ഒരാഴ്ചക്കിടെ ഇഖാമ, തൊഴിൽ നിയമങ്ങൾ ലംഘിച്ച 12,458 പ്രവാസികൾ അറസ്റ്റിൽ

അറസ്റ്റിലായവരിൽ 7,836 താമസ നിയമലംഘകരും 3,134 അതിർത്തി സുരക്ഷാ ചട്ടങ്ങളുടെ ലംഘകരും 1,488 ലേറെ തൊഴിൽ നിയമലംഘകരും ഉൾപ്പെടുന്നു. രാജ്യത്തേക്ക് അതിർത്തി വഴി കടക്കാൻ ശ്രമിക്കുന്നതിനിടെ 115 പേരെ അറസ്റ്റ് ചെയ്തു. 

റിയാദ്: ഇഖാമ, തൊഴിൽ നിയമങ്ങൾ ലംഘിച്ച 12,458 പ്രവാസികൾ സൗദിയിൽ ഒരാഴ്ചക്കിടെ അറസ്റ്റിലായി. അതിർത്തി സുരക്ഷാ ചട്ടങ്ങൾ ലംഘിച്ചവരും ഇക്കൂട്ടത്തിലുണ്ട്. മെയ് 12 മുതൽ മെയ് 18 വരെയുള്ള കാലയളവിൽ സുരക്ഷാസേനയുടെ വിവിധ യൂനിറ്റുകളും പാസ്‌പോർട്ട് ജനറൽ ഡയറക്ടറേറ്റും (ജവാസത്ത്) നടത്തിയ സംയുക്ത റെയ്ഡിലാണ് അറസ്റ്റ്. 

അറസ്റ്റിലായവരിൽ 7,836 താമസ നിയമലംഘകരും 3,134 അതിർത്തി സുരക്ഷാ ചട്ടങ്ങളുടെ ലംഘകരും 1,488 ലേറെ തൊഴിൽ നിയമലംഘകരും ഉൾപ്പെടുന്നു. രാജ്യത്തേക്ക് അതിർത്തി വഴി കടക്കാൻ ശ്രമിക്കുന്നതിനിടെ 115 പേരെ അറസ്റ്റ് ചെയ്തു. ഇതിൽ 47 ശതമാനം യമൻ പൗരന്മാരും 35 ശതമാനം എത്യോപ്യക്കാരും 18 ശതമാനം മറ്റ് രാജ്യക്കാരുമാണ്. നിയമലംഘകർക്ക് അഭയം നൽകിയ 19 പേരെയും സുരക്ഷാസേന അറസ്റ്റ് ചെയ്തു. നിലവിൽ ശിക്ഷാനടപടികൾക്ക് വിധേയരായ മൊത്തം നിയമലംഘകരുടെ എണ്ണം 77,630 ലധികം പുരുഷന്മാരും 3,793 സ്ത്രീകളും ഉൾപ്പെടെ 81,423 പേരാണ്. 

അതിർത്തി സുരക്ഷാചട്ടങ്ങൾ ലംഘിച്ച് ആർക്കെങ്കിലും രാജ്യത്തേക്ക് പ്രവേശിക്കാൻ സൗകര്യമൊരുക്കുകയോ യാത്രാസൗകര്യമോ അഭയമോ ഏതെങ്കിലും വിധത്തിൽ സഹായമോ സേവനമോ നൽകുകയോ ചെയ്താൽ 15 വർഷം വരെ തടവുശിക്ഷ ലഭിക്കുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി. 10 ലക്ഷം റിയാൽ വരെ പിഴ കൂടാതെ അവരുടെ പേരുകൾ പ്രാദേശിക മാധ്യമങ്ങളിൽ പരസ്യപ്പെടുത്തുകയും ഗതാഗത മാർഗങ്ങൾ, അഭയത്തിനായി ഉപയോഗിച്ച താമസസ്ഥലം എന്നിവ കണ്ടുകെട്ടുകയും ചെയ്യും.