ഡാലിയക്ക് 25ാം പിറന്നാൾ, സൂപ്പർ കേക്കുമായി ദുബൈ സഫാരി പാർക്ക്; പൊടിപൊടിച്ച് പിറന്നാൾ ആഘോഷം

സഫാരി പാർക്കിൽ ഏവർക്കും പ്രിയപ്പെട്ട ഡാലിയ എന്നുപേരിട്ടിരിക്കുന്ന ജിറാഫിന്റെ 25ാം ജന്മദിനമാണ് ആഘോഷിച്ചത്

ദുബൈ: ദുബൈ സഫാരി പാർക്കിലെ ഏറ്റവും പ്രായം കൂടിയ ജിറാഫിന് പിറന്നാളോഘോഷം. മൃ​ഗശാല ജീവനക്കാരാണ് പിറന്നാളാഘോഷം സംഘടിപ്പിച്ചത്. സഫാരി പാർക്കിൽ ഏവർക്കും പ്രിയപ്പെട്ട ഡാലിയ എന്നുപേരിട്ടിരിക്കുന്ന ജിറാഫിന്റെ 25ാം ജന്മദിനമാണ് ആഘോഷിച്ചത്. വംശനാശ ഭീഷണി നേരിട്ടുകൊണ്ടിരിക്കുന്ന ജീവി വർ​ഗമാണ് ഡാലിയ ജിറാഫിന്റെതെന്ന് മൃ​ഗശാല അധികൃതർ അറിയിച്ചു. 

ഡാലിയയുടെ ഇഷ്ട ഭക്ഷണം കാരറ്റും വെള്ളരിയും ലെറ്റൂസും കൊണ്ട് അലങ്കരിച്ച് കേക്ക് രൂപത്തിലാക്കിയാണ് നൽകിയത്. ഡാലിയ ജിറാഫ് ഇത് കഴിക്കുന്നതിന്റെ ചിത്രങ്ങളും വീഡിയോകളും സാമൂഹിക മാധ്യമങ്ങളിൽ മൃ​ഗശാല ജീവനക്കാർ പങ്കുവെച്ചിരുന്നു. ഇത് വളരെ പെട്ടെന്നാണ് വൈറലായത്. ദുബൈ മൃ​ഗശാലയിൽ ഏപ്രിൽ 9, 2000ത്തിലാണ് ഡാലിയ പിറന്നത്. ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചർ പട്ടികപ്പെടുത്തിയ വംശനാശ ഭീഷണി നേരിടുന്ന ജീവികളിൽപെട്ട ജിറാഫാണ് ഇത്. ലോകമെമ്പാടും ഈ ജീവി വർ​ഗത്തിന്റെ 11,000 എണ്ണം മാത്രമാണ് അവശേഷിക്കുന്നത്. 

ഖത്തറിൽ നിന്നും എത്തിച്ച ജിറാഫ് ആയിരുന്നു ഇതിന്റെ പിതാവ്. അന്ന് രണ്ട് കുഞ്ഞു ജിറാഫുകളാണ് ജനിച്ചിരുന്നത്. അതിൽ ഡാലിയയ്ക്ക് മാത്രമാണ് അതിജീവിക്കാൻ കഴിഞ്ഞിരുന്നതെന്നും ദുബൈ മൃ​ഗശാലയുടെ മുൻ മേധാവി ഡോ.റെസ ഖാൻ പറയുന്നു. അന്ന് മൃ​ഗശാലയിൽ വലിയ സന്ദർശക തിരക്കായിരുന്നു. അവരൊക്കെ സാക്ഷിയാകെയാണ് ഡാലിയ പിറന്നുവീണത്. ഡാലിയയുടെ കുഞ്ഞിക്കാലുകളും എഴുന്നേൽക്കാൻ ശ്രമിക്കുമ്പോൾ ആ ശ്രമം പരാജയപ്പെട്ട് വീണ്ടും തറയിലേക്ക് വീഴുന്നതും ഓർത്തെടുക്കുകയാണ് റെസ ഖാൻ. 

ഇന്ന് മൂവായിരത്തിലധികം പക്ഷി-മൃ​ഗാദികളുടെ ആവാസ കേന്ദ്രമാണ് ദുബൈ സഫാരി പാർക്ക്. 119 ഹെക്ടറിലായി സ്ഥിതിചെയ്യുന്ന ഈ സഫാരി പാർക്കിലെ മൃ​ഗങ്ങളിൽ തന്നെ ഏറ്റവും പ്രായമേറിയത് ഡാലിയക്കാണ്. പല പ്രായമായ ആളുകളെയും പോലെ ഡാലിയക്കും വാർധക്യ സഹജമായ അസുഖങ്ങളുണ്ട്. എന്നാൽപ്പോലും ഡാലിയ ആരോ​ഗ്യവതിയും വളരെ സജീവവുമാണ്. ഇവിടെയുള്ള ഓരോരുത്തർക്കും ഡാലിയ വളരെയധികം പ്രിയപ്പെട്ടവളാണ്. ഡാലിയയുമായി കൂടുതൽ അടുക്കാനും വിശ്വാസം നേടിയെടുക്കാനും ഒരുപാട് സമയമെടുത്തെന്നും ഇന്ന് അവൾ തനിക്ക് ഏറെ പ്രിയപ്പെട്ടവളാണെന്നും മൃ​ഗശാലയിലെ ഒരു ജീവനക്കാരൻ പറയുന്നു. കണ്ണുകളിലൂടെയും മൃദുലമായ സ്പർശനങ്ങളിലൂടെയുമാണ് ഡാലിയ ആശയവിനിമയം നടത്തുന്നതെന്നും വളരെ ശാന്തമായ സമീപനമാണ് ഇവൾക്കുള്ളതെന്നും അവർ പറയുന്നു.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം