ചെറിയ പെരുന്നാള്‍; നാളെ മുതല്‍ ബാങ്ക് അവധി ആരംഭിക്കും, പ്രധാന അറിയിപ്പ് നൽകി ഖത്തര്‍ സെന്‍ട്രല്‍ ബാങ്ക്

വാരാന്ത്യ അവധി കൂടി കഴിഞ്ഞ ശേഷം ഏപ്രില്‍ 14 ഞായറാഴ്ച ആകും പിന്നീട് പ്രവൃത്തി ദിവസം പുനരാരംഭിക്കുക.

ദോഹ: ഖത്തറില്‍ ബാങ്കുകള്‍ ഉള്‍പ്പെടെ ധനകാര്യ സ്ഥാപനങ്ങള്‍ക്ക് ചെറിയ പെരുന്നാളിനോട് അനുബന്ധിച്ചുള്ള അവധി ചൊവ്വാഴ്ച ആരംഭിക്കും. ഖത്തര്‍ സെന്‍ട്രല്‍ ബാങ്കാണ് ഇക്കാര്യം അറിയിച്ചത്. ചൊവ്വ, ബുധന്‍, വ്യാഴം ദിവസങ്ങളിലാണ് ധനകാര്യ സ്ഥാപനങ്ങള്‍ക്കുള്ള അവധി പ്രഖ്യാപിച്ചിരിക്കുന്നത്. 

വാരാന്ത്യ അവധി കൂടി കഴിഞ്ഞ ശേഷം ഏപ്രില്‍ 14 ഞായറാഴ്ച ആകും പിന്നീട് പ്രവൃത്തി ദിവസം പുനരാരംഭിക്കുക. അതേസമയം സര്‍ക്കാര്‍ ഓഫീസുകള്‍, മന്ത്രാലയങ്ങള്‍ എന്നിവ ഉള്‍പ്പെടെയുള്ള പൊതു സ്ഥാപനങ്ങളുടെ ഈദ് അവധി ഞായറാഴ്ച തുടങ്ങി. ഏപ്രില്‍ 15 വരെയാണ് ചെറിയ പെരുന്നാളിന് അവധി പ്രഖ്യാപിച്ചിരിക്കുന്നത്.

ചെറിയ പെരുന്നാൾ; ഷാര്‍ജയില്‍ സൗജന്യ പാര്‍ക്കിങ് പ്രഖ്യാപിച്ചു

ഷാര്‍ജ: ചെറിയ പെരുന്നാളിനോട് അനുബന്ധിച്ച് ഷാര്‍ജയില്‍ സൗജന്യ പാര്‍ക്കിങ് പ്രഖ്യാപിച്ചു. ഈദുല്‍ ഫിത്‌റിന്റെ ആദ്യ മൂന്ന് ദിവസങ്ങളില്‍ പൊതുസ്ഥലങ്ങളിലെ പാര്‍ക്കിങ് സൗജന്യമായിരിക്കും. എന്നാല്‍ നീല സൂചനാ ബോര്‍ഡുള്ള പാര്‍ക്കിങ് സോണുകളില്‍ നിരക്ക് ഈടാക്കുന്നത് തുടരും. നിയമലംഘകരെ കണ്ടെത്താന്‍ അവധി ദിവസങ്ങളിലും പരിശോധന നടത്തുമെന്ന് ഷാര്‍ജ മുന്‍സിപ്പാലിറ്റി ഡയറക്ടര്‍ ജനറല്‍ ഉബൈദ് സഈദ് അല്‍ തുനൈജി പറഞ്ഞു. 

ചെറിയ പെരുന്നാളിനോട് അനുബന്ധിച്ച് ദുബൈയിലും സൗജന്യ പാര്‍ക്കിങ് പ്രഖ്യാപിച്ചിട്ടുണ്ട്. മള്‍ട്ടി ലെവല്‍ പാര്‍ക്കിങ് ടെര്‍മിനലുകള്‍ ഒഴികെയുള്ള എല്ലാ പബ്ലിക് പാര്‍ക്കിങ് സ്ഥലങ്ങളും സൗജന്യമായിരിക്കും. 

റമദാന്‍ 29 മുതല്‍ ശവ്വാല്‍ 3 വരെയാണ് സൗജന്യ പാര്‍ക്കിങ് പ്രഖ്യാപിച്ചിട്ടുള്ളതെന്ന് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി അറിയിച്ചു. പാര്‍ക്കിങ് ഫീസ് ശവ്വാല്‍ 4ന് പുനരാരംഭിക്കുമെന്നും അധികൃതര്‍ വെള്ളിയാഴ്ച അറിയിച്ചു. പെരുന്നാള്‍ ഈ മാസം 10ന് ആണെങ്കില്‍ ഏപ്രില്‍ എട്ട് മുതല്‍ 12 വരെ പാര്‍ക്കിങ് നിരക്കുകള്‍ ഈടാക്കില്ല. ദുബൈയില്‍ ഞായറാഴ്ചകളില്‍ പാര്‍ക്കിങ് സൗജന്യമായതിനാല്‍ വാഹനമോടിക്കുന്നവര്‍ക്ക് തുടര്‍ച്ചയായി ആറ് ദിവസത്തെ സൗജന്യ പാര്‍ക്കിങ് ലഭിക്കും. എന്നാല്‍ 9ന് പെരുന്നാള്‍ ആണെങ്കില്‍ പാര്‍ക്കിങ് അഞ്ച് ദിവസം മാത്രമെ സൗജന്യമായി ലഭിക്കൂ. 

ഏഷ്യാനെറ്റ് ന്യൂസ് ലൈവ് യുട്യൂബിൽ കാണാം...