Bahrain Entry Rules: ബഹ്റൈനിലെത്തുന്ന യാത്രക്കാര്ക്ക് കൊവിഡ് പരിശോധനയും ക്വാറന്റീനും വേണ്ട
Synopsis
ബഹ്റൈനില് കൊവിഡ് പ്രതിരോധ ചുമതലയുള്ള ടാസ്ക് ഫോഴ്സ് നല്കിയ ശുപാര്ശകള് ഗവണ്മെന്റ് എക്സിക്യൂട്ടീവ് കമ്മിറ്റി അംഗീകരിക്കുകയായിരുന്നു. തുടര്ന്നാണ് സിവില് ഏവിയേഷന് വിഭാഗം കഴിഞ്ഞ ദിവസം രാത്രി ഇത് സംബന്ധിച്ച അറിയിപ്പ് പുറത്തിറക്കിയത്.
മനാമ: ബഹ്റൈനില് നിലവിലുണ്ടായിരുന്ന കൊവിഡ് നിബന്ധനകളില് (Covid restrictions) അധികൃതര് കൂടുതല് ഇളവുകള് പ്രഖ്യാപിച്ചു. ബഹ്റൈന് അന്താരാഷ്ട്ര വിമാനത്താവളത്തില് (Bahrain International Airport) എത്തുന്നവര്ക്ക് ഞായറാഴ്ച മുതല് രാജ്യത്ത് പ്രവേശിക്കാന് ഇനി കൊവിഡ് പി.സി.ആര് പരിശോധന (Covid PCR Test) നടത്തേണ്ട ആവശ്യമില്ല. രാജ്യത്ത് പ്രവേശിച്ച ശേഷമുള്ള നിര്ബന്ധിത ക്വാറന്റീനും (Precautionary quarantine) ഒഴിവാക്കി.
രാജ്യത്തെ സിവില് ഏവിയേഷന് വിഭാഗം കഴിഞ്ഞ ദിവസം രാത്രിയാണ് പുതിയ ഇളവുകള് സംബന്ധിച്ച പ്രഖ്യാപനം നടത്തിയത്. ബഹ്റൈനില് കൊവിഡ് പ്രതിരോധ ചുമതലയുള്ള ടാസ്ക് ഫോഴ്സ് നല്കിയ ശുപാര്ശകള് ഗവണ്മെന്റ് എക്സിക്യൂട്ടീവ് കമ്മിറ്റി അംഗീകരിക്കുകയായിരുന്നു. തുടര്ന്നാണ് സിവില് ഏവിയേഷന് വിഭാഗം കഴിഞ്ഞ ദിവസം രാത്രി ഇത് സംബന്ധിച്ച അറിയിപ്പ് പുറത്തിറക്കിയത്.
രാജ്യത്ത് കൊവിഡ് പോസിറ്റീവാകുന്നവരുമായി സമ്പര്ക്കത്തില് വരുന്നവര്ക്ക് ബാധകമായ പ്രോട്ടോകോളിലും മാറ്റം വരുത്തിയിട്ടുണ്ട്. നിലവില് കൊവിഡ് ബാധിച്ചവരുമായി സമ്പര്ക്കത്തില് വന്നവര്ക്ക് ഇനി മുതല് ക്വാറന്റീന് നിര്ബന്ധമില്ല. BeAware മൊബൈല് ആപ്ലിക്കേഷനില് ഗ്രീന് സ്റ്റാറ്റസ് ഇല്ലാത്തവര്ക്കും കൊവിഡ് പോസിറ്റീവായവരുമായി സമ്പര്ക്കത്തില് വന്നാല് ക്വാറന്റീന് നിര്ബന്ധമില്ല.
പുതിയ നിബന്ധനകള് പ്രകാരം സമ്പര്ക്കത്തിലുള്ളവര്ക്ക് രോഗ ലക്ഷണങ്ങള് പ്രകടമാവുന്നുണ്ടെല് മാത്രമേ പരിശോധന നടത്തേണ്ടതുള്ളൂ. സമ്പര്ക്കത്തിലുള്ളവര്ക്ക് രോഗലക്ഷണങ്ങള് പ്രകടമായാല് ഉടന് തന്നെ റാപ്പിഡ് പരിശോധന നടത്തണം. ഈ പരിശോധനയില് പോസിറ്റീവായാല് ഏതെങ്കിലുമൊരു ഡ്രൈവ് ത്രൂ പരിശോധനാ കേന്ദ്രത്തിലെത്തി പി.സി.ആര് പരിശോധന നടത്താം. അതല്ലെങ്കില് സ്വകാര്യ ആശുപത്രികളില് പോയും പരിശോധിക്കാം. 444 എന്ന നമ്പറില് വിളിച്ചോ അല്ലെങ്കില് BeAware മൊബൈല് ആപ്ലിക്കേഷന് വഴിയോ പരിശോധനയ്ക്കുള്ള അപ്പോയിന്റ്മെന്റ് എടുക്കാം.
