നഗരത്തിന്‍റെ സമഗ്രമായ ഡിജിറ്റൽ പകർപ്പ്! 'ദുബായ് ഡിജിറ്റൽ ട്വിൻ പ്ലാറ്റ്‌ഫോം' ഉദ്ഘാടനം ചെയ്ത് ശൈഖ് ഹംദാൻ

ദുബായ് ഡിജിറ്റൽ ട്വിൻ പ്ലാറ്റ്‌ഫോം ഉദ്ഘാടനം ചെയ്ത് ദുബായ് കിരീടാവകാശി ശൈഖ് ഹംദാൻ ബിൻ മുഹമ്മദ്. ആർട്ടിഫിഷ്യൽ ഇന്റലിജൻസിന്‍റെ സഹായത്തോടെ നഗരത്തിന്‍റെ സമഗ്രമായ 3ഡി ഡിജിറ്റൽ പകർപ്പ് ഒരുക്കുന്ന ഈ പദ്ധതി, മികച്ച നഗരാസൂത്രണത്തിനും വികസനത്തിനും ലക്ഷ്യമിടുന്നു.  

ദുബായ്: ആർട്ടിഫിഷ്യൽ ഇന്റലിജൻസിന്റെയും നൂതന സാങ്കേതികവിദ്യയുടെയും കരുത്തിൽ ചരിത്രത്തിൽ നാഴികക്കല്ലാകുന്ന പദ്ധതിക്ക് ദുബായിൽ തുടക്കം. ദുബായ് നഗരത്തിന്റെ സമഗ്രമായ ഡിജിറ്റൽ പകർപ്പ് ഒരുക്കുന്ന 'ദുബായ് ഡിജിറ്റൽ ട്വിൻ പ്ലാറ്റ്‌ഫോം' പദ്ധതിക്കാണ് തുടക്കമായത്. ദുബായ് മുനിസിപ്പാലിറ്റി സംഘടിപ്പിച്ച പ്രത്യേക ശിൽപ്പശാലയിൽ ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പദ്ധതിയുടെ ഉദ്ഘാടനം നിർവഹിച്ചു.

ദുബായിലെ ലക്ഷക്കണക്കിന് കെട്ടിടങ്ങളുടെയും അടിസ്ഥാന സൗകര്യങ്ങളുടെയും വിവരങ്ങൾ തത്സമയം 3ഡി മോഡലിൽ ലഭ്യമാക്കുന്നതാണ് ഈ അത്യാധുനിക പ്ലാറ്റ്‌ഫോം. ഭാവി വികസനത്തിന് നഗരത്തെ സജ്ജമാക്കുക എന്ന ദുബായ് ഭരണാധികാരി ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ ദീർഘവീക്ഷണത്തിന്റെ ഫലമായാണ് പദ്ധതി നടപ്പിലാക്കുന്നത്.

പ്ലാറ്റ്‌ഫോമിന്‍റെ പ്രധാന സവിശേഷതകൾ

• എമിറേറ്റിലെ 1,95,000-ത്തിലധികം കെട്ടിടങ്ങളുടെ 3ഡി ഡിജിറ്റൽ രൂപം.
• 3,30,000 പൊതു സൗകര്യങ്ങളുടെയും 2,80,000 അടിസ്ഥാന സൗകര്യങ്ങളുടെയും വിവരങ്ങൾ ഒരൊറ്റ പ്ലാറ്റ്‌ഫോമിൽ ലഭ്യമാകും.
• ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് കൂടുതൽ മികച്ച നഗരാസൂത്രണത്തിന് വഴിതുറക്കുന്നു.

ദുബായുടെ സാമ്പത്തിക അജണ്ടയായ 'D33' ലക്ഷ്യങ്ങൾക്ക് ഈ പദ്ധതി വലിയ രീതിയിൽ കരുത്തുപകരുമെന്ന് ശൈഖ് ഹംദാൻ തന്റെ എക്സ് അക്കൗണ്ടിൽ കുറിച്ചു. ആഗോളതലത്തിൽ ഡിജിറ്റൽ പരിവർത്തനത്തിന് നേതൃത്വം നൽകാൻ ദുബായിക്ക് ഇതിലൂടെ സാധിക്കും. പൊതു-സ്വകാര്യ മേഖലകളിലെ സംരംഭകർക്ക് ഒരുപോലെ പ്രയോജനപ്പെടുന്ന ഈ ഡിജിറ്റൽ സംവിധാനം, നഗരത്തിലെ ആസ്തികളുടെ മാനേജ്മെന്റ് കൂടുതൽ കാര്യക്ഷമമാക്കാനും ജനങ്ങളുടെ ജീവിതനിലവാരം ഉയർത്താനും സഹായിക്കുമെന്ന് ദുബായ് മുനിസിപ്പാലിറ്റി വ്യക്തമാക്കി.