മൂന്നുമാസം മുമ്പ് കാണാതായ പ്രവാസി മലയാളി മരിച്ചെന്ന് സ്ഥിരീകരണം

സുഖമില്ലാതെ ആശുപത്രിയിലേക്ക് പോയ ഇദ്ദേഹത്തെ പിന്നീട്​ കാണാതായെന്നാണ്​ ബന്ധുക്കളും സുഹൃത്തുക്കളും അന്ന്​ പരാതിപ്പെടുകയും വ്യാപകമായ അന്വേഷണം നടത്തുകയും ചെയ്‍തിരുന്നത്​​. റിയാദിലെ ശുമൈസി ആശുപത്രിയിലേക്കാണ് ചികിത്സ തേടി പോയത്​. 

റിയാദ്​: മൂന്നുമാസം മുമ്പ് റിയാദിൽ കാണാതായ മലയാളി മരിച്ചതായി സ്ഥിരീകരിച്ചു. മെയ് 27ന് കാണാതായ തൃശൂർ ചെന്ത്രാപ്പിന്നി സ്വദേശിയും റിയാദിലെ അൽമുഹൈദിബ്​ കമ്പനിയിലെ ഡ്രൈവറുമായ തളിക്കളം മുഹമ്മദിന്റെ​ (സൈദു-57) മരണമാണ്​ ഇപ്പോൾ സ്ഥിരീകരിച്ചത്​. 

സുഖമില്ലാതെ ആശുപത്രിയിലേക്ക് പോയ ഇദ്ദേഹത്തെ പിന്നീട്​ കാണാതായെന്നാണ്​ ബന്ധുക്കളും സുഹൃത്തുക്കളും അന്ന്​ പരാതിപ്പെടുകയും വ്യാപകമായ അന്വേഷണം നടത്തുകയും ചെയ്‍തിരുന്നത്​​. റിയാദിലെ ശുമൈസി ആശുപത്രിയിലേക്കാണ് ചികിത്സ തേടി പോയത്​. അതിന് ശേഷം വിവരങ്ങളില്ലാതായെന്ന് പറഞ്ഞാണ് സൗദിയിലുള്ള സഹോദര പുത്രൻ അനൂപും സാമൂഹിക പ്രവർത്തകരും അന്വേഷണം നടത്തിയത്​. 

അതേസമയം റിയാദിലെ മൻഫുഅയിൽ വെച്ച് മേയ് 28ന് ഹൃദയാഘാതതത്തെ തുടര്‍ന്ന് മരണം സംഭവിച്ചു എന്നാണ് ലഭിച്ച വിവരം. പിന്നീട്​ ആഗസ്റ്റ് 30ന് റിയാദ് മൻസൂരിയയിലെ മഖ്ബറയിൽ ഖബറടക്കിയെന്നും വിവരമുണ്ട്​. വർഷങ്ങളായി റിയാദിൽ പ്രവാസിയായിരുന്നു മരിച്ച മുഹമ്മദ്​. ഭാര്യ: ഫാമിദ. മക്കൾ: ശിഫ, ഫഹിമ, ഫഹദ്​.