ഇ-കാർഡ് വിൽപ്പനയ്ക്ക് പുതിയ നിയമം; ഉപഭോക്താക്കളുടെ തിരിച്ചറിയൽ വിവരങ്ങൾ ഉറപ്പാക്കണമെന്ന് വാണിജ്യ മന്ത്രാലയം

ഇലക്ട്രോണിക് കാർഡുകളും ടോപ്പ്-അപ്പുകളും വിൽക്കുന്ന വെബ്സൈറ്റുകളും ആപ്ലിക്കേഷനുകളും നടത്തുന്ന കമ്പനികളും സ്ഥാപനങ്ങളും വിൽപ്പന പൂർത്തിയാക്കുന്നതിന് മുമ്പ് വാങ്ങുന്നവരുടെ ഐഡന്‍റിറ്റി ഉറപ്പാക്കണം. 

കുവൈത്ത് സിറ്റി: ഇലക്ട്രോണിക് കാർഡുകളും ടോപ്പ്-അപ്പുകളും വിൽക്കുന്ന വെബ്സൈറ്റുകളും ആപ്ലിക്കേഷനുകളും നടത്തുന്ന കമ്പനികളും സ്ഥാപനങ്ങളും വിൽപ്പന പൂർത്തിയാക്കുന്നതിന് മുമ്പ് വാങ്ങുന്നവരുടെ ഐഡന്‍റിറ്റി (തിരിച്ചറിയൽ വിവരങ്ങൾ) ഉറപ്പാക്കണമെന്ന് കുവൈത്ത് വാണിജ്യ വ്യവസായ മന്ത്രാലയം നിർദ്ദേശം നൽകി. ഈ പ്ലാറ്റ്‌ഫോമുകളുടെ മേൽനോട്ടം വർധിപ്പിക്കാനും വിൽപ്പനക്കാർ നടത്തുന്ന ദുരുപയോഗ സാധ്യതകൾ തടയാനും വേണ്ടിയാണ് ഈ നടപടി ലക്ഷ്യമിടുന്നതെന്ന് വിവരമുള്ള വൃത്തങ്ങൾ സൂചിപ്പിച്ചു.

ഈ തീരുമാനപ്രകാരം, കുവൈത്തിലെ ഇലക്ട്രോണിക് ഉൽപ്പന്നങ്ങളുടെ വിൽപ്പന നിയന്ത്രിക്കപ്പെടുന്നു. ഐട്യൂൺസ് കാർഡുകൾ, മൊബൈൽ ഫോൺ ക്രെഡിറ്റ്, മറ്റ് ടോപ്പ്-അപ്പ് ഉൽപ്പന്നങ്ങൾ എന്നിവയുമായി ബന്ധപ്പെട്ട ഓൺലൈൻ ഇടപാടുകൾക്ക് പ്രത്യേക നിയന്ത്രണങ്ങളും മാനദണ്ഡങ്ങളും നടപ്പിലാക്കാൻ വെബ്‌സൈറ്റുകളുള്ള കമ്പനികൾക്ക് നിർബന്ധമാണ്. ഈ തീരുമാനം ലംഘിക്കുന്നവർക്ക്, സാധനങ്ങളുടെയും സേവനങ്ങളുടെയും മേൽനോട്ടം സംബന്ധിച്ച നിയമത്തിലും വാണിജ്യ ലൈസൻസുകൾ, കമ്പനികൾ എന്നിവ സംബന്ധിച്ച നിയമങ്ങളിലും പ്രതിപാദിച്ചിട്ടുള്ള പിഴ ശിക്ഷകൾക്ക് വിധേയരാകേണ്ടി വരും.