ഒറിജിനലിനെ വെല്ലുന്ന 'ബ്രാൻഡഡ്' വാച്ചുകളും പഴ്സുകളും ഹാൻഡ് ബാഗുകളും, പരിശോധനയിൽ എല്ലാം വ്യാജൻ, പിടികൂടിയത് 381 ഉൽപ്പന്നങ്ങൾ

നിയമലംഘകരെ പിടികൂടുന്നതിനും കർശനമായ നിയമം നടപ്പാക്കുന്നതിനും മന്ത്രാലയം നടത്തുന്ന നിരന്തര ശ്രമങ്ങളുടെ ഭാഗമാണിതെന്ന് കൊമേഴ്സ്യൽ കൺട്രോൾ ഡിപ്പാർട്ട്‌മെൻ്റ് ഡയറക്ടർ ഫൈസൽ അൽ അൻസാരി പറഞ്ഞു.

കുവൈത്ത് സിറ്റി: കുവൈത്തിലെ ഫര്‍വാനിയ ഗവർണറേറ്റിൽ വാണിജ്യ, വ്യവസായ മന്ത്രാലയത്തിന്‍റെ കൊമേഴ്സ്യൽ കൺട്രോൾ ഡിപ്പാർട്ട്മെന്റ് നടത്തിയ പരിശോധനയിൽ 381 വ്യാജ ഉൽപ്പന്നങ്ങൾ പിടിച്ചെടുത്തു. നിയമലംഘകരെ പിടികൂടുന്നതിനും കർശനമായ നിയമം നടപ്പാക്കുന്നതിനും മന്ത്രാലയം നടത്തുന്ന നിരന്തര ശ്രമങ്ങളുടെ ഭാഗമാണിതെന്ന് കൊമേഴ്സ്യൽ കൺട്രോൾ ഡിപ്പാർട്ട്‌മെൻ്റ് ഡയറക്ടർ ഫൈസൽ അൽ അൻസാരി പറഞ്ഞു.

അന്താരാഷ്ട്ര ബ്രാൻഡുകളുടെ പേരിലുള്ള വ്യാജ ഉൽപ്പന്നങ്ങളാണ് പിടിച്ചെടുത്തവയിൽ കൂടുതലും. വ്യാജ വാച്ചുകൾ, പഴ്സുകൾ, വനിതാ ഹാൻഡ്ബാഗുകൾ, തൊപ്പികൾ എന്നിവയും ഇതിൽ ഉൾപ്പെടുന്നു. വിലനിലവാരം ഉറപ്പാക്കുക, കൃത്രിമമായി വില വർദ്ധിപ്പിക്കുന്നത് തടയുക, ഉൽപ്പന്നങ്ങളുടെ ഗുണനിലവാരം ഉറപ്പാക്കുക, നിർമ്മാണ രാജ്യം പരിശോധിക്കുക, വാണിജ്യ പ്രവർത്തനങ്ങളെ നിയന്ത്രിക്കുന്ന എല്ലാ നിയമങ്ങളും നടപ്പാക്കുക എന്നിവയും മന്ത്രാലയത്തിന്റെ പരിശോധനകളുടെ ഭാഗമാണ്.

ഉപഭോക്താക്കളെ സംരക്ഷിക്കുന്നതിനും കുവൈത്ത് നിയമങ്ങളും മാനദണ്ഡങ്ങളും അനുസരിച്ച് വിപണി പ്രവർത്തിക്കുന്നുണ്ടെന്ന് ഉറപ്പാക്കുന്നതിനും മന്ത്രാലയം പ്രതിജ്ഞാബദ്ധമാണെന്ന് അൽ അൻസാരി വ്യക്തമാക്കി. എല്ലാത്തരം വാണിജ്യപരമായ നിയമലംഘനങ്ങളും നിരീക്ഷിക്കാൻ ഫീൽഡ് കാമ്പയിനുകൾ തുടരുമെന്നും അദ്ദേഹം കൂട്ടിച്ചേർത്തു.