മകന്‍റെ വിവാഹത്തിനായി ഒമാനിലെത്തിയ കണ്ണൂർ സ്വദേശി നിര്യാതനായി

മകന്‍റെ വിവാഹത്തിൽ പങ്കെടുക്കാൻ മസ്കറ്റിലെത്തിയ മലയാളി നിര്യാതനായി. അസുഖം മൂർച്ഛിച്ചതിനെ തുടർന്ന് ആശുപത്രിയിൽ പ്രവേശിപ്പിച്ച പിതാവിന്‍റെ സാന്നിധ്യത്തിൽ മകന്‍റെ നിക്കാഹ് നടത്തുകയായിരുന്നു.

മസ്കറ്റ്: മകന്‍റെ വിവാഹ ചടങ്ങിൽ പങ്കെടുക്കാൻ മസ്കറ്റിലെത്തിയ മലയാളി നിര്യാതനായി. കണ്ണൂർ തളിപ്പറമ്പ് കാക്കത്തോട് സ്വദേശി മഹ്മൂദ് എം പി(62) ആണ് മരണപ്പെട്ടത്. മകന്‍റെ വിവാഹ ചടങ്ങുകൾ മസ്കറ്റിലെ അൽഖുവൈറിൽ വെള്ളിയാഴ്ച നിശ്ചയിച്ചിരുന്നു. ഇതിനിടെയാണ് പിതാവിന്‍റെ അപ്രതീക്ഷിത വിയോഗം.

ഖുറമിലെ പെർഫ്യൂം ഷോപ്പിലെ മാനേജരായ മകൻ മാസിൻ മഹ്മൂദിന്റെ വിവാഹ ചടങ്ങിൽ പങ്കെടുക്കുന്നതിനാണ് മഹ്മൂദും ഭാര്യ റഹ്മത്തും മക്കളായ മെഹ്‌റ, മാജിദ എന്നിവർ ഏതാനും ദിവസം മുൻപ് മസ്കറ്റിലെത്തിയത്. കിഡ്‌നി സംബന്ധമായ അസുഖത്തെ തുടർന്ന് മഹ്മൂദ് നാട്ടിൽ ചികിത്സയിലായിരുന്നു.

മസ്കറ്റിലെത്തി ഏതാനും ദിവസം കഴിഞ്ഞപ്പോൾ അസുഖം മൂർച്ഛിച്ചതിനെ തുടർന്ന് ആശുപത്രിയിലേക്ക് മാറ്റുകയായിരുന്നു. ഇതോടെ കഴിഞ്ഞ ദിവസം പെട്ടൊന്ന് നിക്കാഹ് നടത്തി. ആശുപത്രിയിൽ പിതാവിന്റെ സാന്നിധ്യത്തിൽ തന്നെ മകൻ മാസിൻ വിവാഹ മഹർ വധുവിന് കൈമാറി. മലയാളി വേരുകളുള്ള മുംബൈ സ്വദേശിനിയും മസ്കറ്റിൽ പ്രവാസിയുമായ സബ മുനീർ മൂസയാണ് വധു. മൃതദേഹം ആമിറാത്തിൽ ഖബറടക്കി. ഭാര്യ: റഹ്മത്ത്. മറ്റു മക്കൾ: മെഹ്‌റ, മാജിത. മരുമക്കൾ: അബ്ദുല്ല കെ.എസ്, മുഷ്താഖ്.