രാജ്യത്ത് കൊവിഡ് വാക്സിനേഷന്റെയും ബൂസ്റ്റര് ഡോസിന്റെയും ഫലപ്രാപ്തി സംബന്ധിച്ച് നടത്തിയ വിലയിരുത്തലുകള്ക്കൊടുവിലാണ് നിയന്ത്രണങ്ങളില് ഇളവ് അനുവദിച്ചിരിക്കുന്നത്. വാക്സിനേഷന് ശേഷം ജനങ്ങള്ക്ക് കൊവിഡിനെതിരായ പ്രതിരോധ ശേഷി വര്ദ്ധിച്ചിട്ടുണ്ടെന്ന് കണ്ടെത്തിയിട്ടുണ്ട്. എന്നാല് വ്യക്തികള് കൊവിഡ് പ്രതിരോധത്തിനായി മാസ്ക് ധരിക്കുന്നത് ഉള്പ്പെടെയുള്ള സുരക്ഷാ നടപടികള് തുടര്ന്നും സ്വീകരിക്കണം.
അതേസമയം രാജ്യത്ത് ഒന്പത് കമ്പനികളുടെ കൂടി റാപ്പിഡ് കൊവിഡ് പരിശോധനാ കിറ്റുകള് ഉടന് തന്നെ ലഭ്യമാവുമെന്ന് ആരോഗ്യ മേഖലയിലെ ഉയര്ന്ന ഉദ്യോഗസ്ഥ പറഞ്ഞു. കൊവിഡ് പരിശോധനാ കിറ്റുകള്ക്ക് വിപണിയില് ആവശ്യക്കാര് വര്ദ്ധിക്കുന്ന സാഹചര്യത്തിലാണ് കിറ്റുകള് കൂടുതലായി എത്തിക്കാനുള്ള നടപടികള് സ്വീകരിക്കുന്നത്. വരും ദിവസങ്ങളില് കുടുതല് ടെസ്റ്റ് കിറ്റുകള് രാജ്യത്ത് എത്തുമെന്നും നാഷണല് ഹെല്ത്ത് റെഗുലേറ്ററി അതോരിറ്റി ചീഫ് എക്സിക്യൂട്ടീവ് ഡോ. മറിയം അല് ജലാമ പറഞ്ഞു.
റിയാദ്: ഇന്ത്യയിലേക്ക് യാത്ര ചെയ്യുന്നതിന് സൗദി പൗരന്മാര്ക്ക് വീണ്ടും വിലക്ക് (Travel ban) ഏര്പ്പെടുത്തി. കൊവിഡ് (covid) കാരണം സൗദി പൗരന്മാര്ക്ക് (Saudi Citizens) പോകാന് പാടില്ലാത്ത രാജ്യങ്ങളുടെ പട്ടികയില് സൗദി പൗസ്പോര്ട്ട് ഡയറക്ടറേറ്റ് (ജവാസത്ത്) ഇന്ത്യയെ വീണ്ടും ഉള്പ്പെടുത്തിയത്. കൊവിഡ് വ്യാപനം കുറയുകയും ഭീഷണി അകലുകയും ചെയ്ത സാഹചര്യത്തില് ഇന്ത്യയുടെ പേര് നിരോധിത രാജ്യങ്ങളുടെ പട്ടികയില് നിന്ന് നീക്കം ചെയ്തിരുന്നു. എന്നാല് പുതുക്കിയ പട്ടികയില് ഇന്ത്യയുണ്ട്.
ലബനാന്, തുര്ക്കി, യമന്, സിറിയ, ഇന്തോനേഷ്യ, ഇറാന്, അര്മേനിയ, കോംഗോ, ലിബിയ, ബലാറസ്, വിയറ്റ്നാം, എത്യോപ്യ, സോമാലിയ, അഫ്ഗാനിസ്ഥാന്, വെനിസ്വേല എന്നീ രാജ്യങ്ങളിലേക്കാണ് സൗദി പൗരന്മാര്ക്ക് യാത്രാവിലക്കുള്ളത്. ഈ രാജ്യങ്ങളില് നിന്ന് സൗദിയിലേക്കും സമാനമായ യാത്രാവിലക്കുണ്ടാവും എന്നാണ് കരുതുന്നത്. ഇക്കാര്യത്തില് വ്യക്തത വന്നിട്ടില്ല.
ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam