പെരുന്നാൾ നമസ്കാരത്തിൽ ജനങ്ങളോടൊപ്പം പങ്കെടുത്ത് സുൽത്താൻ ഹൈതം ബിൻ താരിഖ്

ചെറിയ പെരുന്നാൾ നമസ്കാരത്തിൽ പങ്കെടുത്ത് ഒമാൻ ഭരണാധികാരി സുൽത്താൻ ഹൈതം ബിൻ താരിഖ്. മസ്കറ്റ് വിലായത്തിലെ അൽ ഖോർ പള്ളിയിൽ നടന്ന ഈദ് നമസ്കാരത്തിലാണ് സുൽത്താൻ പങ്കെടുത്തത്. 

മസ്കറ്റ്: ഒമാനിൽ റമദാൻ മാസത്തിന് വിടപറഞ്ഞ് ചെറിയ പെരുന്നാൾ ആഘോഷങ്ങൾക്ക് തുടക്കമായി. ഒമാൻ ഭരണാധികാരി സുൽത്താൻ ഹൈതം ബിൻ താരിഖ് മസ്കറ്റ് വിലായത്തിലെ അൽ ഖോർ പള്ളിയിൽ നടന്ന ഈദ് നമസ്കാരത്തിൽ പങ്കെടുത്തു. ജനങ്ങളോടൊപ്പം നിൽക്കുന്ന ഭരണാധികാരിയുടെ സാന്നിധ്യം ചടങ്ങിൽ ശ്രദ്ധേയമായി. രാജ്യത്തെ വിവിധ ഭാഗങ്ങളിൽ നിന്ന് എത്തിയ വിശ്വാസികൾ റമദാന്റെ ആത്മസംയമനത്തിനും സമർപ്പണത്തിനും ശേഷമുള്ള നന്ദിയും സന്തോഷവും പങ്കുവെച്ച് പ്രാർത്ഥനയിൽ പങ്കുചേർന്നു.

രാജകുടുംബാംഗങ്ങൾ, ഉന്നത ഉദ്യോഗസ്ഥർ, മന്ത്രിമാർ, സൈനിക മേധാവികൾ തുടങ്ങിയവർ ഉൾപ്പെടെ പ്രമുഖരുടെ സാന്നിധ്യവും നമസ്കാരച്ചടങ്ങിൽ ശ്രദ്ധേയമായി. വലിയൊരു വിശ്വാസിസമൂഹം ഒത്തുകൂടിയ ചടങ്ങ്, ഐക്യത്തിന്റെയും ആത്മീയ ഐക്യദാർഢ്യത്തിന്റെയും പ്രതീകമായി മാറി. ഈദ് ദിനത്തിന്റെ സന്ദേശമായ സഹോദരത്വവും കരുണയും സമൂഹത്തിൽ കൂടുതൽ ശക്തിപ്പെടുത്തുന്ന കാഴ്ചകൾക്ക് മസ്കറ്റ് സാക്ഷിയായി.