത്. പരിക്കേറ്റ വ്യക്തിയെ ഉടൻ തന്നെ ഹോസ്പിറ്റലിലെത്തിക്കാനുള്ള തിരക്കിലായിരുന്നു ഉദ്യോ​ഗസ്ഥർ. അതേ സമയം ​ഗ്രാമവാസികൾ എല്ലാവരും സംഘം ചേരുകയും കടുവയെ ട്രാക്റ്റർ കൊണ്ട് ചതച്ച് കൊല്ലുകയുമായിരുന്നു.

സംരക്ഷിത മേഖലയ്ക്കുള്ളിൽ വച്ച് കടുവ ആക്രമിക്കപ്പെട്ടത് ​ഗുരുതരമായ കുറ്റകൃത്യമാണെന്നും വന്യമൃ​ഗസംരക്ഷണ കേന്ദ്രത്തിലെ ഉദ്യോ​ഗസ്ഥർ പറയുന്നു. തങ്ങളുടെ സ്വാഭാവിക വാസസ്ഥലം നഷ്ടപ്പെടുമ്പോഴാണ് വന്യമൃ​ഗങ്ങൾ നാട്ടിലിറങ്ങി മനുഷ്യരെയും വളർത്തുമൃ​ഗങ്ങളെയും ആക്രമിക്കുന്നതെന്ന് വേൾഡ് വൈൽഡ്ലൈഫ് ഫണ്ട് വ്യക്തമാക്കുന്നു. വന്യമൃ​ഗങ്ങളുടെ ആവാസ വ്യവസ്ഥ മാനിക്കപ്പെടേണ്ടതാണെന്നും ഇവർ കൂട്ടിച്ചേർത്തു.