ബുർജ് അൽ അറബിനരികെ ഉയരും അത്യാഢംബര ദ്വീപ്, വില്ലകളും സ്വകാര്യ ബീച്ചും ഉൾപ്പെടെ വമ്പൻ സൗകര്യങ്ങൾ

സ്വകാര്യ വില്ലകള്‍, ബിച്ച്​ഫ്രണ്ട്​ താമസസ്ഥലങ്ങൾ, എസ്​റ്റേറ്റ്​ പ്ലോട്ടുകൾ, സ്വകാര്യ ബീച്ച്​ എന്നീ സൗകര്യങ്ങളും ദ്വീപിലുണ്ടാകും. 

ദുബൈ: ദുബൈ തീരത്ത് പുതിയ ആഢംബര ദ്വീപ് നിര്‍മ്മിക്കുന്നു. നായാ ഐലന്‍ഡ് ദുബൈ എന്ന് പേര് നല്‍കിയിരിക്കുന്ന ആഢംബര ദ്വീപില്‍ സ്വകാര്യ വില്ലകള്‍, ബിച്ച്​ഫ്രണ്ട്​ താമസസ്ഥലങ്ങൾ, എസ്​റ്റേറ്റ്​ പ്ലോട്ടുകൾ, സ്വകാര്യ ബീച്ച്​ എന്നീ സൗകര്യങ്ങളും ഉണ്ടാകും. ഈ ദ്വീപിന്‍റെ നിര്‍മ്മാണ പദ്ധതി പുരോഗമിക്കുകയാണ്.

ദ്വീപ് നിര്‍മ്മാണം പൂര്‍ത്തിയാക്കി 2029ഓടെ തുറക്കാനാകുമെന്നാണ് പ്രതീക്ഷിക്കുന്നത്. ജുമൈറ തീരത്ത് ആഡംബര ഹോട്ടൽ സമുച്ചയം ബുർജ്​ അൽ അറബിന്​ സമീപത്തായാണ് പുതിയ ദ്വീപ് ഉയരുക. നഗരത്തിലെ പ്രധാന റോഡ്​ ശൃംഖലയുമായി ബന്ധിപ്പിക്കുന്നതാണ് ഈ ദ്വീപ് എന്നതും പ്രത്യേകതയാണ്​. ശമൽ ഹോൾഡിങ്​ എന്ന നിക്ഷേപ സ്ഥാപനമാണ്​ ഷെവൽ ബ്ലാങ്കുമായി സഹകരിച്ച്​ പദ്ധതി നടപ്പിലാക്കുന്നത്​. ദ്വീപിലെ ഷെവൽ ബ്ലാങ്ക്​ മേയ്​സൻ ഹോട്ടലിൽ 30സ്യൂട്ടുകളും 40സ്വകാര്യ പൂൾ വില്ലകളുമുണ്ടാകും.