കിംഗ് ഫൈസൽ റോഡിൽ 21 ദിവസത്തേക്ക് ഗതാഗത നിയന്ത്രണം; അറേബ്യൻ ഗൾഫ് സ്ട്രീറ്റ് താൽക്കാലികമായി തുറക്കും

കിംഗ് ഫൈസൽ റോഡിൽ 21 ദിവസത്തേക്ക് ഗതാഗത നിയന്ത്രണം. നവംബർ 22 ശനിയാഴ്ച പുലർച്ചെ ആരംഭിച്ച് 21 ദിവസത്തേക്ക് ഈ പാത അടച്ചിടും. വാഹനമോടിക്കുന്നവർ ഈ കാലയളവിൽ ജാഗ്രത പാലിക്കാനും, ട്രാഫിക് ചിഹ്നങ്ങൾ ശ്രദ്ധിക്കാനും, മറ്റ് വഴികൾ പരിഗണിക്കാനും നിർദ്ദേശം. 

കുവൈത്ത് സിറ്റി: കിംഗ് ഫൈസൽ റോഡിൽ 21 ദിവസത്തേക്ക് ഗതാഗത നിയന്ത്രണം. ട്രാഫിക് ആൻഡ് ഓപ്പറേഷൻസ് സെക്ടറാണ് കുവൈത്തിലെ കിംഗ് ഫൈസൽ റോഡിൽ (റൂട്ട് 50) ഖൈത്താനിലുള്ള തിരക്കിട്ട പാതയിൽ ഇരു ദിശകളിലേക്കും ഗതാഗത നിയന്ത്രണം ഏർപ്പെടുത്തിയത്. ഇബ്രാഹിം അൽ-മുസൈൻ സ്ട്രീറ്റും കിംഗ് ഫൈസൽ റോഡും ചേരുന്ന ജംഗ്ഷൻ മുതൽ ശൈഖ് സായിദ് ബിൻ സുൽത്താൻ അൽ നഹ്യാൻ റോഡ് (അഞ്ചാം റിംഗ് റോഡ്) വരെയുള്ള ഭാഗത്താണ് നിയന്ത്രണം.

നവംബർ 22 ശനിയാഴ്ച പുലർച്ചെ ആരംഭിച്ച് 21 ദിവസത്തേക്ക് ഈ പാത അടച്ചിടും. വാഹനമോടിക്കുന്നവർ ഈ കാലയളവിൽ ജാഗ്രത പാലിക്കാനും, ട്രാഫിക് ചിഹ്നങ്ങൾ ശ്രദ്ധിക്കാനും, മറ്റ് വഴികൾ പരിഗണിക്കാനും അധികൃതർ നിർദ്ദേശിച്ചു. സുഗമമായ ഗതാഗതം ഉറപ്പാക്കാൻ ട്രാഫിക് ആൻഡ് ഓപ്പറേഷൻസ് ഡിപ്പാർട്ട്‌മെന്‍റ് ഈ പ്രദേശം നിരീക്ഷിക്കുന്നത് തുടരും.

അതേസമയം, അറേബ്യൻ ഗൾഫ് സ്ട്രീറ്റ് നവംബർ 21 വെള്ളിയാഴ്ച മുതൽ പൂർണ്ണമായി തുറക്കും. കുവൈത്ത് സൊസൈറ്റി ഓഫ് എഞ്ചിനീയേഴ്സ് കവല മുതൽ അൽ-അറബി സ്ട്രീറ്റുമായി ചേരുന്ന രണ്ടാം റിംഗ് റോഡ് ജംഗ്ഷൻ വരെയാണ് തുറക്കുക. ഈ സ്ട്രീറ്റ് പിന്നീട് വീണ്ടും അടച്ചിടുമെന്നും, അടച്ചിടുന്ന തീയതി മുൻകൂട്ടി അറിയിക്കുമെന്നും അധികൃതർ അറിയിച്ചു.വാഹനമോടിക്കുന്നവർ അതനുസരിച്ച് റൂട്ടുകൾ ആസൂത്രണം ചെയ്യാനും ട്രാഫിക് അധികൃതരുടെ അപ്‌ഡേറ്റുകൾ പിന്തുടരാനും നിർദ്ദേശിച്ചു.