കുവൈത്തില്‍ ബാലവേല ചെയ്യിച്ചാല്‍ കമ്പനി പൂട്ടിക്കുമെന്ന് മുന്നറിയിപ്പ്

കുവൈത്തിൽ 15 വയസിൽ താഴെയുള്ളവരെ കൊണ്ട്​ ജോലിയെടുപ്പിച്ചാൽ കമ്പനി പൂട്ടിക്കുമെന്ന്​ മാൻപവർ അതോറിറ്റിയുടെ മുന്നറിയിപ്പ്. കുവൈത്തിൽ സാധാരണ നിലയ്ക്ക് വർക്ക് പെർമിറ്റ് ലഭിക്കുന്നതിനുള്ള പ്രായ പരിധി ഇരുപത്തൊന്ന് വയസാണന്നും മാൻ പവർ അതോറിറ്റി വ്യക്തമാക്കി. 

കുവൈത്ത് സിറ്റി: കുവൈത്തിൽ 15 വയസിൽ താഴെയുള്ളവരെ കൊണ്ട്​ ജോലിയെടുപ്പിച്ചാൽ കമ്പനി പൂട്ടിക്കുമെന്ന്​ മാൻപവർ അതോറിറ്റിയുടെ മുന്നറിയിപ്പ്. കുവൈത്തിൽ സാധാരണ നിലയ്ക്ക് വർക്ക് പെർമിറ്റ് ലഭിക്കുന്നതിനുള്ള പ്രായ പരിധി ഇരുപത്തൊന്ന് വയസാണന്നും മാൻ പവർ അതോറിറ്റി വ്യക്തമാക്കി. 

കുവൈത്തിൽ 15 വയസ്സിന്​ മുകളിൽ പ്രായമുള്ളവർക്ക്​ നിയമാനുസൃതമായി നിയന്ത്രണങ്ങളോടെ ജോലി നൽകാൻ കഴിയും. എന്നാൽ കടുത്ത ശാരീരികാധ്വാനവും മാനസിക സമ്മർദ്ദവും വേണ്ട തൊഴിൽ ഈ പ്രായ വിഭാഗത്തിലുള്ളവരെക്കൊണ്ട്​ എടുപ്പിക്കാൻ പാടില്ല. ഇതിന്​ മുൻകൂട്ടി അനുമതി വാങ്ങുകയും വൈദ്യ പരിശോധന പൂർത്തിയാക്കുകയും വേണം. 

ഇതിനെതിരെ നിയമവിരുദ്ധമായി ബാലവേല ചെയ്യിപ്പിച്ചാൽ കമ്പനിക്കെതിരെ നടപടിയെടുക്കും. കുവൈത്തിൽ സാധാരണ നിലക്കുള്ള വർക്ക്​ പെർമിറ്റ്​ ലഭിക്കുന്നതിനുള്ള പ്രായപരിധി 21 വയസ്സാണെന്നും 18 വയസ്സല്ലെന്നും മാൻപവർ അതോറിറ്റി തൊഴിൽ നിരീക്ഷക മേധാവി മുഹമ്മദ്​ അൽ അൻസാരി വ്യക്തമാക്കി. 

18 വയസിൽ താഴെയുള്ളവരെ മൈനർ ഗണത്തിലും 21 വയസിൽ താഴെയുള്ളവരെ ഇഖാമ നിയമലംഘകരായുമാണ്​ കണക്കാക്കുക. ഇത്തരക്കാരെ ജോലിയെടുപ്പിച്ചാൽ രക്ഷിതാക്കൾക്കെതിരെ നടപടി സ്വീകരിക്കുമെന്നും തൊഴിലുടമക്കെതിരെയും നിയമനടപടിയും പിഴയും ഉണ്ടാവുമെന്നും അദ്ദേഹം കൂട്ടിച്ചേർത്തു.