കുവൈത്തിൽ 3,000 ദിനാറിൽ താഴെയുള്ള ഇടപാടുകളും ഇനി നിരീക്ഷണത്തിൽ; കർശന നിർദേശവുമായി സെൻട്രൽ ബാങ്ക്

കുവൈത്തിൽ 3,000 ദിനാറിൽ താഴെയുള്ള ബാങ്ക് നിക്ഷേപങ്ങളും പണമിടപാടുകളും നിരീക്ഷിക്കാൻ സെൻട്രൽ ബാങ്ക് കർശന നിർദേശം നൽകി. കള്ളപ്പണം വെളുപ്പിക്കലും ഭീകരവാദ ഫണ്ടിംഗും തടയുന്നതിനാണ് ഈ പുതിയ നടപടി. എന്നാൽ സാധാരണക്കാരുടെ നിയമാനുസൃതമായ സാമ്പത്തിക ഇടപാടുകളെ ഇത് ബാധിക്കില്ല.

കുവൈത്ത് സിറ്റി: കുവൈത്തിൽ 3,000 ദിനാറിൽ താഴെയുള്ള ബാങ്ക് നിക്ഷേപങ്ങളും പണമിടപാടുകളും നിരീക്ഷിക്കുന്നതിനുള്ള നടപടികൾ ശക്തമാക്കാൻ സെൻട്രൽ ബാങ്ക് നിർദേശം. ചെറിയ തുകകൾ തുടർച്ചയായി നിക്ഷേപിക്കുന്നതും ബാങ്ക് അക്കൗണ്ടുകളിലൂടെ ആവർത്തിച്ച് പണം കൈമാറുന്നതും സംശയാസ്പദമായ സാഹചര്യങ്ങളിൽ കൂടുതൽ പരിശോധനയ്ക്ക് വിധേയമാക്കും.

കള്ളപ്പണം വെളുപ്പിക്കൽ, ഭീകരവാദ പ്രവർത്തനങ്ങൾക്കുള്ള സാമ്പത്തിക സഹായം എന്നിവ തടയുന്നതിന്‍റെ ഭാഗമായാണ് പുതിയ നടപടി. ഇതുവരെ ഒരാൾ ഒരു ദിവസം നടത്തുന്ന 3,000 ദിനാറോ അതിലധികമോ വരുന്ന നിശ്ചിത നിക്ഷേപങ്ങളും കുവൈത്തിലേക്കുള്ള ബാങ്ക് ട്രാൻസ്ഫറുകളുമാണ് പ്രത്യേക റിപ്പോർട്ടിങ് സംവിധാനത്തിൽ ഉൾപ്പെടുത്തിയിരുന്നത്. എന്നാൽ ഈ പരിധിക്ക് താഴെയുള്ള ഇടപാടുകളും സംശയകരമായ രീതിയിൽ ആവർത്തിക്കുന്നുണ്ടെങ്കിൽ നിരീക്ഷിക്കാനാണ് പുതിയ നിർദേശം.

3,000 ദിനാറിന്‍റെ റിപ്പോർട്ടിങ് പരിധി ഒഴിവാക്കുന്നതിനായി ചിലർ വലിയ തുകകൾ ചെറിയ ഭാഗങ്ങളാക്കി പലതവണ നിക്ഷേപിക്കുകയോ കൈമാറുകയോ ചെയ്യുന്നതായി അധികൃതരുടെ ശ്രദ്ധയിൽപ്പെട്ടിട്ടുണ്ട്. ചില ഇടപാടുകളിൽ റിപ്പോർട്ടിങ് പരിധിയേക്കാൾ ഒരു ദിനാർ മാത്രം കുറച്ച് പണം നിക്ഷേപിക്കുന്ന പ്രവണതയും കണ്ടെത്തിയതായി റിപ്പോർട്ടുകൾ വ്യക്തമാക്കുന്നു. ഇത്തരം ഇടപാടുകൾ തിരിച്ചറിയുന്നതിന് ബാങ്കുകളുടെ നിലവിലുള്ള നിരീക്ഷണ സംവിധാനങ്ങൾ കൂടുതൽ കാര്യക്ഷമമാക്കണമെന്ന് സെൻട്രൽ ബാങ്ക് ആവശ്യപ്പെട്ടു. ഒരു ഇടപാടിലെ തുക മാത്രം പരിഗണിക്കാതെ നിശ്ചിത കാലയളവിൽ നടന്ന ഇടപാടുകളുടെ എണ്ണം, ആവർത്തന സ്വഭാവം, ആകെ തുക, ഇടപാടുകൾക്കിടയിലെ സമയവ്യത്യാസം എന്നിവയും പരിശോധിക്കും.

സംശയാസ്പദമായ സാമ്പത്തിക ഇടപാടുകൾ കണ്ടെത്തുന്നതിനായി പുതിയ മുന്നറിയിപ്പ് സംവിധാനങ്ങൾ ഏർപ്പെടുത്താനും ബാങ്കുകൾ തയ്യാറെടുക്കുകയാണ്. അസാധാരണമായ ഇടപാടുകൾ തിരിച്ചറിയുന്നതിനും വിവരങ്ങൾ വിശകലനം ചെയ്യുന്നതിനും ആർട്ടിഫിഷ്യൽ ഇന്‍റലിജൻസ് ഉൾപ്പെടെയുള്ള സാങ്കേതികവിദ്യകൾ പ്രയോജനപ്പെടുത്താനുള്ള സാധ്യതയും പരിഗണിക്കുന്നുണ്ട്. 2013-ലെ കള്ളപ്പണം വെളുപ്പിക്കൽ, ഭീകരവാദ ധനസഹായം തടയൽ നിയമത്തിലെ 106-ാം നമ്പർ വ്യവസ്ഥകൾക്ക് അനുസൃതമായാണ് നിരീക്ഷണം വിപുലീകരിക്കുന്നത്.

അതേസമയം, 3,000 ദിനാറിൽ താഴെയുള്ള എല്ലാ ബാങ്ക് ഇടപാടുകൾക്കും നിയന്ത്രണം ഏർപ്പെടുത്തുകയോ അവയെല്ലാം സംശയാസ്പദമായി കണക്കാക്കുകയോ ചെയ്യുന്നതല്ല പുതിയ നടപടി. ഇടപാടുകളുടെ സ്വഭാവത്തിലും ആവർത്തനത്തിലും അസ്വാഭാവികത കണ്ടെത്തുന്ന സാഹചര്യങ്ങളിലാണ് കൂടുതൽ പരിശോധന നടത്തുക. സാധാരണക്കാരുടെ നിയമാനുസൃതമായ സാമ്പത്തിക ഇടപാടുകളെ ബാധിക്കാതെ ബാങ്കിങ് മേഖലയിലെ സുതാര്യതയും സുരക്ഷയും ഉറപ്പാക്കുകയാണ് ലക്ഷ്യം.