ബഹ്റൈന്‍ മൈത്രി അഞ്ചാം വാർഷികം; ഈദ് ഫെസ്റ്റ് 2022 ആഘോഷ രാവ് ഒരുങ്ങുന്നു

ജൂലൈ 11 തിങ്കൾ വൈകിട്ട് 6.30ന് സെഗയ്യയയിലെ കെ.സി.എ ഹാളിൽ നടക്കുന്ന ഈദ് ഫെസ്റ്റ് 2022ൽ ഐഡിയ സ്റ്റാർ സിംഗർ ഫെയിമായിരുന്ന ഇമ്രാൻ ഖാൻ നയിക്കുന്ന ഇശൽ നിലാവും. ഇതോടനുബന്ധിച്ച് നടക്കുന്ന സാംസ്കാരിക സമ്മേളനത്തിൽ പ്രമുഖ മോട്ടിവേഷണൽ സ്‍പീക്കറായ പി.എ.എം ഗഫൂർ മുഖ്യപ്രഭാഷണവും നടത്തും. ബഹ്റൈനിലെ സാമൂഹിക, സാംസ്കാരിക മേഖലയിലുള്ളവരുടെ സാന്നിധ്യമുണ്ടാകും. 

മനാമ: മൈത്രി സോസിയേഷൻ  അഞ്ചാം വാർഷികവും ഈദ് ഫെസ്റ്റ് 2022ഉം സംയുക്തമായി വിവിധ പരിപാടികളോടെ സംഘടിപ്പിക്കുമെന്ന് ഭാരവാഹികൾ വാര്‍ത്താ സമ്മേളനത്തിൽ വ്യക്തമാക്കി. തെക്കൻ കേരളത്തിൽ നിന്നുള്ള സാമൂഹിക പ്രവർത്തകരുടെ ഒത്തൊരുമയിൽ രൂപപ്പെടുത്തിയതാണ് മൈത്രി അസോസിയേഷൻ. 

ബഹ്റൈൻ പ്രവാസ ഭൂമികയിൽ ഒട്ടേറെ ജീവകാരുണ്യ പ്രവർത്തനങ്ങളുമായി സജീവമാണ് മൈത്രി. ജോലി കഴിഞ്ഞുള്ള സമയം സഹജീവികളുടെ ഉന്നമനത്തിനും അവരിലെ പ്രയാസങ്ങള്‍ അനുഭവിക്കുന്നവർക്കുമായി നീക്കിവെക്കാനുള്ള വേദിയായാണ് മൈത്രി പ്രവർത്തിക്കുന്നത്. കഴിഞ്ഞ വർഷങ്ങളിൽ ഏറെ ചാരിതാർഥ്യജനകമായ പ്രവർത്തനങ്ങൾ നടത്താൻ സാധിച്ചതിൽ ഏറെ അഭിമാനമുണ്ടെന്ന് പ്രസിഡന്റ് നൗഷാദ് മഞ്ഞപ്പാറ വ്യക്തമാക്കി. 

രക്തദാനം, മെഡിക്കൽ ക്യാമ്പ്, ഫുഡ്കിറ്റ് വിതരണം, വിദ്യാഭ്യാസ സഹായം, ഉയർന്ന വിജയം നേടിയ കുട്ടികൾക്ക് പ്രോത്സാഹനം, സാമൂഹിക മേഖലയിലുള്ളവരെ പങ്കെടുപ്പിച്ചു കൊണ്ടുള്ള ചർച്ചകൾ, ലേബർ ക്യാമ്പുകളിൽ സഹായമെത്തിക്കൽ, ഇഫ്‍താർ കിറ്റ് വിതരണം, ചികിത്സാ സഹായം തുടങ്ങി ഒേട്ടറെ ജനസേവന പ്രവർത്തനങ്ങൾ ചുരുങ്ങിയ കാലയളവിനുള്ളിൽ നടത്താൻ സാധിച്ചു. ബഹ്‌റൈൻ ക്യാപിറ്റൽ ഗവർണറേറ്റിന്റെ സഹായത്തോടെ റമദാൻ കാലയളവിൽ കഷ്ടതയനുഭവിക്കുന്ന ലേബർ ക്യാമ്പുകളിൽ ഭക്ഷണം എത്തിക്കാനും അതുവഴി ക്യാപിറ്റൽ ഗവർണറേറ്റിന്റെ അംഗീകാരം നേടാനും സാധിച്ചു. 

മൈത്രി അഞ്ചാം വാർഷികം വിപുലമായ രീതിയിൽ സംഘടിപ്പിക്കുന്നതിന് സ്വാഗത സംഘം രൂപവത്കരിച്ച് പ്രവർത്തിച്ചുകൊണ്ടിരിക്കുന്നു. ഷിബു പത്തനംതിട്ടയുടെ നേതൃത്വത്തിലുള്ള സമിതിയാണ് വാർഷിക പരിപാടികൾക്ക് ചുക്കാൻ പിടിക്കുന്നത്. ജൂലൈ 11 തിങ്കൾ വൈകിട്ട് 6.30ന് സെഗയ്യയയിലെ കെ.സി.എ ഹാളിൽ നടക്കുന്ന ഈദ് ഫെസ്റ്റ് 2022ൽ ഐഡിയ സ്റ്റാർ സിംഗർ ഫെയിമായിരുന്ന ഇമ്രാൻ ഖാൻ നയിക്കുന്ന ഇശൽ നിലാവും. ഇതോടനുബന്ധിച്ച് നടക്കുന്ന സാംസ്കാരിക സമ്മേളനത്തിൽ പ്രമുഖ മോട്ടിവേഷണൽ സ്‍പീക്കറായ പി.എ.എം ഗഫൂർ മുഖ്യപ്രഭാഷണവും നടത്തും. ബഹ്റൈനിലെ സാമൂഹിക, സാംസ്കാരിക മേഖലയിലുള്ളവരുടെ സാന്നിധ്യമുണ്ടാകും. 

വാർഷിക പരിപാടി വിശദീകരിക്കാൻ വിളിച്ചുചേർത്ത വാർത്താ സമ്മേളനത്തിൽ പ്രസിഡന്റ് നൗഷാദ് മഞ്ഞപ്പാറ, ജന. സെക്രട്ടറി മുസ്‍‍തഫ സുനിൽ, സെക്രട്ടറി സലീം തയ്യിൽ, ട്രഷറർ അബ്ദുൽ ബാരി, വൈസ് പ്രസിഡന്റ് സക്കീർ ഹുസൈൻ, സ്വാഗത സംഘം ചെയർമാൻ ഷിബു പത്തനംതിട്ട, പ്രോഗ്രാം കൺവീനർ ഷിബു ബഷീർ, വൈസ് ചെയർമാൻമാരായ സഈദ് റമദാൻ നദ്‍വി തുടങ്ങിയവർ സന്നിഹിതരായിരുന്നു.