ദേശീയ കായിക പുരസ്‌കാര നിർണയ സമിതിയിൽ സെവാഗ്

ദേശീയ കായിക പുരസ്‌കാരങ്ങള്‍ക്കായി റെക്കോര്‍ഡ് അപേക്ഷകളാണ് ഇക്കുറി ലഭിച്ചിരിക്കുന്നത്

ദില്ലി: ഇത്തവണത്തെ ദേശീയ കായിക പുരസ്കാര നിർണയ സമിതിയിൽ ക്രിക്കറ്റ് താരം വീരേന്ദർ സെവാഗും. ഖേൽരത്ന അടക്കമുള്ള പുരസ്കാരം നിർണയിക്കുന്നതിനുള്ള 12 അംഗ സമിതിയിൽ ഹോക്കി മുൻ ക്യാപ്റ്റൻ സർദാർ സിംഗും പാരാലിമ്പിക്സ് താരം ദീപാ മാലിക്കുണ്ട്. സുപ്രീം കോടതി മുൻ ജഡ്ജി മുകുന്ദം ശർമ്മയാണ് സമിതി അധ്യക്ഷൻ.

ദേശീയ കായിക പുരസ്‌കാരങ്ങള്‍ക്കായി റെക്കോര്‍ഡ് അപേക്ഷകളാണ് ഇക്കുറി ലഭിച്ചിരിക്കുന്നത്. ഖേൽരത്നക്കായി 42 പേരും അര്‍ജുനക്കായി 215 പേരും ധ്യാന്‍ചന്ദിനായി 81 പേരും ദ്രോണാചാര്യക്കായി 137 പേരും അപേക്ഷിച്ചിട്ടുണ്ട്. ഓഗസ്റ്റ് 29ന് ദേശീയ കായിക ദിനത്തില്‍ രാഷ്‌ട്രപതിഭവനിലാണ് അവാര്‍ഡ് വിതരണ ചടങ്ങ് നടക്കേണ്ടത്. എന്നാല്‍ കൊവിഡ് 19 മഹാമാരിയുടെ പശ്ചാത്തലത്തില്‍ ചടങ്ങ് നടക്കുമോ എന്ന് വ്യക്തമല്ല.