കൊറോണ മൂലമുള്ള സാമ്പത്തിക പ്രശ്​നങ്ങൾ; ജി20 രാജ്യങ്ങളിലെ ധനകാര്യമന്ത്രിമാരുടെ ചർച്ച ഇന്ന്​ റിയാദിൽ

ഈ വർഷം നവംബറിൽ നടക്കുന്ന ജി20 ഉച്ചകോടിക്ക് മുന്നോടിയായ സാമ്പത്തിക സമ്മേളനമാണിത്​. ഇതിൽ പങ്കെടുക്കാൻ ഇന്ത്യന്‍ ധനകാര്യ മന്ത്രി നിർമല സീതാരാമൻ ഉൾപ്പെടെ ഇരുപത് അംഗ രാജ്യങ്ങളിലെ ധനകാര്യ മന്ത്രിമാരും സെൻട്രൽ ബാങ്ക്​ ഗവർണർമാരും റിയാദിലെത്തി.

റിയാദ്​: കൊറോണ മൂലമുള്ള ലോക സാമ്പത്തിക പ്രശ്​നങ്ങൾ ജി 20 രാജ്യങ്ങളുടെ ധനകാര്യമന്ത്രിമാർ ഞായറാഴ്​ച റിയാദിൽ ചർച്ച ചെയ്യും. ചൈനയിൽ നിന്ന്​ ആവിർഭവിച്ച പുതിയ കൊറോണ വൈറസ് ലോക സാമ്പത്തി രംഗത്തുണ്ടാക്കിയ പ്രത്യാഘാതങ്ങൾ ജി20 രാജ്യങ്ങളുടെ ധനകാര്യ മന്ത്രിമാരുടെയും ആ രാജ്യങ്ങളുടെ സെൻട്രൽ ബാങ്ക്​ ഗവർണർമാരുടെയും യോഗമാണ്​ ഇന്ന്​ റിയാദിലെ റിട്​സ്​ കാൾട്ടൻ ഹോട്ടലിൽ ചേരുന്നത്​.

ഈ വർഷം നവംബറിൽ നടക്കുന്ന ജി20 ഉച്ചകോടിക്ക് മുന്നോടിയായ സാമ്പത്തിക സമ്മേളനമാണിത്​. ഇതിൽ പങ്കെടുക്കാൻ ഇന്ത്യന്‍ ധനകാര്യ മന്ത്രി നിർമല സീതാരാമൻ ഉൾപ്പെടെ ഇരുപത് അംഗ രാജ്യങ്ങളിലെ ധനകാര്യ മന്ത്രിമാരും സെൻട്രൽ ബാങ്ക്​ ഗവർണർമാരും റിയാദിലെത്തി. സമ്മേളനത്തിന് മുന്നോടിയായി ശനിയാഴ്​ച റിയാദ്​ റിട്​സ്​ കാൾട്ടൻ ഹോട്ടലിൽ ആഗോള നികുതി ഘടന സംബന്ധിച്ച സിംപോസിയം നടന്നിരുന്നു. സൗദി ധനകാര്യ മന്ത്രി മുഹമ്മദ്​ അൽജദാന്റെ ആമുഖ പ്രഭാഷണത്തോടെ ആരംഭിച്ച സിംപോസിയം അന്താരാഷ്​ട്ര നികുതി സ​മ്പ്രദായം എന്ന വിഷയം രണ്ട്​ സെഷനുകളിലായി ചർച്ച ചെയ്​തു. കേന്ദ്ര ധനകാര്യമന്ത്രി നിർമല സീതാരാമനും സിംപോസിയത്തിന്റെ രണ്ടാം സെഷനിൽ സംസാരിച്ചു. 

സാമ്പത്തിക സമ്മേളനം റിട്​സ്​ കാൾട്ടൻ ഹോട്ടലിൽ ഞായാറാഴ്​ച രാവിലെ തുടങ്ങും​. കൊറോണ വൈറസ് ലോക സാമ്പത്തിക രംഗത്തുണ്ടാക്കിയ പ്രത്യാഘാതങ്ങളും സാമ്പത്തിക നയങ്ങളുമാണ്​ യോഗം ചര്‍ച്ച ചെയ്യുന്നത്​. നവംബറിലെ ഉച്ചകോടിക്ക്​ മുന്നോടിയായി സാമ്പത്തിക നയങ്ങളും അജണ്ടകളും രൂപപ്പെടുത്താനാണ്​ ഈ യോഗം നടത്തുന്നത്​. സൗദി ധനകാര്യ മന്ത്രി മുഹമ്മദ് അല്‍ജദാൻ അധ്യക്ഷത വഹിക്കും. കൊറോണ വൈറസ് ലോക സാമ്പത്തിക രംഗത്ത് വലിയ തിരിച്ചടി ഉണ്ടാക്കിയിട്ടുണ്ടെന്നും ഇതാണ് സാമ്പത്തിക മന്ത്രിമാരുടെ യോഗത്തിലെ പ്രധാന ചര്‍ച്ചയെന്നും സൗദി മോണിറ്ററിങ്​ അതോറിറ്റി ഗവർണർ അഹമ്മദ് അല്‍ഖലീഫി പറഞ്ഞു.

യോഗത്തി​ന് മുന്നോടിയായി മാധ്യമങ്ങളോട്​ സംസാരിക്കുകയായിരുന്നു അദ്ദേഹം. രാഷ്​ട്രീയ ഭൂഘടനാപരമായ വെല്ലുവിളികള്‍ നമുക്ക് മുന്നിലുണ്ട്. ചൈനയാണ് ഇതില്‍ പ്രധാന വെല്ലുവിളി നേരിടുന്നത്. ഈ വര്‍ഷം ഇതിന്റെ പ്രത്യാഘാതം അളക്കുക സാധ്യമല്ല. കൊറോണ പ്രശ്നം ഗുരുതരമായി തുടരുന്നതിനാല്‍ ഇതിന്റെ സാമ്പത്തിക പ്രത്യാഘാതം എങ്ങനെ നേരിടണമെന്ന കാര്യത്തില്‍ യോഗം ധാരണയിലെത്തും. സൗദിയുടെ ജി.ഡി.പി വളര്‍ച്ചയില്‍ ഗണ്യമായ വര്‍ധന ഈ വര്‍ഷം ഉണ്ടാകുമെന്നും എണ്ണയിതര വരുമാനം വര്‍ധിപ്പിക്കുന്നത് രാജ്യത്ത് ഗുണപരമായ നേട്ടം ഉണ്ടാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.