കുവൈത്തിൽ പ്രവാസിക്ക് നേരെ കോടാലി വീശി കൊള്ളയടിക്കാൻ ശ്രമം, യുവാവ് പൊലീസ് പിടിയിൽ

കുവൈത്തിൽ പ്രവാസിയെ കൊള്ളയടിക്കാൻ ശ്രമം നടത്തിയ യുവാവ് പിടിയിൽ. പൊലീസിനെ കണ്ടയുടൻ പ്രതി സംഭവസ്ഥലത്ത് നിന്ന് ഓടി രക്ഷപ്പെടാൻ ശ്രമിച്ചു. ഉദ്യോഗസ്ഥർ ഉടൻ തന്നെ ഇയാളെ പിന്തുടർന്ന് പിടികൂടുകയും കുറ്റകൃത്യത്തിന് ഉപയോഗിച്ച ആയുധം കണ്ടെടുക്കുകയും ചെയ്തു.

കുവൈത്ത് സിറ്റി: കുവൈത്തിലെ ജഹ്‌റ ഗവർണറേറ്റിലെ റോഡുകളിലൊന്നിൽ വെച്ച് ഒരു അറബ് പ്രവാസിയെ കൊള്ളയടിക്കാൻ ശ്രമിച്ച യുവാവിനെ ജഹ്‌റ പൊലീസ് പട്രോൾ സംഘം വിജയകരമായി പിടികൂടി. തുടർ അന്വേഷണങ്ങൾക്കായി പ്രതിയെ ഉടൻ തന്നെ ബന്ധപ്പെട്ട അധികൃതർക്ക് കൈമാറി. പ്രവാസിക്ക് നേരെ കോടാലി വീശി ഭീഷണിപ്പെടുത്തുന്ന കൗമാരക്കാരനെ പതിവ് പട്രോളിംഗിനിടെ പൊലീസ് ഉദ്യോഗസ്ഥർ കണ്ടു.

പൊലീസിനെ കണ്ടയുടൻ പ്രതി സംഭവസ്ഥലത്ത് നിന്ന് ഓടി രക്ഷപ്പെടാൻ ശ്രമിച്ചു. ഉദ്യോഗസ്ഥർ ഉടൻ തന്നെ ഇയാളെ പിന്തുടർന്ന് പിടികൂടുകയും കുറ്റകൃത്യത്തിന് ഉപയോഗിച്ച ആയുധം കണ്ടെടുക്കുകയും ചെയ്തു. ജഹ്‌റയിലെ സുരക്ഷയും പൊതുജന സുരക്ഷയും നിലനിർത്തുന്നതിനുള്ള ശ്രമങ്ങളുടെ ഭാഗമായാണ് ഈ അറസ്റ്റ് എന്ന് അധികൃതർ സ്ഥിരീകരിച്ചു. ഇയാൾക്ക് മറ്റ് കുറ്റകൃത്യങ്ങളിൽ പങ്കുണ്ടോയെന്ന് കണ്ടെത്താനായി പ്രതിയെയും കണ്ടെടുത്ത ആയുധവും അന്വേഷണ വിഭാഗങ്ങൾക്ക് കൈമാറിയിട്ടുണ്ട്.