മൂന്ന് വർഷത്തെ കാത്തിരിപ്പിനൊടുവിൽ കുവൈത്തിൽ നിന്നയച്ച സമ്മാനങ്ങൾ ഒടുവിൽ നാട്ടിലെ കുടുംബത്തിലെത്തി

മുമ്പ് അയച്ച ഈ പെട്ടികൾ ലഭിക്കാതിരുന്നതിനാൽ കുടുംബം ഏറെ നിരാശയിലായിരുന്നു. 2022-ൽ കുവൈത്തിൽ നിന്ന് അയച്ചതാണ് ഈ സാധനങ്ങൾ. എന്നാൽ കൊവിഡ് മഹാമാരിയുടെ ശേഷം നിലനിന്നിരുന്ന ഷിപ്പിംഗ് പ്രശ്‌നങ്ങളുടെയും ലോജിസ്റ്റിക് കാലതാമസങ്ങളുടെയും ഭാഗമായാണ് വൈകിയത്.

കുവൈത്ത് സിറ്റി: മൂന്നാം വർഷം പിന്നിട്ട കാത്തിരിപ്പിന് ഒടുവിൽ വിരാമമായി. ഫിലിപ്പീൻസിലെ കിടാപവാൻ സിറ്റിയിലുള്ള ഒരു ഗ്രാമത്തിലെ കുടുംബത്തിന് കുവൈത്തിൽ നിന്ന് അയച്ച 'ബാലികബയൻ' പെട്ടികൾ ലഭിച്ചു. 2022-ൽ അയച്ചിരുന്ന രണ്ട് പെട്ടികളാണ് ഈ മാസം കുടുംബത്തെത്തിയത്.

വിടവാങ്ങലുകളുടെ നൊമ്പരവും കരുതലുകളുടെ ചൂടും അടങ്ങിയ ഈ പെട്ടികൾ രണ്ടും കുവൈത്തിൽ ജോലി ചെയ്യുന്ന നളിറ്റയുടെ ബന്ധുവാണ് അയച്ചത്. മൂന്ന് വർഷം മുമ്പ് അയച്ച ഈ പെട്ടികൾ ലഭിക്കാതിരുന്നതിനാൽ കുടുംബം ഏറെ നിരാശയിലായിരുന്നു. ‘ഇതൊന്നും ഒരിക്കലും കാണില്ലെന്നു തോന്നിയിരുന്ന വേളയിൽ ഒടുവിൽ ലഭിച്ചത് അത്യന്തം സന്തോഷകരമാണ്’- നളിറ്റയുടെ മാതാവ് പറഞ്ഞു.

വിലപ്പെട്ടതും സ്നേഹത്തോടെ തയാറാക്കിയതുമായ ഉപഹാരങ്ങൾ നിറഞ്ഞ 'ബാലികബയൻ' പെട്ടികൾ ഫിലിപ്പീനോ പ്രവാസികളുടെ ജീവിതത്തിൽ വലിയ സ്ഥാനമാണ് കൈവരിക്കുന്നത്. കുടുംബ ബന്ധങ്ങളെയും ഓർമ്മകളെയും പുതുക്കാൻ ഈ പെട്ടികൾ ഏറെ സഹായിക്കുന്നു. വിദേശത്തുള്ള ഫിലിപ്പീനോ സമൂഹങ്ങൾക്കിടയിൽ പരസ്പരം സ്നേഹവും കുടുംബ പിന്തുണയും പ്രകടിപ്പിക്കുന്നതിന്‍റെ പ്രതീകമായി വലിയ പ്രാധാന്യമുള്ള ഒരു പരമ്പരാഗത സമ്മാനരീതിയാണ് 'ബാലികബയൻ'.

മാരിസെൽ എന്നയാളാണ് പെട്ടികൾ എത്തിയത് സ്ഥിരീകരിച്ചത്. 2022-ൽ കുവൈത്തിൽ നിന്ന് അയച്ചതാണ് ഈ സാധനങ്ങൾ. എന്നാൽ കൊവിഡ് മഹാമാരിയുടെ ശേഷം നിലനിന്നിരുന്ന ഷിപ്പിംഗ് പ്രശ്‌നങ്ങളുടെയും ലോജിസ്റ്റിക് കാലതാമസങ്ങളുടെയും ഭാഗമായാണ് വൈകിയത്. മൂന്ന് വർഷം കഴിഞ്ഞ് ലഭിച്ചെങ്കിലും അതിലൊരു ആശ്വാസമുണ്ട്, അവർ പറഞ്ഞു. പെട്ടികളിലെ എല്ലാ സാധനങ്ങളും അത്രത്തോളം സുരക്ഷിതമായി തകരാറോ കൂടാതെ എത്തിച്ചേർന്നതായും കുടുംബം വ്യക്തമാക്കി.